ಡಬ್ಬಿಂಗ್ ಧಾರಾವಾಹಿಗಳ ನಡುವೆಯೂ ಕನ್ನಡ ಧಾರಾವಾಹಿಗಳು ಯಶಸ್ವಿಯಾಗಿ ಮುನ್ನುಗ್ಗುತ್ತಿವೆ. ಕಲರ್ಸ್ ಕನ್ನಡದಲ್ಲಿ ಪ್ರಸಾರವಾಗುತ್ತಿರುವ 'ನನ್ನರಸಿ ರಾಧೆ' ಧಾರಾವಾಹಿ ವೀಕ್ಷಕರ ಪ್ರೋತ್ಸಾಹದ ಜೊತೆಗೆ ಯಶಸ್ವಿ 100 ಸಂಚಿಕೆಗಳನ್ನು ಪೂರೈಸಿದೆ.
ಧಾರಾವಾಹಿ 100 ಎಪಿಸೋಡ್ಗಳನ್ನು ಪೂರೈಸಿರುವ ವಿಚಾರವನ್ನು ಅಗಸ್ತ್ಯ ರಾಥೋಡ್ ಆಗಿ ನಟಿಸುತ್ತಿರುವ ಅಭಿನವ್ ವಿಶ್ವನಾಥ್ ತಮ್ಮ ಸೋಷಿಯಲ್ ಮೀಡಿಯಾ ಮೂಲಕ ಹೇಳಿಕೊಂಡಿದ್ದಾರೆ. ಧಾರಾವಾಹಿ ತಂಡದವರ ಜೊತೆಗೆ ಇರುವ ಫೋಟೋವೊಂದನ್ನು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿರುವ ಅಭಿನವ್ 'ನನ್ನರಸಿ ರಾಧೆ ಧಾರಾವಾಹಿ ನೂರು ದಿನಗಳನ್ನು ಪೂರೈಸಿದೆ. ನಮ್ಮನ್ನು ಪ್ರೋತ್ಸಾಹಿಸಿದ ಪ್ರತಿಯೊಬ್ಬರಿಗೂ ಶುಭಾಶಯಗಳು. ನಾವಿಂದು ಯಶಸ್ವಿ ನೂರು ಸಂಚಿಕೆ ಪೂರೈಸಿದ್ದೇವೆ ಎಂದರೆ ಅದಕ್ಕೆ ನೀವು ನೀಡಿದ ಪ್ರೀತಿ ಹಾಗೂ ಸಹಕಾರವೇ ಕಾರಣ. ಇಲ್ಲವಾದರೆ ನಾವು ಸಾಧನೆ ಮಾಡಲು ಆಗುತ್ತಿರಲಿಲ್ಲ' ಎಂದು ಬರೆದುಕೊಂಡಿದ್ದಾರೆ.
- " class="align-text-top noRightClick twitterSection" data="
">
'ಇದು ಆರಂಭ ಅಷ್ಟೇ. ನೀವು ನೀಡಿರುವ ಪ್ರೀತಿ, ಸಹಕಾರ ಇನ್ನಷ್ಟು ಕೆಲಸ ಮಾಡಲು ಸಾಧ್ಯ ಮಾಡಿಕೊಟ್ಟಿದೆ. ಧಾರಾವಾಹಿ ನೋಡುವ ಎಲ್ಲರಿಗೂ ನಾನು ಧನ್ಯವಾದ ಸಮರ್ಪಿಸುವೆ. ಪರದೆಯ ಹಿಂದಿನ ವ್ಯಕ್ತಿಗಳಾದ ಮುಖ್ಯವಾಗಿ ನಿರ್ದೇಶಕರಿಗೆ, ಸಹ ನಿರ್ದೇಶಕರಿಗೆ, ನಿರ್ಮಾಪಕರು, ಕ್ಯಾಮರಾ ಮ್ಯಾನ್, ಮೇಕಪ್ ಆರ್ಟಿಸ್ಟ್ ಹಾಗೂ ಸಹಕಲಾವಿದರಿಗೆ ಕೂಡಾ ಶುಭ ಕೋರುತ್ತೇನೆ' ಎಂದು ಅಭಿನವ್ ಬರೆದುಕೊಂಡಿದ್ದಾರೆ.
ವಿನೋದ್ ವಿ. ದೋಂಢಾಳೆ ನಿರ್ದೇಶನದ 'ನನ್ನರಸಿ ರಾಧೆ'ಯಲ್ಲಿ ನಾಯಕ ಅಗಸ್ತ್ಯ ರಾಥೋಡ್ ಆಗಿ ಅಭಿನವ್ ವಿಶ್ವನಾಥ್ ನಟಿಸಿದ್ದಾರೆ. ನಾಯಕಿ ಇಂಚರಾ ಆಗಿ ಕೌಸ್ತುಭಾ ಮಣಿ ನಟಿಸಿದ್ದಾರೆ. ಉಳಿದಂತೆ ಸಿಹಿ ಕಹಿ ಚಂದ್ರು, ವೈಜಯಂತಿ ಕಾಶಿ , ತೇಜಸ್ವಿನಿ ಪ್ರಕಾಶ್ ಮುಂತಾದವರು ತಾರಾಗಣದಲ್ಲಿದ್ದಾರೆ.
