ಝೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುವ ಜನ ಮೆಚ್ಚಿದ ಧಾರವಾಹಿಗಳ ಪೈಕಿ ನಾಗಿಣಿ ಧಾರಾವಾಹಿ ಮೊದಲ ಸಾಲಿನಲ್ಲೇ ನಿಲ್ಲುತ್ತದೆ. ಈ ಧಾರಾವಾಹಿ ಸುಮಾರು ಮೂರು ವರ್ಷಗಳಿಂದ ಪ್ರಸಾರವಾಗುತ್ತಿದ್ದು, ಅಪಾರ ವಿಕ್ಷಕ ಬಳಗ ಹೊಂದಿದೆ. ಇದೀಗ ಪ್ರೇಕ್ಷಕರಿಗೆ ಕಹಿ ಸುದ್ದಿಯೊಂದು ಹೊರ ಬಿದ್ದಿದೆ.
ಸುಮಾರು 1000 ಎಪಿಸೋಡ್ಗಳನ್ನು ಪೂರೈಸಿರುವ ನಾಗಿಣಿ ಸೀರಿಯಲ್ ಮುಕ್ತಾಯಗೊಳ್ಳಲಿದೆ ಎಂಬ ಮಾಹಿತಿ ಧಾರಾವಾಹಿ ತಂಡದಿಂದ ಹೊರಬಿದ್ದಿದೆ. ಈ ಧಾರಾವಾಹಿಯನ್ನು ಹಯವದನ ನಿರ್ದೇಶಿಸುತ್ತಿದ್ದು, 2016ರಲ್ಲಿ ಶುರುವಾಗಿತ್ತು.
'ನಾಗಿಣಿ' 'ಅಮೃತಾ'ಳಾಗಿ ನಾಲ್ಕು ವರುಷ ಕಿರುತೆರೆ ಪ್ರಿಯರನ್ನು ರಂಜಿಸಿದ್ದ ದೀಪಿಕಾ ದಾಸ್ ಇತ್ತೀಚೆಗಷ್ಟೇ ಧಾರಾವಾಹಿಗೆ ಗುಡ್ ಬೈ ಹೇಳುವುದಾಗಿ ತಿಳಿಸಿದ್ದರು. ಅಷ್ಟೇ ಅಲ್ಲದೇ, ದೀಪಿಕಾ ದಾಸ್ ಮೊನ್ನೆಯಷ್ಟೇ ಪ್ರಾರಂಭವಾಗಿರುವ ಕನ್ನಡದ ಬಿಗ್ ಬಾಸ್ ರಿಯಾಲಿಟಿ ಶೋಗೆ ಆಯ್ಕೆಯಾಗಿ ದೊಡ್ಡ ಮನೆ ಸೇರಿದ್ದಾರೆ. ಈ ಎಲ್ಲಾ ಕಾರಣಗಳಿಂದ ಸೀರಿಯಲ್ ಮುಕ್ತಾಯಗೊಳ್ಳಲಿದೆ ಎನ್ನಲಾಗಿದೆ.
ಧಾರಾವಾಹಿಯಲ್ಲಿ ನಾಗಮಣಿಗಾಗಿ ತನ್ನ ತಂದೆ ತಾಯಿಯನ್ನು ಕೊಂದ ಮನುಷ್ಯರನ್ನು ಸದೆಬಡಿದು ಅವರಲ್ಲಿರುವ ನಾಗಮಣಿಯನ್ನು ಪಡೆಯುವುದಕ್ಕಾಗಿ ಮನುಷ್ಯ ಜನ್ಮ ಪಡೆದು ಬಂದ ನಾಗಿಣಿ ತನ್ನ ದ್ವೇಷವನ್ನು ಹೇಗೆ ಸಾಧಿಸುತ್ತಾಳೆ ಎಂಬುದೇ ಈ ಧಾರಾವಾಹಿಯ ಕಥಾ ಹಂದರವಾಗಿತ್ತು.
ಈ ಸೀರಿಯಲ್ ಹಿಂದಿಯ 'ನಾಗಿನ್'ನ ಧಾರವಾಹಿಯ ರಿಮೇಕ್. ಕನ್ನಡ ಭಾಷೆಗೆ ರಿಮೇಕ್ ಮಾಡುವಾಗ ಅಲ್ಪಸ್ವಲ್ಪ ಬದಲಾಯಿಸಲಾಗಿದ್ದು ಜನಮನ ಮುಟ್ಟುವಲ್ಲಿ ಯಶಸ್ವಿಯಾಗಿದೆ.
