ವಿನಯ್ ರಾಜ್ಕುಮಾರ್ ಅಭಿನಯದ 'ಗ್ರಾಮಾಯಣ' ಸಿನಿಮಾ ಕಳೆದ ವರ್ಷ ಮುಹೂರ್ತ ಆಚರಿಸಿಕೊಂಡಿತ್ತು. 2018 ರಲ್ಲಿ ಸೆಪ್ಟೆಂಬರ್ 7 ರಂದು ಚಿತ್ರದ ಟೀಸರ್ ಕೂಡಾ ಬಿಡುಗಡೆಯಾಗಿತ್ತು. ಆದರೆ ಅಂದಿನಿಂದ ಆ ಸಿನಿಮಾಗೆ ಸಂಬಂಧಿಸಿದ ಯಾವುದೇ ವಿಷಯ ಇದುವರೆಗೂ ತಿಳಿದುಬಂದಿಲ್ಲ.
ಡಾ. ರಾಜ್ಕುಮಾರ್ ಹುಟ್ಟೂರು ಗಾಜನೂರಿನಲ್ಲಿ ಈ ಚಿತ್ರದ ಟೀಸರ್ ಚಿತ್ರೀಕರಣ ಮಾಡಲಾಗಿತ್ತು. ಟೀಸರ್ ಬಿಡುಗಡೆ ಕಾರ್ಯಕ್ರಮಕ್ಕೆ ಶಿವರಾಜ್ಕುಮಾರ್, ರಾಘವೇಂದ್ರ ರಾಜ್ಕುಮಾರ್, ಪುನೀತ್ ರಾಜ್ಕುಮಾರ್ ಆಗಮಿಸಿ ಶುಭ ಕೋರಿದ್ದರು. ಕೆಲವೊಂದು ಸನ್ನಿವೇಶಗಳನ್ನು ವರನಟ ಡಾ. ರಾಜ್ಕುಮಾರ್ ಹುಟ್ಟಿದ ಮನೆಯಲ್ಲಿ ಕೂಡಾ ಚಿತ್ರೀಕರಿಸಲಾಗಿತ್ತು. ಇನ್ನು ಅಮೃತ ಅಯ್ಯರ್ ಈ ಚಿತ್ರದ ನಾಯಕಿ ಎಂದು ವಿನಯ್ ರಾಜ್ಕುಮಾರ್ ಹೇಳಿದ್ದರು. ಚಿತ್ರವನ್ನು ದೇವನೂರು ಚಂದ್ರು ನಿರ್ದೇಶಿಸುತ್ತಿದ್ದರು. ಆದರೆ ಕೆಲವು ದಿನಗಳ ನಂತರ ನಿರ್ದೇಶಕ ಚಂದ್ರು ಹಾಗೂ ನಿರ್ಮಾಪಕ ಎಲ್.ಎನ್. ಮೂರ್ತಿ ನಡುವೆ ಮನಸ್ತಾಪ ಉಂಟಾಗಿ ಚಿತ್ರೀಕರಣವೇ ಸ್ಥಗಿತವಾಗಿದೆ.
ಈ ಚಿತ್ರದ ಪಾತ್ರಕ್ಕಾಗಿ ವಿನಯ್ ರಾಜ್ಕುಮಾರ್ ಗಾಜನೂರಿನಲ್ಲಿ ಓಡಾಡಿ ಚಿತ್ರಕ್ಕೆ ಬೇಕಾದ ಎಲ್ಲಾ ತಯಾರಿ ಮಾಡಿಕೊಂಡಿದ್ದರು. ತಮ್ಮ ಪಾತ್ರಕ್ಕೆ ಬೇಕಾದ ನಡೆ-ನುಡಿಯನ್ನು ಕಲಿತುಕೊಂಡಿದ್ದರು. ಅಲ್ಲದೆ, ಪಾತ್ರಕ್ಕಾಗಿ ಗಡ್ಡ ಕೂಡಾ ಬೆಳೆಸಿಕೊಂಡಿದ್ದರು. ಆದರೆ ಈಗ ಅವರು ಬಾಕ್ಸರ್ ಚಿತ್ರಕ್ಕಾಗಿ ಗಡ್ಡ ತೆಗೆದಿದ್ದಾರೆ. ಸ್ಥಗಿತ ಆಗಿರುವ 'ಗ್ರಾಮಾಯಣ' ಚಿತ್ರಕ್ಕೆ ಒಂದೂವರೆ ವರ್ಷ ಕಳೆದಿದೆ. ನಿರ್ದೇಶಕ ಹಾಗೂ ನಿರ್ಮಾಪಕರ ಮನಸ್ತಾಪ ಸರಿ ಆಗಲು ಡಾ.ರಾಜ್ಕುಮಾರ್ ಕುಟುಂಬ ಮುಂದಾದರೆ ಒಳ್ಳೆಯದು ಎನ್ನಲಾಗುತ್ತಿದೆ.
