ಬಾಲಿವುಡ್ ಬಿಗ್ ಬಿ ಅಮಿತಾಬ್ ಬಚ್ಚನ್ ಇತ್ತೀಚೆಗೆ ದಕ್ಷಿಣ ಭಾರತದ ಸಿನಿಮಾಗಳಲ್ಲೂ ತಮ್ಮನ್ನು ತೊಡಗಿಸಿಕೊಳ್ಳುತ್ತಿದ್ದಾರೆ. ಟಾಲಿವುಡ್ನ ಮೆಗಾ ಪ್ರಾಜೆಕ್ಸ್ 'ಸೈ ರಾ ನರಸಿಂಹರೆಡ್ಡಿ' ಸಿನಿಮಾದಲ್ಲಿ ಅವರು ಸದ್ಯಕ್ಕೆ ಬ್ಯುಸಿಯಾಗಿದ್ದಾರೆ.
ಇದರ ಜೊತೆಗೆ ತಮಿಳಿನ ‘ಉಯರನ್ದ ಮಣಿದನ್‘ ಸಿನಿಮಾದಲ್ಲೂ ಅವರು ನಟಿಸುತ್ತಿದ್ದಾರೆ. ಇದು ಅಮಿತಾಬ್ ನಟಿಸಿರುವ ಮೊದಲ ತಮಿಳು ಸಿನಿಮಾ. ಎಸ್.ಜೆ. ಸೂರ್ಯ ಈ ಸಿನಿಮಾವನ್ನು ನಿರ್ದೇಶಿಸುತ್ತಿದ್ದಾರೆ. ಇತ್ತೀಚೆಗೆ ಸೂರ್ಯ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಚಿತ್ರದಲ್ಲಿನ ಅಮಿತಾಬ್ ಲುಕ್ಕನ್ನು ರಿವೀಲ್ ಮಾಡಿದ್ದರು. ಹಾಗೇ ಅಮಿತಾಬ್ ಅವರಂತ ದೊಡ್ಡ ನಟನೊಂದಿಗೆ ಕೆಲಸ ಮಾಡುವ ಅವಕಾಶ ದೊರೆತಿರುವುದು ನನ್ನ ಪುಣ್ಯ ಎಂದು ಹೇಳಿಕೊಂಡು ಸಂತೋಷ ಕೂಡಾ ವ್ಯಕ್ತಪಡಿಸಿದ್ದರು.
ವಿಶೇಷ ಎಂದರೆ ಈ ಸಿನಿಮಾದಲ್ಲಿ ಅಮಿತಾಬ್ ಜೋಡಿಯಾಗಿ ಖ್ಯಾತ ನಟಿ ರಮ್ಯ ಕೃಷ್ಣನ್ ನಟಿಸುತ್ತಿದ್ದಾರೆ. 1998 ರಲ್ಲಿ ಬಿಡುಗಡೆಯಾದ ‘ಚೋಟೆ ಮಿಯಾ ಬಡೇ ಮಿಯಾ‘ ಸಿನಿಮಾದಲ್ಲಿ ರಮ್ಯ ಕೃಷ್ಣನ್ ಅಮಿತಾಬ್ಗೆ ಜೋಡಿಯಾಗಿದ್ದರು ಇದೀಗ 20 ವರ್ಷಗಳ ನಂತರ ಇಬ್ಬರೂ ಜೊತೆಗೆ ನಟಿಸುತ್ತಿದ್ದಾರೆ.
ಕನ್ನಡದ 'ಅಮೃತಧಾರೆ' ಸಿನಿಮಾದಲ್ಲೂ ಅಮಿತಾಬ್ ನಟಿಸಿದ್ದಾರೆ. ರಮೇಶ್ ಅರವಿಂದ್ ನಿರ್ದೇಶನದ ‘ಬಟ್ಟರ್ ಫ್ಲೈ’ ಸಿನಿಮಾದಲ್ಲಿ ‘ಸುಕವೇವ ಸುರಪಾನವಿದು‘ ಹಾಡನ್ನು ರಾಪ್ ಶೈಲಿಯಲ್ಲಿ ಹಾಡಿದ್ದಾರೆ. ಅಷ್ಟೇ ಏಕೆ ಪ್ರಿಯಾಮಣಿ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ‘ವೈಟ್‘ ಕಿರುಚಿತ್ರಕ್ಕೆ ಕೂಡಾ ಅಮಿತಾಬ್ ಕಂಠದಾನ ಮಾಡಿದ್ದಾರೆ.
