ಡಾ.ರಾಜ್ಕುಮಾರ್ ಫ್ಯಾಮಿಲಿ ಆಗಾಗ್ಗೆ ಸಮಾಜಮುಖಿ ಕೆಲಸಗಳನ್ನು ಮಾಡುತ್ತ ಕರ್ನಾಟಕದ ಜನರ ಪ್ರೀತಿಗೆ ಪಾತ್ರವಾಗಿದೆ. ಈ ಹಿಂದೆ ರಕ್ತದಾನ, ನೇತ್ರದಾನ, ಗಿಡ ನೆಡುವ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡು ಜನರಿಗೆ ಸಹಾಯ ಮಾಡಿತ್ತು.
ಇದೀಗ ಮತ್ತೊಂದು ಸಮಾಜದ ಒಳಿತಿನ ಕೆಲಸಕ್ಕೆ ರಾಜ್ ಫ್ಯಾಮಿಲಿ ಕೈ ಹಾಕಿದೆ. ಅದೇ ಪ್ಲಾಸ್ಟಿಕ್ ಮುಕ್ತ ಭಾರತ. ಹೌದು, ಪ್ಲಾಸ್ಟಿಕ್ ನಿರ್ನಾಮ ಮಾಡುವ ಉದ್ದೇಶದಿಂದ ಪ್ಲಾಸ್ಟಿಕ್ ಬ್ಯಾಗ್ ಬಳಸದಂತೆ ಜನರಿಗೆ ಜಾಗೃತಿ ಮೂಡಿಸುತ್ತಿದೆ. ಈ ಹಿನ್ನೆಲೆಯಲ್ಲಿ ಪರಿಸರ ಸ್ನೇಹಿ ಬ್ಯಾಗ್ ತಯಾರಿಸುವಲ್ಲಿ ರಾಜ್ಕುಮಾರ್ ಕುಟುಂಬ ಮುಂದಾಗಿದೆ. ತಮ್ಮ ಮನೆಯ ಯಾವುದಾದರು ಕಾರ್ಯಕ್ರಮಗಳಿಗೆ ಬರುವ ಅತಿಥಿಗಳಿಗೆ ಈ ಬ್ಯಾಗ್ ಕೊಡುವ ಮೂಲಕ ಪ್ಲಾಸ್ಟಿಕ್ ಮುಕ್ತ ಭಾರತವನ್ನು ಮಾಡುವುದು ಇದರ ಉದ್ದೇಶ.
ಈ ಬಗ್ಗೆ ಮಾತನಾಡಿರುವ ರಾಘವೇಂದ್ರ ರಾಜ್ಕುಮಾರ್, ನಮ್ಮ ತಂದೆಯ ಹೆಸರಲ್ಲಿ ಏನಾದರು ಕಾರ್ಯಕ್ರಮಗಳನ್ನು ಹಮ್ಮಿಕೊಂಡರೆ ಸಮಾಜದಲ್ಲಿ ಒಳ್ಳೆ ಪ್ರತಿಕ್ರಿಯೆ ಸಿಗುತ್ತದೆ. ಯಾಕಂದ್ರೆ ನಮ್ಮ ತಂದೆಯ ಅಭಿಮಾನಿ ಗಣ ಅಷ್ಟು ದೊಡ್ಡದಿದೆ. ಇನ್ನು ನಮ್ಮ ತಂದೆ ಒಂದು ಮಾತು ಹೇಳುತ್ತಿದ್ದರು. ಬೇರೆಯವರಿಗೆ ಏನನ್ನಾದರೂ ಒಳ್ಳೆ ಕೆಲಸ ಮಾಡು ಎನ್ನುವುದಕ್ಕಿಂತ ಮುಂಚೆ ಆ ಕೆಲಸವನ್ನು ಮೊದಲು ನೀನು ಮಾಡು ಎಂದು ಹೇಳುತ್ತಿದ್ರು ಅಂತಾ ರಾಘವೇಂದ್ರ ರಾಜ್ಕುಮಾರ್ ಹೇಳಿದರು.
ಡಾ. ರಾಜ್ಕುಮಾರ್ ಹೆಸರಿನಲ್ಲಿರುವ ಐಎಎಸ್ ಅಕಾಡೆಮಿ ಸಹ ಇತ್ತೀಚಿಗೆ ಟ್ರಸ್ಟ್ ಆಗಿ ಬದಲಾವಣೆಯಾಗಿದೆ. ಇನ್ನು ಡಾ. ರಾಜ್ಕುಮಾರ್ ಟ್ರಸ್ಟ್ ಅಡಿಯಲ್ಲಿ ಸಾವಿರಾರು ವ್ಯಕ್ತಿಗಳಿಗೆ ನೇತ್ರ ತಪಾಸಣೆ, ನೇತ್ರ ದಾನ ಬ್ಯಾಂಕ್, ಶಸ್ತ್ರ ಚಿಕಿತ್ಸೆ ಸಹ ನಡೆಯುತ್ತಿದೆ.
