ನವದೆಹಲಿ: ತೃಣಮೂಲ ಕಾಂಗ್ರೆಸ್ನ ನೂತನ ಸಂಸದೆ ನುಸ್ರತ್ ಜಹಾನ್ ಹಾಗೂ ಮಿಮಿ ಚಕ್ರವರ್ತಿ ತಾಳ್ಮೆ ಕಳೆದುಕೊಂಡು,ಮಾಧ್ಯಮಗಳ ಮೇಲೆ ಹರಿಹಾಯ್ದ ಘಟನೆ ಮಂಗಳವಾರ ನಡೆದಿದೆ.
ಪಶ್ಚಿಮ ಬಂಗಾಳದ ಬಸಿರ್ಹತ್ ಹಾಗೂ ಜಾಧವ್ಪುರ್ ಕ್ಷೇತ್ರಗಳಿಂದ ಚೊಚ್ಚಲ ಬಾರಿ ಸಂಸತ್ ಪ್ರವೇಶಿಸಿರುವ ನುಸ್ರತ್ ಜಹಾನ್ ಹಾಗೂ ಮಿಮಿ ಚಕ್ರಬರ್ತಿ ನಿನ್ನೆ ಪ್ರಮಾಣ ವಚನ ಸ್ವೀಕರಿಸಿದರು. ಬಳಿಕ ಸಂಸತ್ ಭವನದಿಂದ ಹೊರ ಬಂದ ಈ ಚೆಲುವೆಯರ ರಿಯಾಕ್ಷನ್ ಹಾಗೂ ಪೋಟೊ ತೆಗೆದುಕೊಳ್ಳಲು ಮಾಧ್ಯಮದವರು ಮುಗಿಬಿದ್ದರು. ಈ ವೇಳೆ ಕೋಪಗೊಂಡ ನುಸ್ರತ್, ನೀವು ಈ ರೀತಿ ನಮ್ಮನ್ನು ತಳ್ಳುವಂತಿಲ್ಲ. ದಯವಿಟ್ಟು ಅರ್ಥ ಮಾಡಿಕೊಳ್ಳಿ ಎಂದು ಕೋಪದಿಂದಲೇ ನುಡಿದಿದ್ದಾರೆ.
ಈ ವೇಳೆ ಮಧ್ಯಪ್ರವೇಶಿಸಿದ ಗಾರ್ಡ್ಗಳು ಸೇಫ್ ಆಗಿ ನೂತನ ಸಂಸದೆಯರನ್ನು ಕಾರಿನ ಬಳಿಗೆ ಕರೆದೊಯ್ಯಯ್ದರು. ಈ ವೇಳೆ ಕಾರಿನಲ್ಲಿ ಕುಳಿತು ಮಾಧ್ಯಮಗಳಿಗೆ ರಿಯಾಕ್ಟ್ ಮಾಡಿರುವ ನುಸ್ರರ್, ಸ್ವಲ್ಪ ಅಂತರ ಕಾಯ್ದುಕೊಂಡು, ಸರತಿ ಸಾಲಿನಲ್ಲಿ ನಿಂತು ಪೋಟೊ ತೆಗೆದುಕೊಳ್ಳಿ ಸಲಹೆ ನೀಡಿದ್ದಾರೆ.
ಚಿತ್ರನಟಿಯರೂ ಆಗಿರುವ ಈ ನುಸ್ರತ್ ಜಹಾನ್ ಹಾಗೂ ಮಿಮಿ ಚಕ್ರವರ್ತಿ ಮೊದಲ ಬಾರಿಗೆ ಲೋಕಸಭೆ ಪ್ರವೇಶಿಸಿದ್ದಾರೆ. ಕಳೆದ ವಾರ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ನುಸ್ರತ್ ಪ್ರಮಾಣ ವಚನ ಸ್ವೀಕಾರಕ್ಕೆ ಹಾಜರಾಗಿರಲಿಲ್ಲ. ಇವರ ಮದುವೆಗೆ ಹೋಗಿದ್ದ ಮಿಮಿ ಚಕ್ರವರ್ತಿ ಕೂಡ ಗೈರಾಗಿದ್ದರು. ಈ ಹಿನ್ನೆಲೆಯಲ್ಲಿ ಅವರು ನಿನ್ನೆ ಪ್ರಮಾಣ ತೆಗೆದುಕೊಂಡ್ರು.
