ಅರವಿಂದ್ ಕೌಶಿಕ್ ‘ಗಾನ್ ಕೇಸ್’ ಚಿತ್ರಕ್ಕೆ ಮೇಘನಾ ಗಾಂವಕರ್​​​ ನಾಯಕಿ

ಗೆಲುವು-ಸೋಲಿನ ಬಗ್ಗೆ ಯೋಚನೆ ಮಾಡದ ಅರವಿಂದ್ ಕೌಶಿಕ್​ ನಿರ್ದೇಶನದ ‘ಗಾನ್ ಕೇಸ್’ ಚಿತ್ರಕ್ಕೆ ಮೇಘನಾ ಗಾಂವಕರ್ ನಾಯಕಿಯಾಗಿದ್ದಾರೆ.

ಸದಾ ಹೊಸ ಪ್ರಯತ್ನದಲ್ಲೇ ತೊಡಗಿಕೊಂಡಿರುವ ನಿರ್ದೇಶಕ ಅರವಿಂದ್ ಕೌಶಿಕ್ ಗೆಲುವು-ಸೋಲಿನ ಬಗ್ಗೆ ಯೋಚನೆ ಮಾಡುವವರಲ್ಲ. ಹಾಗೆ ನೋಡಿದರೆ ಬಾಕ್ಸ್ ಆಫೀಸ್​ನಲ್ಲಿ ಅವರ ಎಲ್ಲಾ ಸಿನಿಮಾಗಳು ‘ಗಾನ್ ಕೇಸ್’ ಅಂತಲೇ ಹೇಳಬಹುದು.

ಅರವಿಂದ್ ಕೌಶಿಕ್​ ಸಹಾಯಕ ನಿರ್ದೇಶಕ ಆಗಿ ಜೂಟ್, ಎಕ್ಸ್​ಕ್ಯೂಸ್​​ ಮೀ, ನೆನಪಿರಲಿ, 7 ಓ ಕ್ಲಾಕ್ ಸಿನಿಮಾಗಳ ನಂತರ ‘ನಮ್ ಏರಿಯಾದಲ್ ಒಂದ್ ದಿನ’ ಸಿನಿಮಾ ಮಾಡಿದ್ದಾರೆ. ನಿರ್ದೇಶಕನ ಪಟ್ಟ ಆಕ್ರಮಿಸಿದ ನಂತರ ತುಘಲಕ್​, ಕಾಫಿ ವಿತ್ ಮೈ ವೈಫ್, ಶಾರ್ದೂಲ ಹಾಗೂ ಹುಲಿರಾಯ ಸಿನಿಮಗಳು ಅವರಿಗೆ ಯಶಸ್ಸು ತಂದುಕೊಡಲಿಲ್ಲ. ಈಗ ಅವರ ಮುಂದಿನ ಸಿನಿಮಾದ ಶೀರ್ಷಿಕೆ ಹೆಸರೇ ‘ಗಾನ್ ಕೇಸ್’ ಎಂದು ಆಯ್ಕೆ ಮಾಡಿಕೊಂಡಿದ್ದಾರೆ. ಈ ಚಿತ್ರಕ್ಕೆ ಮೇಘನಾ ಗಾಂವಕರ್ ನಾಯಕಿ ಆಗಿ ಆಯ್ಕೆಯಾಗಿದ್ದಾರೆ.

ಈ ಬಾರಿ ಕ್ರೈಂ ಥ್ರಿಲ್ಲರ್ ಕಥಾ ವಸ್ತು ಆಯ್ಕೆ ಮಾಡಿದ್ದಾರೆ ಅರವಿಂದ್ ಕೌಶಿಕ್. ಅಪರಾಧ ಲೋಕವನ್ನು ಒಂದು ಮದುವೆ ಮನೆಗೆ ತಂದು ಕುತೂಹಲ ಕಟ್ಟಿಕೊಡಲಿದ್ದಾರೆ. ಇಲ್ಲಿ ಐದು ಟ್ರ್ಯಾಕ್​​​​ಗಳಲ್ಲಿ ಸಿನಿಮಾ ಸಾಗುತ್ತದೆ. ಆಧುನಿಕ ಟ್ರ್ಯಾಕ್​​ನಲ್ಲಿ ಮೇಘನಾ ಗಾಂವಕರ್​ ಪಾತ್ರ ಕಾಣಿಸಿಕೊಳ್ಳುತ್ತದೆ. ಸಿದ್ದಾರ್ತ್ ಮಾಧ್ಯಮಿಕ, ಹಿತ ಚಂದ್ರಶೇಖರ್, ಅನಿತಾ ಭಟ್, ಸ್ನೇಹಿತ್ ಗೌಡ ಹಾಗೂ ಇತರರು ತಾರಗಣದಲ್ಲಿರಲಿದ್ದಾರೆ.