ಸಂಗೀತಗಾರನಾಗಬೇಕೆಂಬ ಆಸೆಯಿಂದ ಹಾಸನದಿಂದ ಬೆಂಗಳೂರಿಗೆ ಬಂದು ಅವಕಾಶಗಳಿಗಾಗಿ ಅಲೆದಾಡುತ್ತಿದ್ದ ಚಂದನ್ ಶೆಟ್ಟಿ ಇದೀಗ ಹೊಸ ಪ್ರತಿಭೆಗಳಿಗೆ ತಾವೇ ಅವಕಾಶ ನೀಡುವಷ್ಟು ಎತ್ತರಕ್ಕೆ ಬೆಳೆದಿದ್ದಾರೆ.
ರ್ಯಾಪ್ ಸಿಂಗರ್ ಆದರೂ ಚಂದನ್ ಶೆಟ್ಟಿ ಗುರುತಿಸಿಕೊಂಡಿದ್ದು ಬಿಗ್ಬಾಸ್ನಿಂದ. ಅಲ್ಲಿಂದ ಹೊರಬಂದ ಮೇಲೆ ಚಂದನ್ ಸದ್ಯಕ್ಕೆ ಖಾಸಗಿ ಕಾರ್ಯಕ್ರಮವೊಂದರ ಹಾಡಿನ ಸ್ಪರ್ಧೆಯಲ್ಲಿ ತೀರ್ಪುಗಾರರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಆದರೂ ಚಂದನ್ ಮಾತ್ರ ಸಂಗೀತ ನಿರ್ದೇಶನ ಹಾಗೂ ಆಲ್ಬಂ ಹಾಡನ್ನು ಬಿಟ್ಟಿಲ್ಲ. ಈವರೆಗೂ ಚಂದನ್ ‘ಹಾಳಾಗ್ಹೋದೆ’ ವಿಡಿಯೋ ಅಲ್ಬಮ್ನಿಂದ 3 ಪೆಗ್, ಚಾಕೊಲೆಟ್ ಗರ್ಲ್, ಟಕೀಲ, ನಮ್ಮ ಬೆಂಗಳೂರು, ನನ್ ಪ್ರೀತಿ ಸುಳ್ಳಲ್ಲ, ಫೈರ್ ವಿಡಿಯೋ ಆಲ್ಬಂ ಮಾಡಿದ್ದಾರೆ. ಈಗ ‘ಶೋಕಿಲಾಲ‘ ಎಂಬ ಹೊಸ ವಿಡಿಯೋ ಆಲ್ಬಮ್ ಮಾಡಲು ಸಿದ್ಧತೆ ಮಾಡಿಕೊಂಡಿದ್ದಾರೆ. ಇವರ ಒಂದೊಂದು ವಿಡಿಯೋ ಅಲ್ಬಮ್ಗೆ ಯೂಟ್ಯೂಬ್ನಲ್ಲಿ 25 ಮಿಲಿಯನ್ ವೀಕ್ಷಕರಿದ್ದಾರೆ.
‘ಶೋಕಿಲಾಲ‘ ಆಲ್ಬಂನಲ್ಲಿ ಚಂದನ್ ಶೆಟ್ಟಿ ಸಂಗೀತ ನಿರ್ದೇಶನದ ಜೊತೆಗೆ ಆ್ಯಕ್ಟ್ ಕೂಡಾ ಮಾಡಿದ್ದಾರೆ. ಈ ವಿಡಿಯೋ ಆಲ್ಬಂನಲ್ಲಿ ಅದ್ವಿತಿ ಶೆಟ್ಟಿ ಹಾಗೂ ರಾಶಿ ಮಹಾದೇವ್ ಇಬ್ಬರು ನಾಯಕಿಯರಿದ್ದು ಚಂದನ್ ಇವರಿಬ್ಬರ ಜೊತೆ ರೊಮ್ಯಾನ್ಸ್ ಮಾಡಿದ್ದಾರೆ. ಮಿನರ್ವ ಮಿಲ್ನಲ್ಲಿ ಈ ಹಾಡಿನ ಚಿತ್ರೀಕರಣ ನಡೆದಿದೆ. ಈಗಿನ ಬಹುತೇಕ ಯುವಕರು ಹೆಚ್ಚು ಆದಾಯ ಇಲ್ಲದಿದ್ದರೂ ಶೋಕಿಗಾಗಿ ಹೆಚ್ಚು ಖರ್ಚು ಮಾಡುತ್ತಾರೆ. ಈ ಕಾನ್ಸೆಪ್ಟ್ ಇಟ್ಟುಕೊಂಡು ಈ ಆಲ್ಬಂ ಹಾಡನ್ನು ಮಾಡಲಾಗಿದೆ. ಜಗದೀಶ್ ಎಂಬುವರು ಈ ಹಾಡಿಗೆ ಕೊರಿಯೋಗ್ರಫಿ ಮಾಡಿದ್ದಾರೆ. ಇದೇ ತಿಂಗಳಲ್ಲಿ ‘ಶೋಕಿಲಾಲ‘ ಆಲ್ಬಂ ಲೋಕಾರ್ಪಣೆ ಮಾಡುವುದಾಗಿ ಚಂದನ್ ಹೇಳಿದ್ದಾರೆ.
