ಅಭಿನಯ ಚತುರ ನೀನಾಸಂ ಸತೀಶ್ ಅಭಿನಯದ 'ಗೋದ್ರಾ' ಚಿತ್ರದ ಟೀಸರ್ ರಿಲೀಸ್ ಆಗಿದೆ. ಚಿತ್ರದ ಟೀಸರ್ ನೋಡಿದ್ರೆ ಮೇಕಿಂಗ್ನಿಂದಲೇ ಈ ಸಿನಿಮಾ ಸದ್ದು ಮಾಡುವುದು ಗ್ಯಾರಂಟಿ ಎನ್ನಲಾಗಿದೆ. ಬ್ರಹ್ಮಚಾರಿ ಚಿತ್ರದಲ್ಲಿ ಪ್ರೇಕ್ಷಕ ಪ್ರಭುಗಳನ್ನು ನಕ್ಕು - ನಲಿಸಿದ್ದ ಸತೀಶ್ ನೀನಾಸಂ ಗೋದ್ರಾ ಚಿತ್ರದಲ್ಲಿ ಖಡಕ್ ಲುಕ್ನಿಂದ ಗಮನ ಸೆಳೆಯತ್ತಿದ್ದಾರೆ.
ಇನ್ನು ಚಿತ್ರದ ಟೀಸರ್ ಮೇಕಿಂಗ್ನಿಂದಲೇ ಗಮನ ಸೆಳೆಯುತ್ತಿದ್ದು, ಚಿತ್ರದಲ್ಲಿ ಸತೀಶ್ ಪತ್ರಿಕೋದ್ಯಮ ವಿದ್ಯಾರ್ಥಿ ಪಾತ್ರದಲ್ಲಿ ನಟಿಸಿದ್ದಾರೆ. ಗೋದ್ರಾ ಚಿತ್ರದ ಟೀಸರ್ ನೋಡಿದ್ರೆ ಈ ಸಿನಿಮಾ ಪತ್ರಿಕೋದ್ಯಮದ ಸುತ್ತ ಸುತ್ತುವ ಕಥೆ ಎನ್ನಲಾಗುತ್ತಿದೆ. ಅಲ್ಲದೆ, ಗೋದ್ರಾ ಹತ್ಯಾಕಾಂಡದ ಕಹಾನಿಯನ್ನೂ ತಿಳಿಸಲಿದೆಯೇ ಎಂಬ ಕುತೂಹಲ ನೋಡುಗರಲ್ಲಿ ಮೂಡುವುದು ಗ್ಯಾರಂಟಿ.
ಚಿತ್ರದಲ್ಲಿ ಸತೀಶ್ ಸಮಾಜದಲ್ಲಿ ನಡೆಯುವ ಶೋಷಣೆಯ ವಿರುದ್ಧ ಬಂಡೆದ್ದ ಹೋರಾಟಗಾರನಾಗಿ ಕಾಣಿಸಿಕೊಂಡಿದ್ದಾರೆ. ಒಟ್ಟಾರೆ ಗೋದ್ರಾ ಚಿತ್ರದ ಟೀಸರ್ ನೋಡಿದ್ರೆ ಎಂಬತ್ತರ ದಶಕದಲ್ಲಿ ನಿರ್ದೇಶಕ ಕೆ ರಾಜು ಮಾಡ್ತಿದ್ದ ಸಿನಿಮಾಗಳು ನೆನಪಿಗೆ ಬರುತ್ತವೆ. ಹೊಸ ವರ್ಷದಲ್ಲಿ ರೆವಲ್ಯೂಷನ್ ಕ್ರಿಯೇಟ್ ಮಾಡೋದಕ್ಕೆ ಸತೀಶ್ ನೀನಾಸಂ ಹೊರಟಿದ್ದಾರೆ ಎನ್ನಬಹುದು. ಸಿನಿಮಾಕ್ಕೆ ನಂದೀಶ್ ನಿರ್ದೇಶನ ಮಾಡಿದ್ದು, ಸತೀಶ್ ಜೊತೆ ಮೂಗುತಿ ಸುಂದರಿ ಶ್ರದ್ದಾ ಶ್ರೀನಾಥ್ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ.
