ಸಾಲು ಸಾಲು ಚಿತ್ರಗಳಲ್ಲಿ ನಟಿಸುತ್ತಿರುವ ದೂದ್ ಪೇಡಾ ದಿಗಂತ್, ಇದೀಗ ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ ಅಂತಿದ್ದಾರೆ.
ಅರೇ.. ಇವರಿಗೇನಾಗಿದೆ. ದೊಡ್ಡ ಸ್ಟಾರ್ ಆಗಿರುವ ಇವರಲ್ಲಿ ಹಣವಿಲ್ಲವೇ ಅಂತಾ ಗೊಂದಲಕ್ಕೀಡಾಗಬೇಡಿ. ಯಾಕಂದ್ರೆ, ದಿಗಂತ್ ನಟಿಸುತ್ತಿರುವ ಸಿನಿಮಾದ ಹೆಸರು 'ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ' ಎಂದು.
ಕ್ಯೂಟ್ ಹುಡ್ಗ ದಿಗ್ಗಿ ಈಗಾಗಲೇ, ಗಾಳಿಪಟ 2, ಎವರು(ರಿಮೇಕ್) ಮಾರಿ ಗೋಲ್ಡ್, ಹುಟ್ಟು ಹಬ್ಬದ ಶುಭಾಶಯಗಳು ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಇದೀಗ ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ ಸಿನಿಮಾಕ್ಕೆ ಫೋಟೋ ಶೂಟ್ ಮಾಡಿಸಿದ್ದಾರೆ.
ಇನ್ನು ದಸರಾ ಹಬ್ಬದ ಹಿನ್ನೆಲೆಯಲ್ಲಿ ಸಿನಿಮಾದ ಪೋಸ್ಟರ್ ಬಿಡುಗಡೆ ಮಾಡಿರುವ ಚಿತ್ರತಂಡ ಟೈಟಲ್ ಮೂಲಕವೇ ಸಿನಿ ಪ್ರಿಯರಿಗೆ ಒಂಚೂರು ಕುತೂಹಲ ಹುಟ್ಟಿಸಿದೆ.
ದಿಗಂತ್ ಪಂಚೆಯುಟ್ಟು, ತಲೆಗೆ ಮಲೆನಾಡಿನ ಟೋಪಿ ತೊಟ್ಟು ಕ್ಯಾಮೆರಾಗೆ ಫೋಸ್ ಕೊಟ್ಟಿದ್ದಾರೆ. ಚಿತ್ರದಲ್ಲಿ ದಿಗಂತ್ ಅಡಿಕೆ ವ್ಯಾಪಾರಿಯಾಗಿ ಕಾಣಿಲಿದ್ದಾರಂತೆ. ಇನ್ನು, ಸಿನಿಮಾಕ್ಕೆ ವಿನಾಯಕ ಕೋಡ್ಸರ ಆ್ಯಕ್ಷನ್ ಕಟ್ ಹೇಳುತ್ತಿದ್ದು, ಸ್ಕಿಲ್ ಮಂಜು ಬಂಡವಾಳ ಹಾಕುತ್ತಿದ್ದಾರೆ.
ಚಿತ್ರದ ಬಗ್ಗೆ ಪ್ರತಿಕ್ರಿಯಿಸಿರುವ ದಿಗಂತ್, ನಾನು ಈ ಕಥೆಯನ್ನು ಮೊದಲೇ ಮಾಡಬೇಕಿತ್ತು. ಸಿನಿಮಾದಲ್ಲಿ ಮಲೆನಾಡಿನ ಪುಟ್ಟ ಹಳ್ಳಿಯಲ್ಲಿ ನಡೆಯುವ ಕೆಲ ಪ್ರಸಂಗಗಳನ್ನು ಹೇಳಲಾಗಿದೆ. ಅಲ್ಲದೆ ಸಿನಿಮಾವನ್ನು ಮಲನಾಡಿನ ಸುತ್ತಮುತ್ತಲೇ ಚಿತ್ರೀಕರಣ ಮಾಡಲು ನಿರ್ದೇಶಕರು ಪ್ಲಾನ್ ಮಾಡಿದ್ದಾರಂತೆ.
ಈ ಸಿನಿಮಾದಲ ಮತ್ತೊಂದು ವಿಶೇಷ ಏನಂದ್ರೆ ನಿಜ ಜೀವನದಲ್ಲಿಯೂ ದಂಪತಿಯಾಗಿರುವ, ಐಂದ್ರಿತಾ ರೈ ಮತ್ತು ದಿಗಂತ್ ಚಿತ್ರದಲ್ಲಿಯೂ ಜೋಡಿಯಾಗಲಿದ್ದಾರೆ. ದಿಗಂತ್ಗೆ ನಾಯಕಿಯಾಗಿ ಐಂದ್ರಿತಾ ಬಣ್ಣ ಹಚ್ಚುತ್ತಿದ್ದಾರೆ. ಸಿನಿಮಾವು ಇದೇ ನವೆಂಬರ್ನಿಂದ ಸೆಟ್ಟೇರುವ ಸಾಧ್ಯತೆಗಳಿವೆ.
