ದಯಾಳ್ ಪದ್ಮನಾಭನ್ ನಿರ್ದೇಶನದಲ್ಲಿ ಸೆಕೆಂಡ್ ಇನ್ನಿಂಗ್ಸ್ ಆರಂಭಿಸಿದ್ದು, ಅದರಲ್ಲಿ ಸಕ್ಸಸ್ ಕೂಡಾ ಆಗಿದ್ದಾರೆ. ಈ ಎರಡು ವರ್ಷಗಳಲ್ಲಿ 'ಬ್ರಿಡ್ಜ್' 'ಹಗ್ಗದ ಕೊನೆ', 'ಆ್ಯಕ್ಟರ್', 'ಆ ಕರಾಳ ರಾತ್ರಿ', 'ಪುಟ 109', 'ತ್ರಯಂಬಕಂ' ಸಿನಿಮಾಗಳನ್ನು ಅವರು ನಿರ್ದೇಶಿಸಿದ್ದಾರೆ.
ಇದೀಗ 'ರಂಗನಾಯಕಿ' ಎಂಬ ಸಿನಿಮಾವನ್ನು ಅವರು ನಿರ್ದೇಶಿಸಲು ಹೊರಟಿದ್ದಾರೆ. ಈ ಸಿನಿಮಾಗೆ ಏಪ್ರಿಲ್ 26ರಂದು ಮುಹೂರ್ತ ಜರುಗಲಿದೆ. ಹಳೆಯ ಸಿನಿಮಾ ಹೆಸರು ಮತ್ತೆ ರಿಪೀಟ್ ಆದರೂ 1981ರಲ್ಲಿ ಬಿಡುಗಡೆಯಾದ ಪುಟ್ಟಣ್ಣ ಕಣಗಾಲ್ ನಿರ್ದೇಶನದಲ್ಲಿ ಆರತಿ ಅಭಿನಯದ ಆ 'ರಂಗನಾಯಕಿ' ಸಿನಿಮಾಗೂ ಈ 'ರಂಗನಾಯಕಿ'ಗೂ ಯಾವುದೇ ವ್ಯತ್ಯಾಸ ಇಲ್ಲ. ಈ ಸಿನಿಮಾಗೆ ಅದಿತಿ ಪ್ರಭುದೇವ ನಾಯಕಿ.
ನನಗೆ ಕನ್ನಡ ಓದಲು ಬರೆಯಲು ಬರುವುದಿಲ್ಲ ಎಂದು ದಯಾಳ್ ಧೈರ್ಯವಾಗೇ ಹೇಳಿಕೊಳ್ಳುತ್ತಾರೆ. ಈ ಹಿಂದೆ ದಯಾಳ್ ತಮ್ಮ ಡಿ ಪಿಕ್ಚರ್ ಬ್ಯಾನರ್ ವತಿಯಿಂದ ಶಿವಕುಮಾರ್ ವಿರಚಿತ 'ಸುಪಾರಿ ಕೊಲೆ' ಪುಸ್ತಕವನ್ನು ಹೊರತಂದಿದ್ದರು. ಈ ಕಾದಂಬರಿ ಸ್ಫೂರ್ತಿಯಿಂದ 'ಪುಟ 109' ಸಿನಿಮಾ ನಿರ್ದೇಶಿಸಿದ್ದರು. ಇದೀಗ 'ರಂಗನಾಯಕಿ' ಕಥೆಯನ್ನು ಅವರು ಕಿರಣ್ ಹೆಮ್ಮಿಗೆ ಹಾಗೂ ವೆಂಕಟ್ ದೇವ್ ಅವರ ಕೈಯಲ್ಲಿ ಬರೆಸಿದ್ದು, ಈ ಕಾದಂಬರಿಯನ್ನು ಏಪ್ರಿಲ್ 26ರಂದು ಬಿಡುಗಡೆ ಮಾಡುತ್ತಿದ್ದಾರೆ.
ನಟ ನಿರ್ದೇಶಕ ಎಂ.ಜಿ. ಶ್ರೀನಿವಾಸ್, ಪದ್ಮಾವತಿ ಧಾರಾವಾಹಿ ನಟ ತ್ರಿವಿಕ್ರಮ್ ಹಾಗೂ ಇನ್ನಿತರರು ತಾರಾಗಣದಲ್ಲಿದ್ದಾರೆ. ಇನ್ನು ಏಪ್ರಿಲ್ 26ರಂದು 'ರಂಗನಾಯಕಿ' ಪುಸ್ತಕ ಬಿಡುಗಡೆ ಮಾಡಲು ಡಿಐಜಿ ರೂಪ ಆಗಮಿಸುತ್ತಿದ್ದಾರೆ.
