ಸೆಟ್ಟೇರಿದ ದಿನದಿಂದಲೂ ಸ್ಯಾಂಡಲ್ವುಡ್ನಲ್ಲಿ ಭರ್ಜರಿ ಸೌಂಡ್ ಮಾಡುತ್ತಿರುವ ಸಿನಿಮಾ ಎಂದರೆ 'ಭರಾಟೆ'. ರೋರಿಂಗ್ ಸ್ಟಾರ್ ಶ್ರೀ ಮುರಳಿ ಹಾಗೂ ಪಂಚಿಂಗ್ ಡೈಲಾಗ್ಗಳ ಮಾಸ್ಟರ್ ನಿರ್ದೇಶಕ ಚೇತನ್ ಕುಮಾರ್ ಕಾಂಬಿನೇಷನ್ ಇರುವ ಈ ಸಿನಿಮಾ ಕುತೂಹಲ ಹೆಚ್ಚಿಸಿದೆ.
ಸ್ಯಾಂಡಲ್ವುಡ್ ಬ್ಲಾಕ್ ಕೋಬ್ರಾ ದುನಿಯಾ ವಿಜಯ್ ಕೂಡಾ ಈ ಸಿನಿಮಾ ನೋಡಲು ಕಾತರದಿಂದ ಕಾಯುತ್ತಿದ್ದಾರಂತೆ. ಅಲ್ಲದೆ ಚಿತ್ರದ ಟ್ರೇಲರ್ ನೋಡಿ ಫಿದಾ ಆಗಿರುವ ವಿಜಯ್ 'ಭರಾಟೆ' ಭಾಗ 2 ಮಾಡಿ ಎಂದು ನಿರ್ದೇಶಕ ಚೇತನ್ಗೆ ಆಫರ್ ಮಾಡಿದ್ದಾರೆ. ಕಲಾವಿದರ ಸಂಘದಲ್ಲಿ ನಡೆದ ಭರಾಟೆ ಚಿತ್ರದ ಆ್ಯಕ್ಷನ್ ಟ್ರೇಲರ್ ಲಾಂಚ್ ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಜಂಗ್ಲಿ ಈ ಮಾತು ಹೇಳಿದ್ದಾರೆ. ಚೇತನ್ ಹಾಗೂ ರೋರಿಂಗ್ ಸ್ಟಾರ್ ಶ್ರೀ ಮುರಳಿ ಕಾಂಬಿನೇಷನ್ ಅದ್ಭುತವಾಗಿ ಮೂಡಿ ಬಂದಿದೆ. ಚೇತನ್, ಶ್ರೀ ಮುರಳಿಯನ್ನು ಬಹಳ ಕಲರ್ಫುಲ್ ಆಗಿ ತೋರಿಸಿದ್ದಾರೆ. ನಾನು, ಧನ್ವೀರ್, ದಾಲಿ ಧನಂಜಯ್, ನೀನಾಸಂ ಸತೀಶ್ ಇವರೆಲ್ಲರನ್ನೂ ಹಾಕಿಕೊಂಡು ಭರಾಟೆ-2 ಚಿತ್ರ ಮಾಡಿ. ನಾವೆಲ್ಲಾ ಆ ಚಿತ್ರದಲ್ಲಿ ಖಂಡಿತ ನಟಿಸುತ್ತೇವೆ ಎಂದು ವಿಜಯ್ ಹೇಳಿದರು. ಈ ಮಾತಿಗೆ ವೇದಿಕೆ ಮೇಲಿದ್ದ ನಟರು ನಗೆಕಡಲಲ್ಲಿ ತೇಲಿದರು. ಇನ್ನು ನಟರೆಲ್ಲಾ 'ಭರಾಟೆ' ಟೈಟಲ್ ಹಾಡಿಗೆ ಒಟ್ಟಿಗೆ ಹೆಜ್ಜೆ ಕೂಡಾ ಹಾಕಿದರು.
