ಹೈದರಾಬಾದ್: ಭಾರತದ ಸ್ಟಾರ್ ಬ್ಯಾಡ್ಮಿಂಟನ್ ತಾರೆ ಜ್ವಾಲಾ ಗುಟ್ಟಾ - ನಟ ವಿಷ್ಣು ವಿಶಾಲ್ ಇಂದು ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಕಳೆದ ಕೆಲ ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದ ಈ ಜೋಡಿ 20 ದಿನಗಳ ಹಿಂದೆ ತಾವು ಮದುವೆ ಮಾಡಿಕೊಳ್ಳುತ್ತಿರುವುದಾಗಿ ಘೋಷಣೆ ಮಾಡಿದ್ದರು.
ಇಂದು ಹೈದರಾಬಾದ್ನಲ್ಲಿ ಈ ಜೋಡಿಯ ವಿವಾಹ ಮಹೋತ್ಸವ ನಡೆದಿದೆ. ಕಳೆದ ಮೂರು ದಿನಗಳಿಂದ ಅರಿಶಿನ ಶಾಸ್ತ್ರ, ಮೆಹಂದಿ ಸಮಾರಂಭ ಹಾಗೂ ಸಂಗೀತ ಕಾರ್ಯಕ್ರಮ ನಡೆದಿದ್ದು, ಇಂದು ಅದ್ಧೂರಿಯಾಗಿ ವಿವಾಹ ಮುಹೂರ್ತ ನೆರವೇರಿದೆ.
ಮದುವೆ ಸಂಭ್ರಮದ ವೇಳೆ ಕಿತ್ತಳೆ ಬಣ್ಣದ ಸೀರೆ ಹಾಕಿಕೊಂಡು ಜ್ವಾಲಾಗುಟ್ಟಾ ಕಂಗೊಳಿಸಿದ್ದು, ಅರಿಶಿನ ಶಾಸ್ತ್ರದಲ್ಲಿ ಹಳದಿ ಬಣ್ಣದ ಸೀರೆ ಹಾಕಿಕೊಂಡಿದ್ದರು. ಇನ್ನು ವಿಷ್ಣು ವಿಶಾಲ್ ನೀಲಿ ಬಣ್ಣದ ಶೇರ್ವಾನಿ ತೊಟ್ಟಿದ್ದರು.
ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿರುವ ಜೋಡಿಯ ಕೆಲವೊಂದು ಫೋಟೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡ್ತಿದ್ದು, ಅನೇಕರು ಇವರ ಮದುವೆಗೆ ವಿಶ್ ಮಾಡಿದ್ದಾರೆ. ಈ ಜೋಡಿ ಕಳೆದ ಸೆಪ್ಟೆಂಬರ್ ತಿಂಗಳಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಇನ್ನು ವಿಷ್ಣು ವಿಶಾಲ್ ಹಾಗೂ ಕೆ. ನಟರಾಜ್ ಪುತ್ರಿ ರಜನಿ ಪರಸ್ಪರ ಪ್ರೀತಿಸಿ 2010ರಲ್ಲಿ ವಿವಾಹವಾಗಿದ್ದರು. ಆದರೆ ಕಾರಣಾಂತರಗಳಿಂದ 2018ರಲ್ಲಿ ಈ ಜೋಡಿ ಬೇರ್ಪಟ್ಟಿತ್ತು.
