ಮುಂಬೈ: ಬಹುಭಾಷಾ ನಟಿ ರಶ್ಮಿಕಾ ಮಂದಣ್ಣ ಬಾಲಿವುಡ್ಗೆ ಪದಾರ್ಪಣೆ ಮಾಡಿದ್ದಾರೆ. ಇನ್ನು ಮಾರ್ಚ್ 4 ರಿಂದ ಬಾಲಿವುಡ್ನ ತಮ್ಮ ಚೊಚ್ಚಲ ಚಿತ್ರ 'ಮಿಷನ್ ಮಜ್ನು' ಶೂಟಿಂಗ್ ಪ್ರಾರಂಭಿಸಲಿದ್ದಾರೆ. ಈ ಚಿತ್ರದಲ್ಲಿ ಸಿದ್ಧಾರ್ಥ್ ಮಲ್ಹೋತ್ರಾ ಅವರೊಂದಿಗೆ ಕಾಣಿಸಿಕೊಳ್ಳಲಿದ್ದಾರೆ.
ಸಿದ್ಧಾರ್ಥ್ ಮಲ್ಹೋತ್ರಾ ಅವರೊಂದಿಗೆ ಚಿತ್ರೀಕರಣ ಪ್ರಾರಂಭಿಸಲು ರಶ್ಮಿಕಾ ಲಖನೌಗೆ ಆಗಮಿಸಲಿದ್ದಾರೆ ಎಂದು ಆಪ್ತ ಮೂಲಗಳು ತಿಳಿಸಿವೆ. ಇದು ಥ್ರಿಲ್ಲರ್ ಸಿನಿಮಾ ಆಗಿದ್ದು, ದಕ್ಷಿಣ ಭಾರತದ ತಾರೆ ಈ ಪ್ರಕಾರದಲ್ಲಿ ಕೆಲಸ ಮಾಡುವುದು ಇದೇ ಮೊದಲು. ತೆಲುಗು ಚಿತ್ರರಂಗದಲ್ಲಿ ಗೀತ ಗೋವಿಂದಂ ಮತ್ತು ಸರಿಲೇರು ನೀಕೆವರು ಹಿಟ್ ಸಿನಿಮಾದಲ್ಲಿ ನಟಿಸಿ ಜನಮೆಚ್ಚುಗೆ ಗಳಿಸಿದ ನಟಿ ರಶ್ಮಿಕಾ ಮಂದಣ್ಣ.
ಇತ್ತೀಚೆಗೆ, ಅವರು ರ‍್ಯಾಪರ್ ಬಾದ್‌ಶಾ ಅವರ ಹೊಸ ಟ್ರ್ಯಾಕ್, ಟಾಪ್ ಟಕರ್‌ನಲ್ಲಿ ಕಾಣಿಸಿಕೊಂಡಿದ್ದರು. ಈ ಮಧ್ಯೆ, ಬಾಲಿವುಡ್ನಲ್ಲಿ ಅವಕಾಶ ದೊರೆಯುತ್ತಿದ್ದಂತೆ ರಶ್ಮಿಕಾ ಇತ್ತೀಚೆಗೆ ಮುಂಬೈನಲ್ಲಿ ಒಂದು ಮನೆಯನ್ನು ಖರೀದಿಸಿದರು.
ಸದ್ಯ ರಶ್ಮಿಕಾ ಅಭಿಮಾನಿಗಳು "ನ್ಯಾಷನಲ್ ಕ್ರಷ್" ಎಂದು ಈಕೆಯನ್ನು ಹೆಸರಿಸಿದ್ದಾರೆ. ಇನ್ನು ತೆಲುಗಿನ ಅಲ್ಲು ಅರ್ಜುನ್ ಅಭಿನಯದ 'ಪುಷ್ಪಾ' ಸಿನಿಮಾದಲ್ಲೂ ರಶ್ಮಿಕಾ ನಟಿಸಿದ್ದಾರೆ. ಈ ಚಿತ್ರ ಶೀಘ್ರದಲ್ಲೇ ಬಿಡುಗಡೆಗೊಳ್ಳಲಿದೆ.
