ಸ್ಯಾನ್ ಡಿಯೆಗೊ (ಕ್ಯಾಲಿಫೋರ್ನಿಯಾ) : ಮಾನವನ ಮೆದುಳು ವಿಷಯಗಳನ್ನು ಯಾವ ರೀತಿಯಲ್ಲಿ ಗ್ರಹಿಸುತ್ತದೆಯೋ ಅದೇ ರೀತಿಯಲ್ಲಿ ಕೃತಕ ಬುದ್ಧಿಮತ್ತೆ (ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ -ಎಐ) ತಂತ್ರಜ್ಞಾನ ಕೂಡ ಮಾಹಿತಿಗಳನ್ನು ಗ್ರಹಿಸಿ ಅರ್ಥ ಮಾಡಿಕೊಳ್ಳುತ್ತದೆ ಎಂಬುದನ್ನು ಬರ್ಕ್ ಲೀ ಯ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾನಿಲಯದ ಸಂಶೋಧಕರು ಕಂಡು ಹಿಡಿದಿದ್ದಾರೆ. ಎಐ ವ್ಯವಸ್ಥೆಯ ಬ್ಲ್ಯಾಕ್ ಬಾಕ್ಸ್ ಹೇಗೆ ಕೆಲಸ ಮಾಡುತ್ತದೆ ಎಂಬುದನ್ನು ತಿಳಿಯುವ ನಿಟ್ಟಿನಲ್ಲಿ ಈ ಸಂಶೋಧನೆ ಬಹಳ ಮಹತ್ವದ್ದಾಗಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಬರ್ಕ್ಲೀ ಸ್ಪೀಚ್ ಅಂಡ್ ಕಂಪ್ಯೂಟೇಶನ್ ಲ್ಯಾಬ್‌ನ ಸಂಶೋಧಕರು ನಡೆಸಿದ ಪ್ರಯೋಗ ಹೀಗಿತ್ತು: ಸಂಶೋಧನೆಯಲ್ಲಿ ಪಾಲ್ಗೊಂಡಿದ್ದವರ ತಲೆಯ ಮೇಲೆ ಎಲೆಕ್ಟ್ರೋಡ್ಗಳನ್ನು ಅಳವಡಿಸಲಾಗಿತ್ತು. ಅವರಿಗೆ bah ಎಂಬ ಒಂದೇ ಒಂದು ಶಬ್ದವನ್ನು ಕೇಳಿಸಿದಾಗ ಅವರ ಮೆದುಳಿನ ತರಂಗಗಳನ್ನು ದಾಖಲಿಸಲಾಯಿತು. ಇದೇ ರೀತಿಯಲ್ಲಿ ಇಂಗ್ಲಿಷ್ ಭಾಷೆಯನ್ನು ಅರ್ಥ ಮಾಡಿಕೊಳ್ಳಬಲ್ಲ ಎಐ ತಂತ್ರಜ್ಞಾನ ವ್ಯವಸ್ಥೆಗೆ ಇದೇ ಶಬ್ದವನ್ನು ಕೇಳಿಸಲಾಯಿತು ಹಾಗೂ ಅದರ ಪ್ರತಿಕ್ರಿಯೆಯ ಅಲೆಗಳನ್ನು ದಾಖಲಿಸಲಾಯಿತು. ನಂತರ ಎರಡನ್ನೂ ಹೋಲಿಸಿ ನೋಡಿದಾಗ, ಎರಡೂ ಅಲೆಗಳ ವಿನ್ಯಾಸಗಳು ಬಹುತೇಕ ಒಂದೇ ರೀತಿಯದ್ದಾಗಿದ್ದವು.
ಈ ಬಗ್ಗೆ ಮಾತನಾಡಿದ ಸಂಶೋಧನಾ ವರದಿಯ ಪ್ರಮುಖ ಲೇಖಕರಾದ ಗಾಸ್ಪರ್ ಬೇಗಸ್, ಎರಡೂ ಆಕಾರಗಳು ಆಶ್ಚರ್ಯಕರ ಎನಿಸುವಷ್ಟು ಒಂದೇ ರೀತಿಯಾಗಿವೆ, ಎರಡೂ ವ್ಯವಸ್ಥೆಗಳು ಒಂದು ವಿಷಯವನ್ನು ಎನ್ಕೋಡ್ ಮಾಡುವ ವಿಧಾನಗಳು ಒಂದೇ ರೀತಿಯಾಗಿವೆ ಎಂಬುದನ್ನು ಇದು ತೋರಿಸುತ್ತದೆ ಎಂದರು. ಗಾಸ್ಪರ್ ಬೇಗಸ್ ಬರ್ಕ್ಲೀ ವಿಶ್ವ ವಿದ್ಯಾಲಯದಲ್ಲಿ ಭಾಷಾಶಾಸ್ತ್ರದ ಸಹಾಯಕ ಪ್ರಾಧ್ಯಾಪಕ ಹಾಗೂ Scientific Reports ಹೆಸರಿನ ಜರ್ನಲ್ನಲ್ಲಿ ಪ್ರಕಟವಾದ ಈ ವರದಿಯ ಲೇಖಕರೂ ಆಗಿದ್ದಾರೆ.
ಎಐ ತಂತ್ರಜ್ಞಾನಗಳು ಇತ್ತೀಚಿನ ದಿನಗಳಲ್ಲಿ ಎಷ್ಟೋ ಪಟ್ಟು ಅಗಾಧವಾಗಿ ಬೆಳವಣಿಗೆ ಹೊಂದಿವೆ. ಕಳೆದ ವರ್ಷಾಂತ್ಯದಲ್ಲಿ ಚಾಟ್ ಜಿಪಿಟಿ ಯುಗ ಆರಂಭವಾದ ನಂತರ, ಜಗತ್ತಿನಲ್ಲಿ ಕ್ರಾಂತಿಕಾರಕ ಬದಲಾವಣೆಗಳಾಗಬಹುದು ಎಂಬ ಮಾತುಗಳು ಕೇಳಿ ಬಂದಿದ್ದವು. ಆದರೆ ತಾವು ತಂತ್ರಜ್ಞಾನವನ್ನು ದೊಡ್ಡ ಮಟ್ಟಕ್ಕೆ ಬೆಳೆಸಿದಾಗ ಎಐ ತಂತ್ರಜ್ಞಾನಗಳು ಇನ್ಪುಟ್ ಮತ್ತು ಔಟ್ಪುಟ್ ವಿಚಾರದಲ್ಲಿ ನಿರ್ದಿಷ್ಟವಾಗಿ ಹೇಗೆ ಕೆಲಸ ಮಾಡುತ್ತವೆ ಎಂಬುದರ ಬಗ್ಗೆ ವಿಜ್ಞಾನಿಗಳಿಗೆ ಖಚಿತತೆ ಇರಲಿಲ್ಲ.
ಪ್ರಶ್ನೆಗಳನ್ನು ಕೇಳುವುದು ಹಾಗೂ ಅದು ನೀಡುವ ಉತ್ತರಗಳನ್ನು ಆಧರಿಸಿ ನಿರ್ದಿಷ್ಟ ಚಾಟ್ ಜಿಪಿಟಿ ತಂತ್ರಜ್ಞಾನವೊಂದು ಎಷ್ಟು ಬುದ್ಧಿವಂತವಾಗಿದೆ ಮತ್ತು ಅದು ಎಷ್ಟು ಪಕ್ಷಪಾತಿಯಾಗಿದೆ ಎಂಬುದನ್ನು ನಿರ್ಧರಿಸಲಾಗುತ್ತಿತ್ತು. ಆದರೆ ಈ ಎರಡು ಹಂತಗಳ ಮಧ್ಯೆ ಏನು ನಡೆಯುತ್ತದೆ ಎಂಬುದು ಮಾತ್ರ ಗೋಚರವಾಗದ ಸಂಗತಿಯಾಗಿತ್ತು. ಇದನ್ನೇ ವಿಜ್ಞಾನಿಗಳು ಬ್ಲ್ಯಾಕ್ ಬಾಕ್ಸ್ ಪ್ರಕ್ರಿಯೆ ಎಂದು ಕರೆಯುತ್ತಾರೆ.
ಎಐ ತಂತ್ರಜ್ಞಾನಗಳು ನಿರ್ದಿಷ್ಟ ಮಾಹಿತಿಯನ್ನು ನೀಡುತ್ತವೆ ಎಂದಾಗ, ಅದೇ ಮಾಹಿತಿಯನ್ನು ಹೇಗೆ ಮತ್ತು ಯಾಕೆ ನೀಡಿದವು, ಅವು ಹೇಗೆ ಕಲಿಯುತ್ತವೆ ಎಂಬ ವಿಚಾರಗಳನ್ನು ತಿಳಿಯುವುದು ಬಹಳ ಮುಖ್ಯವಾಗುತ್ತದೆ. ಆರೋಗ್ಯ ಕ್ಷೇತ್ರದಿಂದ ಹಿಡಿದು ಶಿಕ್ಷಣದವರೆಗೆ ಎಲ್ಲ ಕ್ಷೇತ್ರಕ್ಕೂ ಎಐ ವ್ಯಾಪಿಸುತ್ತಿರುವುದರಿಂದ ಅವನ್ನು ತಿಳಿದುಕೊಳ್ಳುವುದು ಅಗತ್ಯವಾಗಿದೆ. ಎಐ ತಂತ್ರಜ್ಞಾನದ ಒಳ ಹೊರಗುಗಳನ್ನು ತಿಳಿಯಲು ಬೇಗಸ್ ಮತ್ತು ಅವರ ಸಹವರ್ತಿಗಳು ಸೇರಿದಂತೆ, ಜಾನ್ಸ್ ಹಾಪ್ಕಿನ್ಸ್ ಯುನಿವರ್ಸಿಟಿಯ ಅಲಾನ್ ಝೋ ಮತ್ತು ವಾಶಿಂಗ್ಟನ್ ಯುನಿವರ್ಸಿಟಿಯ ಟಿ ಕ್ರಿಸ್ಟಿನಾ ಝಾವೊ ಕೂಡ ಕೆಲಸ ಮಾಡುತ್ತಿದ್ದಾರೆ.
ಇದನ್ನೂ ಓದಿ : ಫೋನ್ ಬಿಟ್ಟಿರಲು ಆಗಲ್ವಾ? ಹಾಗಾದ್ರೆ ನಿಮಗೂ ನೋಮೋಫೋಬಿಯಾ ಇರಬಹುದು!
