ಭಾರತದ ಸ್ಮಾರ್ಟ್‌ಫೋನ್ ಬಳಕೆದಾರರಿಗೆ 5ಜಿ ಅನುಭವ ನೀಡಲು ಒನ್ ಪ್ಲಸ್ ಸಜ್ಜು

ಭಾರತವು 5ಜಿ ಬಿಡುಗಡೆಯತ್ತ ಸಾಗುತ್ತಿರುವಾಗ ಒನ್​ಪ್ಲಸ್​ ಬಳಕೆದಾರರು ಸಹ ಉತ್ತಮ ಸಾಧನಗಳೊಂದಿಗೆ ತಡೆರಹಿತ ಹಾಗೂ ವೇಗದ ಇಂಟರ್​ನೆಟ್ ಅನುಭವವನ್ನು ಆನಂದಿಸುತ್ತಾರೆ ಎಂದು ಒನ್ ಪ್ಲಸ್​ನ ಭಾರತದ ಸಿಇಒ ನವನೀತ್ ನಕ್ರಾ ತಿಳಿಸಿದ್ದಾರೆ.

ಬೆಂಗಳೂರು: ಭಾರತದಲ್ಲಿ ಒನ್ ಪ್ಲಸ್​ ಬಳಕೆದಾರರಿಗೆ 5ಜಿ ತಂತ್ರಜ್ಞಾನ ವ್ಯವಸ್ಥೆಯನ್ನು ತರಲು ಯಶಸ್ವಿಯಾಗಿ ಸಜ್ಜಾಗಿರುವುದಾಗಿ ಜಾಗತಿಕ ಸ್ಮಾರ್ಟ್‌ಫೋನ್ ಬ್ರ್ಯಾಂಡ್ ಆಗಿರುವ ಒನ್ ಪ್ಲಸ್​ (OnePlus) ಹೇಳಿದೆ. ಜೊತೆಗೆ ಇತ್ತೀಚೆಗೆ ಬಿಡುಗಡೆ ಮಾಡಿರುವ ಸಾಧನಗಳು ಸಹ ವಿಐ (Vi) ಸೇರಿದಂತೆ ಅರ್ಹ ನೆಟ್‌ವರ್ಕ್‌ಗಳೊಂದಿಗೆ 5ಜಿ ಸಿದ್ಧವಾಗಿದೆ ಎಂದು ದೃಢಪಡಿಸಿದೆ.

5ಜಿಯ ಸಾಮರ್ಥ್ಯವನ್ನು ಬಹಳ ಮುಂಚೆಯೇ ಒನ್ ಪ್ಲಸ್​ ಗುರುತಿಸಿದೆ. 2016ರಲ್ಲೇ 5ಜಿ ಸಂಶೋಧನೆಯ ಪ್ರಯತ್ನಗಳನ್ನು ಪ್ರಾರಂಭಿಸಿತ್ತು. ಜಾಗತಿಕವಾಗಿ ಬಳಕೆದಾರರಿಗೆ 5ಜಿ ಸೇವೆ ನೀಡಿದ ಟೆಕ್ ಕಂಪನಿಗಳಲ್ಲಿ ಒನ್ ಪ್ಲಸ್​ ಕೂಡ ಒಂದಾಗಿದೆ. ಜಗತ್ತಿನಾದ್ಯಂತ ಗ್ರಾಹಕರಿಗೆ 5ಜಿ ಸೇವೆ ಒದಗಿಸುವಲ್ಲಿ ಅತ್ಯಂತ ವೇಗವಾಗಿ ಕೆಲಸ ಮಾಡಿದೆ ಎಂದು ಸಂಸ್ಥೆ ತಿಳಿಸಿದೆ.

ಈಗ ಭಾರತವು 5ಜಿಯತ್ತ ಸಾಗುತ್ತಿರುವಾಗ ಒನ್​ಪ್ಲಸ್​ ಬಳಕೆದಾರರು ಸಹ ಉತ್ತಮ ಸಾಧನಗಳೊಂದಿಗೆ ತಡೆ ರಹಿತ ಹಾಗೂ ವೇಗದ ಇಂಟರ್​ನೆಟ್ ಅನುಭವವನ್ನು ಆನಂದಿಸುತ್ತಾರೆ. ಜೊತೆಗೆ ತಮ್ಮ ದೈನಂದಿನ ಸ್ಮಾರ್ಟ್‌ಫೋನ್‌ಗಳ ಬಳಕೆಗಿಂತ ಹಾಗೂ ತಾವು ಊಹಿಸಿದ್ದಕ್ಕಿಂತ ಗ್ರಾಹಕರು ಹೆಚ್ಚಿನ ವೇಗದ ಇಂಟರ್​ನೆಟ್ ಪಡೆಯುತ್ತಾರೆ ಎಂದು ಒನ್ ಪ್ಲಸ್​ನ ಭಾರತದ ಸಿಇಒ ನವನೀತ್ ನಕ್ರಾ ತಿಳಿಸಿದ್ದಾರೆ.

ಒನ್ ಪ್ಲಸ್8 ಸರಣಿಯೊಂದಿಗೆ 2020ರಲ್ಲಿ ಭಾರತದಲ್ಲಿ 5ಜಿ ಸ್ಮಾರ್ಟ್‌ಫೋನ್‌ಗಳನ್ನು ಬಿಡುಗಡೆ ಮಾಡಲಾಗಿತ್ತು. ಅಂದಿನಿಂದ ಒನ್ ಪ್ಲಸ್​ನ ಎಲ್ಲ ಸ್ಮಾರ್ಟ್‌ಫೋನ್‌ಗಳು 5ಜಿ ಸಿದ್ಧವಾಗಿವೆ. ಇದರಲ್ಲಿ OnePlus Nord CE 2 Lite 5G ಬ್ರ್ಯಾಂಡ್‌ ಅತ್ಯಂತ ಕೈಗೆಟುಕುವ ಸಾಧನವಾಗಿದೆ. ಭಾರತದಲ್ಲಿ 19,999 ರೂಪಾಯಿಗೆ ಈ ಸ್ಮಾರ್ಟ್‌ಫೋನ್‌ ಸಿಗಲಿದೆ. ಈ ವರ್ಷ ಆನ್‌ಲೈನ್​ನಲ್ಲಿ 20,000 ರೂ. ಹಾಗೂ 30,000 ರೂ. ಬೆಲೆಗೆ ಲಭ್ಯವಿರುವ ಪ್ರಮುಖ 5G ಸ್ಮಾರ್ಟ್‌ಫೋನ್ ಬ್ರ್ಯಾಂಡ್ ಆಗಿ ಒನ್ ಪ್ಲಸ್ ಹೊರಹೊಮ್ಮಿದೆ.

ಇದನ್ನೂ ಓದಿ: ವಿಡಿಯೋ ವೀಕ್ಷಣೆ ಉತ್ತಮವಾಗಿಸಲು 2 ಹೊಸ ವೈಶಿಷ್ಟ್ಯತೆ ಪರಿಚಯಿಸಿದ ಟ್ವಿಟರ್