ವಾಷಿಂಗ್ಟನ್ : ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ಸೋಮವಾರ ಚಂದ್ರನತ್ತ ಮತ್ತೊಂದು ಬಾಹ್ಯಾಕಾಶ ನೌಕೆ ಉಡಾವಣೆ ಮಾಡುವ ಮೂಲಕ 2024ರ ಹೊಸ ವರ್ಷವನ್ನು ಆರಂಭಿಸಲಿದೆ. ಸೋಮವಾರ ಆಸ್ಟ್ರೋಬೋಟಿಕ್ನ ಪೆರೆಗ್ರಿನ್ ಲ್ಯಾಂಡರ್ ಆಗಿರುವ, ಆಸ್ಟ್ರೋಬೋಟಿಕ್ ಪೆರೆಗ್ರಿನ್ ಮಿಷನ್ ಒನ್ ಎಂದು ಹೆಸರಿಸಲಾಗಿರುವ ಬಾಹ್ಯಾಕಾಶ ನೌಕೆಯ ಮೂಲಕ ಐದು ಪೇಲೋಡ್ಗಳನ್ನು ಚಂದ್ರನ ಮೇಲೆ ಕಳುಹಿಸಲು ನಾಸಾ ಸಜ್ಜಾಗಿದೆ. 2018 ರಲ್ಲಿ ಪ್ರಾರಂಭವಾದ ಸಿಎಲ್ಪಿಎಸ್ ಉಪಕ್ರಮದ ಮೂಲಕ ನಾಸಾ ಪೇಲೋಡ್ಗಳನ್ನು ಚಂದ್ರನ ಮೇಲೆ ಸಾಗಿಸಲು ಅರ್ಹವಾದ 14 ಕಂಪನಿಗಳ ಪೈಕಿ ಆಸ್ಟ್ರೋಬೋಟಿಕ್ ಕೂಡ ಒಂದಾಗಿದೆ.
ನಾಸಾದ ಸಿಎಲ್ಪಿಎಸ್ (ಕಮರ್ಷಿಯಲ್ ಲೂನಾರ್ ಪೇಲೋಡ್ ಸರ್ವೀಸಸ್) ಉಪಕ್ರಮದ ಅಡಿಯಲ್ಲಿ ಫ್ಲೋರಿಡಾದ ಕೇಪ್ ಕೆನವೆರಾಲ್ನಿಂದ ಯುನೈಟೆಡ್ ಲಾಂಚ್ ಅಲೈಯನ್ಸ್ ವಲ್ಕನ್ ರಾಕೆಟ್ ಮೂಲಕ ನೌಕೆ ಉಡಾವಣೆಯಾಗಲಿದೆ.
ನಾಸಾ ಪೇಲೋಡ್ಗಳು ಚಂದ್ರನ ಮೇಲೆ ನೀರಿನ ಅಣುಗಳನ್ನು ಪತ್ತೆಹಚ್ಚುವ, ಲ್ಯಾಂಡರ್ ಸುತ್ತಲಿನ ವಿಕಿರಣ ಮತ್ತು ಅನಿಲಗಳನ್ನು ಅಳೆಯುವ ಮತ್ತು ಚಂದ್ರನ ಬಾಹ್ಯಗೋಳವನ್ನು (ಚಂದ್ರನ ಮೇಲ್ಮೈಯಲ್ಲಿರುವ ಅನಿಲಗಳ ತೆಳುವಾದ ಪದರ) ಮೌಲ್ಯಮಾಪನ ಮಾಡುವ ಗುರಿಯನ್ನು ಹೊಂದಿವೆ. ಈ ಸಂಶೋಧನೆಗಳು ಸೌರ ವಿಕಿರಣವು ಚಂದ್ರನ ಮೇಲ್ಮೈಯೊಂದಿಗೆ ಹೇಗೆ ವರ್ತಿಸುತ್ತದೆ ಎಂಬುದರ ಬಗ್ಗೆ ನಮ್ಮ ತಿಳುವಳಿಕೆಯನ್ನು ಸುಧಾರಿಸುತ್ತದೆ ಎಂದು ಬಾಹ್ಯಾಕಾಶ ಸಂಸ್ಥೆ ಹೇಳಿಕೆಯಲ್ಲಿ ತಿಳಿಸಿದೆ.
2026 ರಲ್ಲಿ ಗ್ರುಯಿಥುಸೆನ್ ಡೋಮ್ಗಳಲ್ಲಿ ಇಳಿಯಲಿರುವ ನಾಸಾದ ಲೂನಾರ್-ವಿಐಎಸ್ಇ (ಲೂನಾರ್ ವಲ್ಕನ್ ಇಮೇಜಿಂಗ್ ಮತ್ತು ಸ್ಪೆಕ್ಟ್ರೋಸ್ಕೋಪಿ ಎಕ್ಸ್ಪ್ಲೋರರ್) ಉಪಕರಣ ಸೂಟ್ಗೆ ಅಗತ್ಯವಾದ ಡೇಟಾವನ್ನು ಈ ಪೇಲೋಡ್ಗಳು ಒದಗಿಸಲಿವೆ. ಪೆರೆಗ್ರಿನ್ ಲ್ಯಾಂಡರ್ ಫೆಬ್ರವರಿ 23 ರಂದು ಚಂದ್ರನ ಹತ್ತಿರದ ಬದಿಯಲ್ಲಿರುವ ಗಟ್ಟಿಯಾದ ಲಾವಾ ಗ್ರುಯಿಥುಸೆನ್ ಗುಮ್ಮಟಗಳ ಹೊರಗಿನ ಚಂದ್ರನ ಪ್ರದೇಶವಾದ ಸೈನಸ್ ವಿಸ್ಕೋಸಿಟಾಟಿಸ್ನಲ್ಲಿ ಇಳಿಯುವ ಗುರಿಯನ್ನು ಹೊಂದಿದೆ.
"ಈ ಕನಸು ನನಸಾಗುವುದನ್ನು ನೋಡಲು ನಾವು ತುಂಬಾ ಉತ್ಸುಕರಾಗಿದ್ದೇವೆ. ಸಿಎಲ್ಪಿಎಸ್ ಇದು ಚಂದ್ರನ ಮೇಲೆ ಪ್ರಮುಖ ವಿಜ್ಞಾನ ಮತ್ತು ತಂತ್ರಜ್ಞಾನ ಪೇಲೋಡ್ಗಳನ್ನು ಕಳುಹಿಸುವಲ್ಲಿ ಅಮೆರಿಕದ ಕಂಪನಿಗಳು ಭಾಗಿಯಾಗುವ ಹೊಸ ಮಾರ್ಗವಾಗಿದೆ" ಎಂದು ವಾಷಿಂಗ್ಟನ್ನಲ್ಲಿರುವ ನಾಸಾ ಪ್ರಧಾನ ಕಚೇರಿಯ ಸೈನ್ಸ್ ಮಿಷನ್ ಡೈರೆಕ್ಟರೇಟ್ನ ಸಹಾಯಕ ಆಡಳಿತಾಧಿಕಾರಿ ನಿಕೋಲಾ ಫಾಕ್ಸ್ ಹೇಳಿದರು. "ಚಂದ್ರ ವೈಜ್ಞಾನಿಕ ಸಂಶೋಧನೆಯ ಶ್ರೀಮಂತ ತಾಣವಾಗಿದೆ. ಚಂದ್ರನ ಪರಿಸರ ಅಧ್ಯಯನ ಮಾಡುವುದು ನಮ್ಮ ಸೌರವ್ಯೂಹದ ಕೆಲ ದೊಡ್ಡ ರಹಸ್ಯಗಳನ್ನು ಬಿಚ್ಚಿಡಲು ನಾಸಾಗೆ ಸಹಾಯ ಮಾಡುತ್ತದೆ" ಎಂದು ಫಾಕ್ಸ್ ತಿಳಿಸಿದರು.
ಇದನ್ನೂ ಓದಿ : ಬ್ರೌಸಿಂಗ್ ವೇಳೆ ಡೇಟಾ ಟ್ರ್ಯಾಕಿಂಗ್ ಕುಕೀಸ್‌ಗೆ ಗೂಗಲ್ ನಿರ್ಬಂಧ
