ಸ್ಯಾನ್ ಫ್ರಾನ್ಸಿಸ್ಕೋ: ಜಗತ್ತಿನ ಖ್ಯಾತ ಜಾಹೀರಾತು ಪ್ಲಾಟ್ ಫಾರ್ಮ್ ಗೂಗಲ್ ಆಡ್ ಸೆನ್ಸ್ ಇನ್ನು ಮುಂದೆ ಪೇ-ಪರ್-ಕ್ಲಿಕ್ (pay-per-click) ನಿಂದ ಪೇ-ಪರ್-ಇಂಪ್ರೆಷನ್ (pay-per-impression) ಮಾದರಿಗೆ ಪರಿವರ್ತನೆಯಾಗಲಿದೆ ಎಂದು ಘೋಷಿಸಿದೆ. ಅಂದರೆ ಬಳಕೆದಾರರು ಜಾಹೀರಾತನ್ನು ನೋಡಿದಾಗಲೆಲ್ಲ ಅದನ್ನು ಪ್ರದರ್ಶಿಸಿದ ಪ್ರಕಾಶಕರಿಗೆ ಆದಾಯ ಸಿಗಲಿದೆ. ಈ ಬದಲಾವಣೆಯು ಮುಂದಿನ ವರ್ಷದ ಆರಂಭದಿಂದ ಜಾರಿಗೆ ಬರಬಹುದು ಎಂದು ಕಂಪನಿ ನಿರೀಕ್ಷಿಸಿದ್ದು, ಈ ಬದಲಾವಣೆಗಳಿಗೆ ಪ್ರಕಾಶಕರು ತಮ್ಮ ಕಡೆಯಿಂದ ಯಾವುದೇ ವಿಶೇಷ ಕ್ರಮ ತೆಗೆದುಕೊಳ್ಳುವ ಅಗತ್ಯವಿಲ್ಲ ಎಂದು ಗೂಗಲ್ ಹೇಳಿದೆ.
"ಆಡ್ ಸೆನ್ಸ್ ನಲ್ಲಿ ಈವರೆಗೆ ಇದ್ದ ಪ್ರತಿ ಕ್ಲಿಕ್ಗೆ ಪ್ರಕಾಶಕರಿಗೆ ಹಣ ಪಾವತಿಸುವ ಮಾದರಿಯು ಪ್ರತಿ ಇಂಪ್ರೆಷನ್ಗೆ ಹಣ ಪಾವತಿಸುವ ಮಾದರಿಗೆ ಶೀಘ್ರದಲ್ಲೇ ಬದಲಾಗಲಿದೆ" ಎಂದು ಗೂಗಲ್ ಬ್ಲಾಗ್ ಪೋಸ್ಟ್ನಲ್ಲಿ ತಿಳಿಸಿದೆ. "ಈ ಬದಲಾವಣೆಯು ಗೂಗಲ್ನ ಉತ್ಪನ್ನಗಳು ಮತ್ತು ಥರ್ಡ್ ಪಾರ್ಟಿ ಪ್ಲಾಟ್ಫಾರ್ಮ್ಗಳಲ್ಲಿ ತಮ್ಮ ಆಡ್ ಸ್ಪೇಸ್ಗಳಿಗಾಗಿ ಪ್ರಕಾಶಕರಿಗೆ ಹೆಚ್ಚು ಏಕರೂಪದಲ್ಲಿ ಹಣ ಪಾವತಿಸಲು ಮತ್ತು ಅವರು ಬಳಸುವ ಇತರ ತಂತ್ರಜ್ಞಾನ ಪೂರೈಕೆದಾರರೊಂದಿಗೆ ಹೋಲಿಸಲು ಸಹಾಯ ಮಾಡುತ್ತದೆ" ಎಂದು ಅದು ಹೇಳಿದೆ.
ಹೊಸ ಬದಲಾವಣೆಯು ಪ್ರಕಾಶಕರು ತಮ್ಮ ವೆಬ್ಸೈಟ್ಗಳಲ್ಲಿ ಪ್ರದರ್ಶಿಸಬಹುದಾದ ಜಾಹೀರಾತುಗಳ ಪ್ರಕಾರ ಅಥವಾ ಪ್ರಮಾಣದ ಮೇಲೆ ಪ್ರಭಾವ ಬೀರುವುದಿಲ್ಲ ಎಂದು ಗೂಗಲ್ ಹೇಳಿದೆ. ಪ್ರಕಾಶಕರು ಹಣಗಳಿಸಲು ಬಳಸುವ ವಿವಿಧ ತಂತ್ರಜ್ಞಾನಗಳಾದ್ಯಂತ ವಿಭಿನ್ನ ಶುಲ್ಕಗಳನ್ನು ಹೋಲಿಸಲು ಸ್ಥಿರವಾದ ಮಾರ್ಗವನ್ನು ಒದಗಿಸಲು ಗೂಗಲ್ ಆಡ್ಸೆನ್ಸ್ ಆದಾಯ-ಹಂಚಿಕೆ ರಚನೆಯನ್ನು ನವೀಕರಿಸಿದೆ.
ಈ ಹಿಂದೆ, ಗೂಗಲ್ ಆಡ್ಸೆನ್ಸ್ ನೆಟ್ವರ್ಕ್ ಒಂದೇ ವಹಿವಾಟಿನಲ್ಲಿ ಶುಲ್ಕವನ್ನು ಪ್ರಕ್ರಿಯೆಗೊಳಿಸುತ್ತಿತ್ತು. ಆದರೆ ಕಂಪನಿಯು ಈಗ ಆಡ್ಸೆನ್ಸ್ ಆದಾಯದ ಪಾಲನ್ನು ಖರೀದಿ-ಬದಿ (buy-side) ಮತ್ತು ಮಾರಾಟ-ಬದಿಗೆ (sell-side) ಪ್ರತ್ಯೇಕ ದರಗಳಾಗಿ ವಿಂಗಡಿಸುತ್ತಿದೆ.
"ಹೊಸ ನಿಯಮದ ಪ್ರಕಾರ ಯಾವುದೇ ಕಂಟೆಂಟ್ನಲ್ಲಿ ಆಡ್ಸೆನ್ಸ್ ನೊಂದಿಗೆ ಜಾಹೀರಾತು ಪ್ರದರ್ಶಿಸಿದಾಗ ಜಾಹೀರಾತು ಪ್ಲಾಟ್ಫಾರ್ಮ್ ತನ್ನ ಶುಲ್ಕವನ್ನು ತೆಗೆದುಕೊಂಡ ನಂತರ ಪ್ರಕಾಶಕರು ಶೇಕಡಾ 80 ರಷ್ಟು ಆದಾಯ ಪಡೆಯಲಿದ್ದಾರೆ. ಇದು ಖರೀದಿ-ಬದಿ ಅಥವಾ ಥರ್ಡ್ ಪಾರ್ಟಿ ಪ್ಲಾಟ್ಫಾರ್ಮ್ ಆಗಿರಬಹುದು " ಎಂದು ಕಂಪನಿ ತಿಳಿಸಿದೆ. ಉದಾಹರಣೆಗೆ, ಗೂಗಲ್ ಆಡ್ಸೆನ್ಸ್ ಜಾಹೀರಾತು ತೋರಿಸಿದಾಗ, ಜಾಹೀರಾತುದಾರರು ನೀಡುವ ಹಣದಲ್ಲಿ ಸರಾಸರಿ ಶೇ 15ರಷ್ಟು ಮೊತ್ತವನ್ನು ಗೂಗಲ್ ಆಡ್ಸೆನ್ಸ್ ತಾನು ಉಳಿಸಿಕೊಳ್ಳಲಿದೆ.
ಒಟ್ಟಾರೆಯಾಗಿ ನೋಡಿದರೆ ವೆಬ್ಸೈಟ್ಗಳು ಆದಾಯದ ಸುಮಾರು ಶೇ 68ರಷ್ಟು ಪಾಲು ಪಡೆಯುವುದನ್ನು ಮುಂದುವರಿಸಲಿವೆ. ಜಾಹೀರಾತುದಾರರು ಆಡ್ಸೆನ್ಸ್ನಲ್ಲಿ ಜಾಹೀರಾತು ತೋರಿಸಲು ಥರ್ಡ್ಪಾರ್ಟಿ ಪ್ಲಾಟ್ಫಾರ್ಮ್ ಬಳಸಿದಲ್ಲಿ ಥರ್ಡ್-ಪಾರ್ಟಿ ಪ್ಲಾಟ್ಫಾರ್ಮ್ ತನ್ನ ಶುಲ್ಕವನ್ನು ತೆಗೆದುಕೊಂಡ ನಂತರ ಪ್ರಕಾಶಕರು ಶೇಕಡಾ 80 ರಷ್ಟು ಆದಾಯವನ್ನು ಪಡೆಯುತ್ತಾರೆ.
ಇದನ್ನೂ ಓದಿ: ಫೇಸ್ಬುಕ್, ಇನ್ಸ್ಟಾದಲ್ಲಿ ನಿಮ್ಮ ಇಂಟರ್ನೆಟ್ ಜಾಲಾಟ ಟ್ರ್ಯಾಕ್ ಮಾಡದಂತೆ ತಡೆಯುವುದು ಹೇಗೆ? ಇಲ್ಲಿದೆ ಮಾಹಿತಿ
