ನವದೆಹಲಿ: ಮೆಟಾ ಸಂಸ್ಥಾಪಕ ಮಾರ್ಕ್ ಜುಕರ್ಬರ್ಗ್ ಮತ್ತು ಎಕ್ಸ್ (ಹಿಂದಿನ ಟ್ವಿಟರ್) ಮಾಲೀಕ ಎಲೋನ್ ಮಸ್ಕ್ ನಡುವೆ ಸೋಷಿಯಲ್ ಮೀಡಿಯಾದಲ್ಲಿ ನಡೆದಿರುವ ವಾಕ್ಸಮರದ ಮಧ್ಯೆ ಟ್ವಿಟರ್ ಮಾಜಿ ಸಹ ಸಂಸ್ಥಾಪಕ ಮತ್ತು ಸಿಇಒ ಜಾಕ್ ಡಾರ್ಸೆ ತಮ್ಮ ಇನ್ಸ್ಟಾಗ್ರಾಮ್ ಖಾತೆ ಡಿಲೀಟ್ ಮಾಡಿದ್ದಾರೆ. ಇನ್ಸ್ಟಾಗ್ರಾಮ್ನಲ್ಲಿನ ಡಾರ್ಸೆ ಅವರ @jack ಹ್ಯಾಂಡಲ್ ಈಗ ಅಸ್ತಿತ್ವದಲ್ಲಿ ಇಲ್ಲ. ಸದ್ಯ ತಮ್ಮದೇ ಆದ Block ಹೆಸರಿನ ಮತ್ತೊಂದು ಪೇಮೆಂಟ್ ಕಂಪನಿ ಪ್ಲಾಟ್ಫಾರ್ಮ್ ಆರಂಭಿಸಿರುವ ಡಾರ್ಸೆ, ತಾವು ತಮ್ಮ ಇನ್ಸ್ಟಾ ಅಕೌಂಟ್ ಡಿಲೀಟ್ ಮಾಡಿರುವುದನ್ನು ಖಚಿತ ಪಡಿಸಿದ್ದಾರೆ.
"ನಾನು ನನ್ನ ಇನ್ಸ್ಟಾಗ್ರಾಮ್ ಖಾತೆಯನ್ನು ಡಿಲೀಟ್ ಮಾಡಿದ್ದೇನೆ. ಖಾತೆ ಡಿಲೀಟ್ ಮಾಡಲು ನಾನು ಇಷ್ಟು ಸಮಯ ತೆಗೆದುಕೊಂಡಿದ್ದೇಕೆ ಎಂಬುದು ನನಗೆ ತಿಳಿಯುತ್ತಿಲ್ಲ. ಇನ್ಸ್ಟಾದಲ್ಲಿ ಆರಂಭವಾದ ಮೊದಲ 10 ಖಾತೆಗಳ ಪೈಕಿ ನನ್ನದೂ ಒಂದಾಗಿತ್ತು ಎಂಬುದು ನೆನಪಿದೆ ಮತ್ತು ನಾನು ಕಂಪನಿಯ ಮೊದಲ ಏಂಜೆಲ್ ಹೂಡಿಕೆದಾರರಲ್ಲಿ ಒಬ್ಬನಾಗಿದ್ದೆ" ಎಂದು ಡಾರ್ಸೆ ನಾಸ್ಟರ್ (Nostr) ಎಂಬ ವಿಕೇಂದ್ರೀಕೃತ ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್ ಮಾಡಿದ್ದಾರೆ.
"ಕೆವಿನ್ (ಸಿಸ್ಟ್ರೋಮ್) ಒಡಿಯೊದಲ್ಲಿ ನಮ್ಮ ಇಂಟರ್ನ್ ಆಗಿದ್ದರು. ಅದನ್ನು ಫೇಸ್ಬುಕ್ಗೆ ಮಾರಾಟ ಮಾಡಿದ ನಂತರ ನಾನು ಅದನ್ನು ಬಳಸುವುದನ್ನು ನಿಲ್ಲಿಸಿದೆ. @name ಏನಾಗಲಿದೆ ಎಂಬುದನ್ನು ನೋಡುವುದು ಆಸಕ್ತಿದಾಯಕವಾಗಿದೆ" ಎಂದು ಡಾರ್ಸೆ ಹೇಳಿದರು. ಸಿಸ್ಟ್ರೋಮ್ ಅವರು ಮೈಕ್ ಕ್ರೀಗರ್ ಅವರೊಂದಿಗೆ ಸೇರಿ ಇನ್ಸ್ಟಾಗ್ರಾಮ್ ಅನ್ನು ಸಹ - ಸ್ಥಾಪಿಸಿದ್ದರು. ಅವರು ಸೆಪ್ಟೆಂಬರ್ 24, 2018 ರಂದು ಇನ್ಸ್ಟಾಗ್ರಾಮ್ ಸಿಇಒ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ಮೆಟಾ (ಆಗ ಫೇಸ್ಬುಕ್) 2012 ರಲ್ಲಿ ಇನ್ಸ್ಟಾಗ್ರಾಮ್ ಅನ್ನು 1 ಬಿಲಿಯನ್ ಡಾಲರ್ಗೆ ಖರೀದಿಸಿತ್ತು.
ಒಡಿಯೊ ಎಂಬುದು 2005 ರಲ್ಲಿ ನೋವಾ ಗ್ಲಾಸ್ ಮತ್ತು ಇವಾನ್ ವಿಲಿಯಮ್ಸ್ ಸ್ಥಾಪಿಸಿದ ಸಂಸ್ಥೆಯಾಗಿದ್ದು, ನಂತರ ಅದು Obvious Corporation ಎಂದು ಬದಲಾವಣೆಯಾಯಿತು. ಅಲ್ಲದೇ ಇದೇ ಕಂಪನಿಯು ಟ್ವಿಟರ್ ಆರಂಭವಾಗಲು ಕಾರಣವಾಯಿತು. ಏತನ್ಮಧ್ಯೆ, ಟ್ವಿಟರ್ಗೆ ಪೈಪೋಟಿ ನೀಡಲು ಮೆಟಾ ತನ್ನ ಥ್ರೆಡ್ಸ್ ಆ್ಯಪ್ ಅನ್ನು ಆರಂಭಿಸಿದೆ. ಇದರ ಮಧ್ಯೆ ಡಾರ್ಸೆ ಬೆಂಬಲಿತ ಬ್ಲೂಸ್ಕಿ ಆ್ಯಪ್ ತನ್ನ ಬೆಳವಣಿಗೆಗಾಗಿ 8 ಮಿಲಿಯನ್ ಡಾಲರ್ ಸಂಗ್ರಹಿಸಿದೆ ಎಂದು ಘೋಷಿಸಿದೆ.
ಜಾಕ್ ಡಾರ್ಸೆ ಪ್ರಸ್ತುತ ಪೇಮೆಂಟ್ ಕಂಪನಿ ಬ್ಲಾಕ್ (ಹಿಂದೆ ಸ್ಕ್ವೇರ್ ಎಂದು ಕರೆಯಲಾಗುತ್ತಿತ್ತು) ಇದರ ಸಿಇಒ ಆಗಿದ್ದಾರೆ. 2015 ರಿಂದ ನವೆಂಬರ್ 2021 ರವರೆಗೆ ಅವರು ಟ್ವಿಟರ್ ಸಿಇಒ ಆಗಿದ್ದರು. ಮೇ 2022 ರಲ್ಲಿ ಟ್ವಿಟರ್ ಆಡಳಿತ ಮಂಡಳಿಯಿಂದ ಹೊರನಡೆದರು. ಡಾರ್ಸೆ 2006 ರಲ್ಲಿ ಇವಿ ವಿಲಿಯಮ್ಸ್, ಬಿಜ್ ಸ್ಟೋನ್ ಮತ್ತು ನೋವಾ ಗ್ಲಾಸ್ ಅವರೊಂದಿಗೆ ಟ್ವಿಟರ್ ಅನ್ನು ಸಹಸಂಸ್ಥಾಪಿಸಿದರು ಮತ್ತು 2008 ರವರೆಗೆ ಸಿಇಒ ಆಗಿದ್ದರು. ಡಾರ್ಸೆ 2015 ರಲ್ಲಿ ಮತ್ತೆ ಟ್ವಿಟರ್ಗೆ ಮರಳಿದ್ದರು. 2016 ರಲ್ಲಿ ಡಾರ್ಸೆ ತಮ್ಮ ಟ್ವಿಟರ್ ಷೇರುಗಳಲ್ಲಿ ಮೂರನೇ ಒಂದು ಭಾಗವನ್ನು ಉದ್ಯೋಗಿಗಳಿಗೆ ಹಂಚಿದ್ದರು.
ಇದನ್ನೂ ಓದಿ : ಸರ್ಕಾರದಿಂದ Emergency Alert System ಪರೀಕ್ಷೆ: ಮೊಬೈಲ್ಗೆ ಬರ್ತಿವೆ ಸ್ಯಾಂಪಲ್ ಮೆಸೇಜ್!
