ಸ್ಯಾನ್ ಫ್ರಾನ್ಸಿಸ್ಕೋ : ಐಫೋನ್ ಅನ್ನು 'ಐಪೇಜರ್' ಗೆ ಹೋಲಿಸುವ ಮೂಲಕ ಗೂಗಲ್ ಆ್ಯಪಲ್ ಅನ್ನು ಗೇಲಿ ಮಾಡಿದೆ. ಈ ಬಗ್ಗೆ ಹೊಸ ವೀಡಿಯೊ ಬಿಡುಗಡೆ ಮಾಡಿರುವ ಗೂಗಲ್, ಐಫೋನ್ಗಳನ್ನು ಹಳೆಯ ಕಾಲದ ಪೇಜರ್ಗಳಿಗೆ ಹೋಲಿಸಿದೆ. ಆ್ಯಪಲ್ ಈಗಲೂ ಆಧುನಿಕ ಆರ್ಸಿಎಚ್ ಅಂದರೆ ರಿಚ್ ಕಮ್ಯುನಿಕೇಷನ್ ಸರ್ವೀಸಸ್ ಮೆಸೇಜಿಂಗ್ ಪ್ರೋಟೋಕಾಲ್ ಅನ್ನು ಅಳವಡಿಸಿಕೊಂಡಿಲ್ಲ ಮತ್ತು ಆಂಡ್ರಾಯ್ಡ್ ಬಳಕೆದಾರರೊಂದಿಗೆ ಸಂದೇಶ ಕಳುಹಿಸಲು ದಶಕಗಳಷ್ಟು ಹಳೆಯ ಎಸ್ಎಂಎಸ್ / ಎಂಎಂಎಸ್ ಪ್ರೋಟೋಕಾಲ್ ಅನ್ನೇ ಬಳಸುತ್ತಿದೆ.
ಆರ್ಸಿಎಚ್ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳುವಂತೆ ಗೂಗಲ್ ಆಗಾಗ ಆ್ಯಪಲ್ಗೆ ತಿವಿಯುತ್ತಲೇ ಇದೆ. ಇದರ ಮುಂದುವರಿದ ಭಾಗವಾಗಿ ಗೂಗಲ್ ಈಗ Get the Message ಅಂದರೆ 'ಈಗಲಾದರೂ ಅರ್ಥ ಮಾಡಿಕೋ' ಎಂಬರ್ಥದಲ್ಲಿ ಆ್ಯಪಲ್ ವಿರುದ್ಧ ಆನ್ಲೈನ್ ಅಭಿಯಾನ ನಡೆಸುತ್ತಲೇ ಇದೆ. ಅದಕ್ಕಾಗಿಯೇ ಆ್ಯಪಲ್ ಫೋನ್ ಅನ್ನು ಐಪೇಜರ್ ಎಂದು ವ್ಯಂಗ್ಯವಾಡಿರುವ ಗೂಗಲ್ ಈಗಲಾದರೂ Get the Message ಎಂದು ಹೇಳಿದೆ.
"ಐಪೇಜರ್ ಎಂಬುದು ನಿಜವಲ್ಲ, ಆದರೆ ಆ್ಯಪಲ್ ಬಳಸುತ್ತಿರುವ ಹಳೆಯ ಎಸ್ಎಂಎಸ್ ತಂತ್ರಜ್ಞಾನದಿಂದ ಸಮಸ್ಯೆಗಳು ನಿಜವಾಗಿಯೂ ಇವೆ" ಎಂದು ಗೂಗಲ್ ಯೂಟ್ಯೂಬ್ ವೀಡಿಯೊ ವಿವರಣೆಯಲ್ಲಿ ಹೇಳಿದೆ. "ಟೆಕ್ಸ್ಟ್ ಮೆಸೇಜ್ ಕಳುಹಿಸುವ ಪ್ರಕ್ರಿಯೆಯನ್ನು ಎಲ್ಲರಿಗಾಗಿ ಮತ್ತಷ್ಟು ಉತ್ತಮಗೊಳಿಸೋಣ ಮತ್ತು ಆ್ಯಪಲ್ಗೆ ಇದರ ಸಂದೇಶ ತಲುಪಿಸೋಣ. ಆ್ಯಪಲ್ ಆರ್ಸಿಎಸ್ ತಂತ್ರಜ್ಞಾನಕ್ಕೆ ಅಪ್ಗ್ರೇಡ್ ಆಗಲು ಸಹಾಯ ಮಾಡೋಣ #GetTheMessage" ಎಂದು ಅದು ಹೇಳಿದೆ.
ಆರ್ಸಿಎಸ್ ಇದು ಸಂದೇಶಗಳಲ್ಲಿ ಎಂಡ್-ಟು-ಎಂಡ್ ಎನ್ಕ್ರಿಪ್ಷನ್ ಅನ್ನು ಖಾತರಿಗೊಳಿಸುತ್ತದೆ ಮತ್ತು ರೀಡ್ ರಿಸೀಪ್ಟ್ಗಳು ಕಾಣಿಸುತ್ತವೆ. ಜೊತೆಗೆ ಆರ್ಸಿಎಸ್ನಿಂದ ಹೆಚ್ಚಿನ ರೆಸಲ್ಯೂಶನ್ನ ಫೋಟೋಗಳು ಮತ್ತು ವೀಡಿಯೊಗಳನ್ನು ಶೇರ್ ಮಾಡಲು ಸಾಧ್ಯವಾಗುತ್ತದೆ.
ಈ ವಿಶ್ವದಲ್ಲಿ ಸೆಲ್ ಫೋನ್ ಗಳು ಬರುವ ಮೊದಲು ತ್ವರಿತವಾಗಿ ಸಂದೇಶ ಕಳುಹಿಸಲು ಪೇಜರ್ಗಳು ಬಹಳ ಉಪಯುಕ್ತವಾಗಿದ್ದವು. ಆಗ ಪೇಜಿಂಗ್ ಎಂಬ ತ್ವರಿತ ಸಂದೇಶ ವ್ಯವಸ್ಥೆಯೊಂದು ಚಾಲ್ತಿಯಲ್ಲಿತ್ತು. 1990ರ ದಶಕದಲ್ಲಿ ಪೇಜರ್ಗಳು ಬಹಳ ಜನಪ್ರಿಯವಾಗಿದ್ದವು ಮೊಬೈಲ್ಗಳು ಬಂದ ನಂತರ ಇವುಗಳ ಬಳಕೆ ನಿಂತು ಹೋಯಿತು. ಪೇಜರ್ ಎಂಬುದು ಒಂದು ಸಣ್ಣ ವೈಯಕ್ತಿಕ ರೇಡಿಯೋ ರಿಸೀವರ್ ಆಗಿದ್ದು, ಅದನ್ನು ಜೇಬಿನಲ್ಲಿ ಇಟ್ಟುಕೊಂಡು ಸುತ್ತಾಡಬಹುದಿತ್ತು. ಆದರೆ ಪೇಜರ್ ಮೊಬೈಲ್ಗಳ ರೀತಿ ಟು ವೇ ಕಮ್ಯುನಿಕೇಶನ್ ಸಾಧನಗಳಲ್ಲ. ಇವು ಒನ್ ವೇ ಸಂಪರ್ಕ ಸಾಧನಗಳು ಮಾತ್ರ.
ಇದನ್ನೂ ಓದಿ : ಯಾರಿಗೂ ಉಚಿತವಾಗಿರಲ್ಲ 'X'! ಮಸ್ಕ್ ಹೇಳಿದ್ದೇನು?
