ವಾಷಿಂಗ್ಟನ್ (ಅಮೆರಿಕ): ಆಸ್ಟ್ರಿಯಾದ ರಾಜಧಾನಿ ವಿಯೆನ್ನಾವನ್ನು 2023 ರಲ್ಲಿ ವಿಶ್ವದ "ಅತ್ಯಂತ ವಾಸಯೋಗ್ಯ ನಗರ" ಎಂದು ಹೆಸರಿಸಲಾಗಿದೆ ಎಂದು ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ. ತನ್ನ ವಿಶ್ವಾಸಾರ್ಹ ಮೂಲಸೌಕರ್ಯ, ಅಸಾಧಾರಣ ಸಂಸ್ಕೃತಿ ಮತ್ತು ಮನರಂಜನೆ, ಅತ್ಯುತ್ತಮ ಶಿಕ್ಷಣ ಮತ್ತು ಆರೋಗ್ಯ ಸೇವೆಗಳಿಗಾಗಿ ಪ್ರಶಂಸೆ ಗಳಿಸಿರುವ ವಿಯೆನ್ನಾಗೆ "ಅತ್ಯಂತ ವಾಸಯೋಗ್ಯ ನಗರ" ಎಂಬ ಕಿರೀಟ ಲಭ್ಯವಾಗಿದೆ.
ಎಕನಾಮಿಸ್ಟ್ ಇಂಟೆಲಿಜೆನ್ಸ್ ಯುನಿಟ್ (ಇಐಯು) ಸಂಸ್ಥೆಯು 173 ನಗರಗಳ ಶ್ರೇಯಾಂಕವನ್ನು ಬುಧವಾರ ಬಿಡುಗಡೆ ಮಾಡಿದೆ. ಈ ವರದಿಯು ಆರೋಗ್ಯ ರಕ್ಷಣೆ, ಶಿಕ್ಷಣ, ಸ್ಥಿರತೆ, ಮೂಲಸೌಕರ್ಯ ಮತ್ತು ಪರಿಸರ ಸೇರಿದಂತೆ ಹಲವಾರು ಮಹತ್ವದ ಅಂಶಗಳನ್ನು ಆಧರಿಸಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಈಗಾಗಲೇ ಹಲವಾರು ಬಾರಿ ಅಗ್ರ ಸ್ಥಾನ ಪಡೆದುಕೊಂಡಿರುವ ವಿಯೆನ್ನಾ ಈ ಬಾರಿ ಮತ್ತೆ ಆ ಸ್ಥಾನಕ್ಕೇರಿದೆ. ಹಾಗೆಯೇ ಈ ಪಟ್ಟಿಯಲ್ಲಿ ಡೆನ್ಮಾರ್ಕ್‌ನ ರಾಜಧಾನಿ ಕೋಪನ್ ಹ್ಯಾಗನ್ ತನ್ನ ಎರಡನೇ ಸ್ಥಾನವನ್ನು ಉಳಿಸಿಕೊಂಡಿದೆ.
ಇತ್ತೀಚಿನ ವರ್ಷಗಳಲ್ಲಿ ಆಸ್ಟ್ರೇಲಿಯಾದ ಎರಡು ನಗರಗಳಾದ ಮೆಲ್ಬೋರ್ನ್ ಮತ್ತು ಸಿಡ್ನಿ ಕ್ರಮವಾಗಿ ಮೂರು ಮತ್ತು ನಾಲ್ಕನೇ ಸ್ಥಾನ ಪಡೆದಿವೆ. ಕೆನಡಾದ ಮೂರು ನಗರಗಳಾದ ಕ್ಯಾಲ್ಗರಿ, ವ್ಯಾಂಕೋವರ್ ಮತ್ತು ಟೊರೊಂಟೊ ಸಹ ಟಾಪ್ 10 ರಲ್ಲಿ ಸ್ಥಾನ ಪಡೆದರೆ, ಸ್ವಿಟ್ಜರ್ಲೆಂಡ್ ಎರಡು ನಗರಗಳು ಟಾಪ್ 10 ಪಟ್ಟಿಯಲ್ಲಿ ಕಾಣಿಸಿಕೊಂಡಿವೆ. ಜ್ಯೂರಿಚ್ ಆರನೇ ಸ್ಥಾನ ಮತ್ತು ಜಿನೀವಾ ಕ್ಯಾಲ್ಗರಿಯೊಂದಿಗೆ ಏಳನೇ ಸ್ಥಾನ ಪಡೆದುಕೊಂಡಿದೆ.
ಕೋವಿಡ್ ಸಂಬಂಧಿತ ನಿರ್ಬಂಧಗಳ ಹಿಂತೆಗೆದುಕೊಂಡ ನಂತರ ತನ್ನ ಸಂಸ್ಕೃತಿ ಮತ್ತು ಪರಿಸರದ ರೇಟಿಂಗ್‌ಗಳಲ್ಲಿ ಸಣ್ಣ ಉತ್ತೇಜನವನ್ನು ಕಂಡ ಒಸಾಕಾ ಕೂಡ ಟಾಪ್ 10 ಪಟ್ಟಿಯಲ್ಲಿ ಸ್ಥಾನ ಪಡೆದಿದೆ. ಏತನ್ಮಧ್ಯೆ, ಕೆಲ ಯುರೋಪಿಯನ್ ನಗರಗಳು ಈ ವರ್ಷ ಪಟ್ಟಿಯಲ್ಲಿ ದೊಡ್ಡ ಕುಸಿತವನ್ನು ಅನುಭವಿಸಿವೆ. ಲಂಡನ್ ಮತ್ತು ಸ್ಟಾಕ್ಹೋಮ್ ಎರಡೂ ಶ್ರೇಯಾಂಕದಲ್ಲಿ ಕೆಳಗಿಳಿದಿವೆ. ಲಂಡನ್ 12 ಸ್ಥಾನಗಳನ್ನು ಕಳೆದುಕೊಂಡು 46 ನೇ ಸ್ಥಾನಕ್ಕೆ ಮತ್ತು ಸ್ಟಾಕ್ಹೋಮ್ 22 ಸ್ಥಾನಗಳನ್ನು ಕಳೆದುಕೊಂಡು 43 ನೇ ಸ್ಥಾನಕ್ಕೆ ತಲುಪಿವೆ.
2022 ರಲ್ಲಿ ಮೊದಲ ಬಾರಿಗೆ ಈ ಪಟ್ಟಿಗೆ ಪ್ರವೇಶಿಸಿ 35 ನೇ ಶ್ರೇಯಾಂಕ ಪಡೆದಿದ್ದ ಸ್ಕಾಟ್ಲೆಂಡ್‌ನ ರಾಜಧಾನಿ ಎಡಿನ್‌ಬರ್ಗ್ ಈ ವರ್ಷ 58 ನೇ ಸ್ಥಾನಕ್ಕೆ ಕುಸಿದಿದೆ. ಅಲ್ಜೀರಿಯಾದ ಅಲ್ಜಿಯರ್ಸ್, ಲಿಬಿಯಾದ ಟ್ರಿಪೋಲಿ ಮತ್ತು ಸಿರಿಯಾದ ಡಮಾಸ್ಕಸ್ ವಿಶ್ವದ ಮೂರು ಅತಿ ಕಡಿಮೆ ವಾಸಯೋಗ್ಯ ನಗರಗಳ ಸ್ಥಾನದಲ್ಲಿವೆ. ಫೆಬ್ರವರಿ 2022 ರಲ್ಲಿ ರಷ್ಯಾದ ಆಕ್ರಮಣದಿಂದಾಗಿ 2022 ರಲ್ಲಿ ಪಟ್ಟಿಯಿಂದ ಕಾಣೆಯಾದ ಉಕ್ರೇನಿಯನ್ ರಾಜಧಾನಿ ಕೀವ್, ಈ ವರ್ಷ ಯುದ್ಧದ ಪ್ರಭಾವದ ನೇರ ಪರಿಣಾಮವಾಗಿ ಪಟ್ಟಿಯಲ್ಲಿ ಕೆಳಗಿಳಿದಿದೆ. ಕೀವ್ ಈಗ ಕಡಿಮೆ ವಾಸಯೋಗ್ಯವಾದ 10 ನಗರಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿದೆ.
ಇದನ್ನೂ ಓದಿ : YouTubeನ ಪ್ರಥಮ ಅಫೀಶಿಯಲ್ ಶಾಪಿಂಗ್ ಚಾನೆಲ್ ತಿಂಗಳಾಂತ್ಯಕ್ಕೆ ಆರಂಭ
