ಅಮೆರಿಕದ ಅತ್ಯಂತ ಹಿರಿಯ ಮಾಜಿ ಅಧ್ಯಕ್ಷ ಜಿಮ್ಮಿ ಕಾರ್ಟರ್​ಗೆ ಮನೆಯಲ್ಲೇ ಚಿಕಿತ್ಸೆ

ಅನಾರೋಗ್ಯಕ್ಕೀಡಾಗಿರುವ ಅಮೆರಿಕದ ಮಾಜಿ ಅಧ್ಯಕ್ಷ ಜಿಮ್ಮಿ ಕಾರ್ಟರ್​ ಅವರು ಆಸ್ಪತ್ರೆಯ ಬದಲಾಗಿ ಮನೆಯಲ್ಲಿ ಚಿಕಿತ್ಸೆ ಮುಂದುವರಿಸಲು ಮುಂದಾಗಿದ್ದಾರೆ.

ವಾಷಿಂಗ್ಟನ್: ಕ್ಯಾನ್ಸರ್​ನಿಂದ ಬಳಲುತ್ತಿರುವ ಅಮೆರಿಕದ ಮಾಜಿ ಅಧ್ಯಕ್ಷ ಜಿಮ್ಮಿ ಕಾರ್ಟರ್​ ಅವರು ಆಸ್ಪತ್ರೆಯ ಬದಲಾಗಿ ಮನೆಯ ಆರೈಕೆಯಲ್ಲಿ ಮುಂದುವರಿಯಲು ನಿರ್ಧರಿಸಿದ್ದಾರೆ. ನಿರಂತರ ಚಿಕಿತ್ಸೆಗೆ ಒಳಗಾಗಿದ್ದ ಮಾಜಿ ಅಧ್ಯಕ್ಷ ಜೀವತಾವಧಿಯ ಉಳಿದ ಸಮಯವನ್ನು ಮನೆಯವರೊಂದಿಗೆ ಕೂಡಿ ಕಳೆಯಲು ಇಚ್ಚಿಸಿದ್ದಾರೆ ಎಂದು ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.

98 ವರ್ಷದ ಜಿಮ್ಮಿ ಕಾರ್ಟರ್ ದೇಶದ 39 ನೇ ಅಧ್ಯಕ್ಷರಾಗಿ ಕೆಲಸ ಮಾಡಿದ್ದರು. ಇವರು ಅಮೆರಿಕದ ಅಧ್ಯಕ್ಷರಲ್ಲಿ ಜೀವಂತವಾಗಿರುವ ಅತಿ ಹಿರಿಯ ಮಾಜಿ ಅಧ್ಯಕ್ಷ. ಜಾರ್ಜ್​ಬುಷ್​ 2018 ರಲ್ಲಿ ತಮ್ಮ 94 ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ಕಾರ್ಟರ್‌ಗೆ ಮನೆಯಲ್ಲಿ ಕುಟುಂಬದ ಆರೈಕೆ ಮತ್ತು ವೈದ್ಯಕೀಯ ಚಿಕಿತ್ಸೆಯ ಬೆಂಬಲ ಮುಂದುವರಿಯಲಿದೆ ಎಂದು ತಿಳಿದುಬಂದಿದೆ.

"ಅನಾರೋಗ್ಯವಿದ್ದರೂ ಅಜ್ಜ ಉಳಿದ ಸಮಯವನ್ನು ಸಂತೋಷವಾಗಿ ಮನೆಯಲ್ಲೇ ಕಳೆಯಲು ನಿರ್ಧರಿಸಿದ್ದಾರೆ. ಹೀಗಾಗಿ ಅವರನ್ನು ಮನೆಗೆ ಕರೆತರಲಾಗಿದೆ. ವೈದ್ಯಕೀಯ ಚಿಕಿತ್ಸೆಯ ಜೊತೆಗೆ ಮನೆಯವರ ಆರೈಕೆ ಮುಂದುವರಿಯಲಿದೆ. ಹೆಚ್ಚುವರಿ ವೈದ್ಯಕೀಯ ಬೆಂಬಲವೂ ಇರಲಿದೆ" ಎಂದು ಜಾರ್ಜಿಯಾದ ಸೆನೆಟರ್ ಮತ್ತು ಕಾರ್ಟರ್​ರ ಮೊಮ್ಮಗ ಜೇಸನ್ ಕಾರ್ಟರ್ ಮಾಹಿತಿ ನೀಡಿದ್ದಾರೆ.

ಕಾರ್ಟರ್ ಅವರು​ ಕೋವಿಡ್ ಸಾಂಕ್ರಾಮಿಕದ ಬಳಿಕ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುವುದನ್ನು ನಿಲ್ಲಿಸಿದ್ದರು. ಆದರೂ, ವಿಶ್ವದ ರಾಜಕೀಯ ಆಗುಹೋಗುಗಳ ಬಗ್ಗೆ ಪ್ರಸ್ತಾಪ ಮಾಡುತ್ತಿದ್ದರು. ತದನಂತರ ಅನಾರೋಗ್ಯ ಉಲ್ಬಣಗೊಂಡು ಚಿಕಿತ್ಸೆಯಲ್ಲೇ ಮುಂದುವರಿದ್ದಾರೆ.

ಬಹುಮುಖ ಪ್ರತಿಭೆ​: ಜಿಮ್ಮಿ ಕಾರ್ಟರ್​ ಅವರು ಅಮೆರಿಕದ ಅಧ್ಯಕ್ಷರಾಗುವ ಮೊದಲು ಹಲವಾರು ಕ್ಷೇತ್ರದಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದರು. 1924 ರಲ್ಲಿ ಸಣ್ಣ ಪಟ್ಟಣವಾದ ಪ್ಲೇನ್ಸ್​ಗಾದಲ್ಲಿ ಬ್ಯಾಪ್ಟಿಸ್ಟ್ ದಂಪತಿಗೆ ಜನಿಸಿದ್ದು, ನೇವಲ್ ಅಕಾಡೆಮಿಗೆ ಶಿಕ್ಷಣಕ್ಕೆ ಸೇರಿಕೊಂಡರು. ನೌಕಾ ಅಧಿಕಾರಿಯಾಗಿ ಹೊಸ ಪರಮಾಣು ಜಲಾಂತರ್ಗಾಮಿ ಕಾರ್ಯಕ್ರಮದಲ್ಲಿ ಕೆಲಸ ಮಾಡಿದ್ದರು.

ಅಷ್ಟು ಮಾತ್ರವಲ್ಲದೇ, ಕೃಷಿಯಲ್ಲೂ ತಮ್ಮನ್ನು ತೊಡಗಿಸಿಕೊಂಡು ಯಶಸ್ವಿಯಾಗಿದ್ದರು. 1962 ರಲ್ಲಿ ಅವರು ಜಾರ್ಜಿಯಾ ರಾಜ್ಯದ ಸೆನೆಟರ್​ ಆಗಿ ಸ್ಪರ್ಧಿಸಿ ಆಯ್ಕೆಯಾದರು. 1970 ರಲ್ಲಿ ವಾಲ್ ಸ್ಟ್ರೀಟ್ ಜರ್ನಲ್‌ನ ಗವರ್ನರ್ ಆಗಿ ಆಯ್ಕೆಯಾದರು.

1977 ರಿಂದ 1981 ರವರೆಗೆ ಒಂದು ಅವಧಿಗೆ ದೇಶದ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದರು. 2015 ರಲ್ಲಿ ಮೆದುಳು ಮತ್ತು ಯಕೃತ್ತಿನಲ್ಲಿ ಕ್ಯಾನ್ಸರ್ ರೋಗಕ್ಕೆ ತುತ್ತಾದರು. ಚಿಕಿತ್ಸೆಗೆ ಒಳಗಾದ ಅವರು ಮೆದುಳಿನ ಕ್ಯಾನ್ಸರ್​ನಿಂದ ಪಾರಾದರು. ಆದರೆ 2019 ರಲ್ಲಿ ಮತ್ತೆ ಕ್ಯಾನ್ಸರ್​ ಕಾಣಿಸಿಕೊಂಡು ಮೆದುಳಿನ ಒತ್ತಡವನ್ನು ಕಡಿಮೆ ಮಾಡಲು ಶಸ್ತ್ರಚಿಕಿತ್ಸೆಗೆ ಒಳಗಾದರು. ಅಮೆರಿಕದ ಅಧ್ಯಕ್ಷರಾಗುವ ಮೊದಲು ಜಿಮ್ಮಿ ಕಾರ್ಟರ್​ ಅವರು ಕಡಲೆಕಾಯಿ ಬೆಳೆಯುವ ರೈತ, ನೌಕಾಧಿಕಾರಿ, ಸೆನೆಟರ್​, ಜಾರ್ಜಿಯಾದ ಗವರ್ನರ್ ಆಗಿ ಕೆಲಸ ಮಾಡಿ ಅಪಾರ ರಾಜಕೀಯ ಅನುಭವ ಹೊಂದಿದ್ದರು.

ಇದನ್ನೂ ಓದಿ: 'ಯಾವುದೇ ಬಟನ್‌ ಒತ್ತಿದ್ರೂ ಬಿಜೆಪಿಗೆ ಓಟು': ಇವಿಎಂ ಕುರಿತು ಸುಳ್ಳು ವಿಡಿಯೋ ಹಂಚಿಕೊಂಡ ವ್ಯಕ್ತಿ ಸೆರೆ