ಮೈಕ್ರೋ ಬ್ಲಾಗಿಂಗ್ ಪ್ಲಾಟ್‌ಫಾರ್ಮ್ ಟ್ವಿಟರ್ನಲ್ಲಿ ಅಕ್ಷರಗಳ ಮಿತಿಯನ್ನು 280 ರಿಂದ 4000ಕ್ಕೆ ಹೆಚ್ಚಿಸಲಾಗುತ್ತದೆ ಎಂದು ಹರಿದಾಡುತ್ತಿದ್ದ ಸುದ್ದಿಯನ್ನು ಇದೀಗ ಸ್ವತಃ ಟ್ವಿಟರ್ನ ಸಿಇಒ ಎಲಾನ್ ಮಸ್ಕ್ ಖಚಿತಪಡಿಸಿದ್ದಾರೆ.
ಇಂದು ಎಲಾನ್ ಮಸ್ಕ್ ಟ್ವಿಟರ್ನಲ್ಲಿ ತಮ್ಮ ಮೇಲೆ ಪ್ರಶ್ನೆಗಳ ದಾಳಿ ಮಾಡುವಂತೆ ಬಳಕೆದಾರರಿಗೆ ಕೇಳಿಕೊಂಡಿದ್ದು, ಈ ವೇಳೆ 'ಟ್ವಿಟ್ಟರ್ ಅಕ್ಷರಗಳನ್ನು 280 ರಿಂದ 4000ಕ್ಕೆ ಹೆಚ್ಚಿಸಲು ನಿರ್ಧರಿಸಿರುವುದು ನಿಜವೇ ಎಲಾನ್?' ಎಂದು ಬಳಕೆದಾದರೊಬ್ಬರು ಪ್ರಶ್ನಿಸಿದ್ದಾರೆ. ಇದಕ್ಕೆ ಎಲಾನ್ ಮಸ್ಕ್ ಹೌದು ಎಂದು ಉತ್ತರಿಸಿದ್ದಾರೆ.
ಇದರ ಬೆನ್ನಲ್ಲೇ ಹಲವು ನೆಟ್ಟಿಗರು ಇದಕ್ಕೆ ಪ್ರತಿಕ್ರಿಯಿಸಿದ್ದು, ಇದು ದೊಡ್ಡ ಸಮಸ್ಯೆಯಾಗುತ್ತದೆ. ಟ್ವಿಟರ್ನ ಉದ್ದೇಶ ತ್ವರಿತವಾಗಿ ಸುದ್ದಿ ನೀಡುವುದು. ಒಂದು ವೇಳೆ ಅಕ್ಷರಗಳ ಮಿತಿಯನ್ನು ಹೆಚ್ಚಿಸಿದರೆ ನೈಜ ಮಾಹಿತಿ ಕಳೆದುಹೋಗುತ್ತದೆ ಎಂದು ಒಬ್ಬರು ಹೇಳಿದರೆ, 4000 ಪದಗಳೆಂದರೆ ಅದು ಪ್ರಬಂಧವಾಗುತ್ತದೆ ಟ್ವೀಟ್ ಅಲ್ಲ ಎಂದು ಹೇಳಿದ್ದಾರೆ.
ಮತ್ತೊಂದೆಡೆ ಟ್ವಿಟರ್ ಭಾನುವಾರದಿಂದ ಎಲ್ಲಾ ಬಳಕೆದಾರರಿಗೆ 'ಕಮ್ಯೂನಿಟಿ ನೋಟ್ಸ್' ಎನ್ನುವ ಹೊಸ ಆಪ್ಷನ್ ಒಂದನ್ನು ನೀಡಿದ್ದು, ಕಮ್ಯೂನಿಟಿ ನೋಟ್ಸ್ ಮೂಲಕ ಉತ್ತಮ ಮಾಹಿತಿಯುಳ್ಳ ಜಗತ್ತನ್ನು ನಿರ್ಮಿಸುವ ಗುರಿಯನ್ನು ಟ್ವಿಟರ್ ಹೊಂದಿದೆ. ಇಲ್ಲಿ ಟ್ವಿಟ್ಟರ್ ಬಳಕೆದಾರರು ಯಾವುದೇ ಟ್ವೀಟ್ ಮೇಲೆ ಟಿಪ್ಪಣಿಗಳನ್ನು ಬರೆಯಬಹುದು. ವಿವಿಧ ದೃಷ್ಟಿಕೋನಗಳಿಂದ ಸಾಕಷ್ಟು ಬಳಕೆದಾರರು ಅವು ಸಹಾಯಕವಾಗಿವೆ ಎಂದು ರೇಟ್ ಮಾಡಿದರೆ, ಆ ಟಿಪ್ಪಣಿಯನ್ನು ಟ್ವೀಟ್‌ನಲ್ಲಿ ಸಾರ್ವಜನಿಕವಾಗಿ ತೋರಿಸಲಾಗುತ್ತದೆ ಎಂದು ಟ್ವಿಟ್ಟರ್ ತಿಳಿಸಿದೆ.
ಇದನ್ನೂ ಓದಿ: ಭಾರತದಲ್ಲಿ ಮಕ್ಕಳ ಲೈಂಗಿಕ ಶೋಷಣೆ, ನಗ್ನತೆಗೆ ಉತ್ತೇಜನೆ: ತಿಂಗಳಲ್ಲಿ 44 ಸಾವಿರ ಟ್ವಿಟರ್ ಖಾತೆಗಳು ರದ್ದು
