ಇಸ್ಲಾಮಾಬಾದ್(ಪಾಕಿಸ್ತಾನ): ಇಮ್ರಾನ್ ಖಾನ್ ದೇಶದ ಜನರನ್ನು ದಾರಿ ತಪ್ಪಿಸುತ್ತಿದ್ದು, ಅದನ್ನು ಸಹಿಸಲಾಗದೇ ನಾನು ಆತನನ್ನು ಕೊಲೆ ಮಾಡಲು ಬಯಸಿದ್ದೆ. ಬೇರೆ ಯಾರ ಮೇಲೂ ದಾಳಿ ಮಾಡಲು ನಾನು ಗುಂಡು ಹಾರಿಸಿಲ್ಲ..
ಇದು ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಮೇಲೆ ಗುಂಡಿನ ದಾಳಿ ನಡೆಸಿದ ಆರೋಪಿಯ ಹೇಳಿಕೆ. ಪಾಕಿಸ್ತಾನ ಪಂಜಾಬ್ನ ವಜೀರಾಬಾದ್ನಲ್ಲಿ ಮಾಜಿ ಪ್ರಧಾನಿ ನಡೆಸುತ್ತಿದ್ದ ರ‍್ಯಾಲಿಯ ವೇಳೆ ಇಮ್ರಾನ್ ಖಾನ್ ಗುರಿಯಾಗಿಸಿಕೊಂಡು ವ್ಯಕ್ತಿಯೊಬ್ಬ ಗುಂಡಿನ ದಾಳಿ ನಡೆಸಿದ್ದ. ಇದರಲ್ಲಿ ಇಮ್ರಾನ್ ಮತ್ತು ಅವರ ಆಪ್ತ ಸಹಾಯಕನಿಗೆ ಗುಂಡು ತಾಕಿ ಗಾಯಗೊಂಡಿದ್ದಾರೆ.
ಸ್ಥಳದಲ್ಲೇ ಆರೋಪಿಯನ್ನು ಬಂಧಿಸಿದ ಪೊಲೀಸರು ವಿಚಾರಣೆ ನಡೆಸಿದ್ದು, ಇದರ ವಿಡಿಯೋ ಹರಿಬಿಟ್ಟಿದ್ದಾರೆ. ವಿಡಿಯೋದಲ್ಲಿ ಆರೋಪಿ ನೀಡಿದ ಹೇಳಿಕೆಯಂತೆ, ಇಮ್ರಾನ್ ಖಾನ್ ದೇಶದ ಜನರ ದರಿ ತಪ್ಪಿಸುತ್ತಿದ್ದಾರೆ. ಇದರಿಂದ ಬೇಸತ್ತಿದ್ದ ನನಗೆ ಅವರನ್ನು ಹತ್ಯೆ ಮಾಡಬೇಕು ಎಂದು ರ‍್ಯಾಲಿಯಲ್ಲಿ ಭಾಗಿಯಾದೆ. ಬಳಿಕ ಖಾನ್ ಇದ್ದ ವಾಹನದ ಹತ್ತಿರ ತೆರಳಿ ಗುಂಡಿನ ದಾಳಿ ಮಾಡಿದೆ. ಇಮ್ರಾನ್ ಅವರನ್ನು ಮಾತ್ರ ಹತ್ಯೆ ಮಾಡಲು ಬಯಸಿದ್ದೆ. ಬೇರೆ ಯಾರ ಮೇಲೂ ನಾನು ಗುಂಡು ಹಾರಿಸಿಲ್ಲ ಎಂದು ಹೇಳಿದ್ದಾನೆ.
ದಾಳಿಕೋರ ತಾನು ಯಾವುದೇ ರಾಜಕೀಯ, ಧಾರ್ಮಿಕ ಅಥವಾ ಭಯೋತ್ಪಾದಕ ಸಂಘಟನೆಗಳೊಂದಿಗೆ ಸಂಬಂಧ ಹೊಂದಿಲ್ಲ ಎಂದು ಹೇಳಿದ್ದು, ಇಮ್ರಾನ್ ಖಾನ್ ಮೆಗಾ ರ‍್ಯಾಲಿಯನ್ನು ಘೋಷಿಸಿದ ನಂತರ ಹತ್ಯೆ ಮಾಡುವ ಆಲೋಚನೆ ಮಾಡಿದ್ದೆ. ಇಂದು ಅವರನ್ನು ಕೊಲ್ಲಲು ನಿರ್ಧರಿಸಿ ಗುಂಡು ಹಾರಿಸಿದೆ ಎಂದಿದ್ದಾನೆ.
ನಾನು ಒಂಟಿಯಾಗಿ ಈ ನಿರ್ಧಾರಕ್ಕೆ ಬಂದಿದೆ. ನನ್ನೊಂದಿಗೆ ಯಾರೂ ಇಲ್ಲ. ಮೋಟಾರು ಬೈಕ್‌ನಲ್ಲಿ ಬಂದು ಅದನ್ನು ವಜೀರಾಬಾದ್ನಲ್ಲಿನ ಸಂಬಂಧಿಕರ ಅಂಗಡಿಯಲ್ಲಿ ಬಿಟ್ಟು ರ‍್ಯಾಲಿಯಲ್ಲಿ ಧುಮುಕಿದೆ. ರ‍್ಯಾಲಿಯಲ್ಲಿ ಜೋರಾಗಿ ಹಾಡುಗಳನ್ನು ಹಾಕಿದ್ದಾಗ ಗುಂಡು ಹಾರಿಸಿದೆ ಎಂದು ತಪ್ಪೊಪ್ಪಿಗೆ ಹೇಳಿಕೆ ನೀಡಿದ್ದಾನೆ.
ಓದಿ: ಭಾರತ ಹೊಗಳಿದ್ದ ಪಾಕ್ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಮೇಲೆ ಗುಂಡಿನ ದಾಳಿ
