ಪ್ಯಾರಿಸ್ (ಫ್ರಾನ್ಸ್): ಮಹತ್ವದ ಬೆಳವಣಿಗೆಯಲ್ಲಿ ಫ್ರಾನ್ಸ್ ಪ್ರಧಾನಿಯನ್ನಾಗಿ ಗೇಬ್ರಿಯಲ್ ಅಟ್ಟಲ್ ಅವರನ್ನು ನೇಮಕ ಮಾಡಲಾಗಿದೆ. ಇವರು ದೇಶದ ಮೊದಲ ಸಲಿಂಗಿ ಪಿಎಂ ಆಗಿದ್ದು, ಈ ಉನ್ನತ ಹುದ್ದೇರಿದ ಅತ್ಯಂತ ಕಿರಿಯ ರಾಜಕಾರಣಿಯೂ ಹೌದು.
ಫ್ರಾನ್ಸ್ನಲ್ಲಿ ವಿದೇಶಿಯರ ಗಡೀಪಾರು ಕುರಿತ ಇತ್ತೀಚಿನ ವಲಸೆ ಕಾನೂನು ರಾಜಕೀಯ ಪ್ರಕ್ಷುಬ್ಧತೆಗೆ ಕಾರಣವಾಗಿದೆ. ಬಲಪಂಥೀಯರಿಂದ ರಾಜಕೀಯ ಒತ್ತಡದ ಹೆಚ್ಚಾಗಿದೆ. ಇದರ ನಡುವೆ ರಾಜೀನಾಮೆ ಪ್ರಧಾನಿ ಎಲಿಜಬೆತ್ ಬೋರ್ನ್ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ. ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್ ತಮ್ಮ ಉಳಿದ ಅವಧಿಗೆ ಹೊಸ ಆರಂಭ ನಿರೀಕ್ಷಿಸುತ್ತಿರುವ ಕಾರಣ ಗೇಬ್ರಿಯಲ್ ಅಟ್ಟಲ್ ಅವರನ್ನು ಪ್ರಧಾನಿಯಾಗಿ ಮಂಗಳವಾರ ಘೋಷಿಸಲಾಗಿದೆ.
ಹೊಸ ಪ್ರಧಾನಿ ಆಯ್ಕೆ ಬಗ್ಗೆ ಅಧ್ಯಕ್ಷ ಮ್ಯಾಕ್ರನ್ ಕಚೇರಿ ಪ್ರಕಟಣೆ ಹೊರಡಿಸಿದೆ. 34 ವರ್ಷದ ಅಟ್ಟಲ್ ಸರ್ಕಾರದ ವಕ್ತಾರರಾಗಿ ಮತ್ತು ಶಿಕ್ಷಣ ಸಚಿವರಾಗಿ ಮುನ್ನೆಲೆಗೆ ಬಂದಿದ್ದರು. ಸೋಷಿಯಲಿಸ್ಟ್ ಪಕ್ಷದ ಮಾಜಿ ಸದಸ್ಯ ಅಟ್ಟಲ್, 2016ರಲ್ಲಿ ಮ್ಯಾಕ್ರನ್ ಹೊಸದಾಗಿ ಶುರು ಮಾಡಿದ್ದ ರಾಜಕೀಯ ಚಳವಳಿಗೆ ಸೇರಿದ್ದರು. 2020ರಿಂದ 2022ರವರೆಗೆ ಸರ್ಕಾರದ ವಕ್ತಾರರಾಗಿ ಸೇವೆ ಸಲ್ಲಿಸಿದ್ದರು. ಇದು ಅವರನ್ನು ಫ್ರೆಂಚ್ ಜನರಿಗೆ ಚಿರಪರಿಚಿತರನ್ನಾಗಿಸಿತು. ಅಲ್ಲದೇ, ಫ್ರಾನ್ಸ್ ಸರ್ಕಾರದ ಅತ್ಯಂತ ಪ್ರತಿಷ್ಠಿತ ಹುದ್ದೆಗಳಲ್ಲಿ ಒಂದಾದ ಶಿಕ್ಷಣ ಸಚಿವರಾಗಿ ಜುಲೈನಲ್ಲಿ ಅವರು ನೇಮಕಗೊಂಡಿದ್ದರು. ಈ ಮೂಲಕ ಮೊದಲ ಬಾರಿಗೆ ಬಜೆಟ್ ಸಚಿವರನ್ನಾಗಿ ಅವರನ್ನು ಹೆಸರಿಸಲಾಗಿತ್ತು.
ಸೆಪ್ಟೆಂಬರ್‌ನಲ್ಲಿ ಹೊಸ ಶಾಲಾ ವರ್ಷದಿಂದ ತರಗತಿಗಳಲ್ಲಿ ಉದ್ದನೆಯ ನಿಲುವಂಗಿ ಧರಿಸುವುದನ್ನು ನಿಷೇಧಿಸುವುದಾಗಿ ಅಟ್ಟಲ್ ಘೋಷಿಸಿದ್ದರು. ಮುಖ್ಯವಾಗಿ ಮುಸ್ಲಿಮರು ಧರಿಸುವ ಉಡುಪುಗಳು ಶಾಲೆಗಳಲ್ಲಿ ಜಾತ್ಯತೀತತೆ ಪರೀಕ್ಷಿಸುತ್ತಿದೆ ಎಂದು ಹೇಳಿದ್ದರು. ಅಲ್ಲದೇ, ಕೆಲವು ಸಾರ್ವಜನಿಕ ಶಾಲೆಗಳಲ್ಲಿ ಸಮವಸ್ತ್ರದ ಪ್ರಾಯೋಗಿಕ ಯೋಜನೆಯನ್ನು ಪ್ರಾರಂಭಿಸಿದ್ದರು.
ಅಲ್ಲದೇ, ಇತ್ತೀಚೆಗೆ ದೂರದರ್ಶನದಲ್ಲಿ ಗೇಬ್ರಿಯಲ್ ಅಟ್ಟಲ್ ತಾವು ಅನುಭವಿಸಿದ್ದ ಸಲಿಂಗಕಾಮಿ ಕಿರುಕುಳ ಸೇರಿದಂತೆ ಇತರ ಕಹಿ ಘಟನೆಗಳ ಬಗ್ಗೆ ಬಹಿರಂಗ ಪಡಿಸಿದ್ದರು. ಜೊತೆಗೆ ಫ್ರೆಂಚ್ ಅಭಿಪ್ರಾಯ ಸಮೀಕ್ಷೆಗಳು, ಇವರನ್ನು ಬೋರ್ನ್ ಸರ್ಕಾರದಲ್ಲಿ ಅತ್ಯಂತ ಜನಪ್ರಿಯ ಸಚಿವ ಎಂದು ಹೇಳಿದ್ದರು.
ಮತ್ತೊಂದೆಡೆ, 2017ರಲ್ಲಿ ಅಧಿಕಾರಕ್ಕೆ ಬಂದ ಮ್ಯಾಕ್ರನ್ ಫ್ರಾನ್ಸ್‌ನ ಅತ್ಯಂತ ಕಿರಿಯ ಅಧ್ಯಕ್ಷರಾಗಿದ್ದಾರೆ. 2027ರಲ್ಲಿ ಇವರ ಅಧಿಕಾರಾವಧಿ ಅಂತ್ಯಗೊಳ್ಳಲಿದೆ. ಮುಂಬರುವ ದಿನಗಳಲ್ಲಿ ಅಟ್ಟಲ್ ನೇತೃತ್ವದಲ್ಲಿ ಹೊಸ ಸರ್ಕಾರದ ತಂಡವನ್ನು ಮ್ಯಾಕ್ರನ್ ರಚಿಸಲಿದ್ದಾರೆ. ಆದರೂ, ಕೆಲವು ಪ್ರಮುಖ ಮಂತ್ರಿಗಳು ತಮ್ಮ ಹುದ್ದೆಗಳಲ್ಲಿ ಮುಂದುವರೆಯುವ ನಿರೀಕ್ಷೆಯಿದೆ.
ಇದನ್ನೂ ಓದಿ: ಬಾಂಗ್ಲಾದೇಶದ ನೂತನ ಪ್ರಧಾನಿಯಾಗಿ ಶೇಖ್ ಹಸೀನಾ ಬುಧವಾರ ಪ್ರಮಾಣವಚನ
