ಟೊರೊಂಟೊ (ಕೆನಡಾ): ಕೆನಡಾ ದೇಶವು ಜಗತ್ತಿನಲ್ಲಿ ಸುರಕ್ಷಿತವಾದ ಸ್ಥಳವಾಗಿದ್ದು, ಇಲ್ಲಿ ಅಪರಾಧ ಪ್ರಕರಣಗಳು ಕಡಿಮೆ ದಾಖಲಾಗುತ್ತದೆ. ಇಲ್ಲಿ ಕಟ್ಟು ನಿಟ್ಟಾದ ಬಂದೂಕು ನಿಯಂತ್ರಣ ಕಾನೂನುಗಳು ಇವೆ. ಇದರಿಂದ ಕೆನಡಿಯನ್ನರು ಉತ್ತಮ ಗುಣಮಟ್ಟದ ಜೀವನ ನಡೆಸುತ್ತಾರೆ. ಆದರೆ ನಿನ್ನೆ ಬುಧವಾರದಂದು ಕೆನಡಾ ವಿಶ್ವವಿದ್ಯಾಲಯವೊಂದರಲ್ಲಿ ಚೂರಿ ದಾಳಿ ನಡೆದಿದೆ.
ಕೆನಡಾದ ವಾಟರ್ಲೂ ನಗರದ ವಿಶ್ವವಿದ್ಯಾನಿಲಯದ ತರಗತಿಯೊಂದರಲ್ಲಿ ವ್ಯಕ್ತಿಯೊಬ್ಬ ಮೂವರಿಗೆ ಇರಿದಿದ್ದು ಆತನನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ವಾಟರ್ಲೂ ವಿಶ್ವವಿದ್ಯಾಲಯದ ಹೇಗಿ ಹಾಲ್‌ನಲ್ಲಿ ಬುಧವಾರ ಘಟನೆ ನಡೆದಿದ್ದು, ಚೂರಿ ಇರಿತದ ದಾಳಿಯಲ್ಲಿ ಗಾಯಗೊಂಡವರ ಸ್ಥಿತಿಯ ಬಗ್ಗೆ ತಕ್ಷಣದ ಮಾಹಿತಿ ತಿಳಿದಿಲ್ಲ.
ಗಾಯಾಳುಗಳನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತು, ಹಾಗೆ ಸದ್ಯಕ್ಕೆ ಓರ್ವನನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಆದರೆ ದಾಳಿಯ ಉದ್ದೇಶವನ್ನು ಪೊಲೀಸ್ ಅಧಿಕಾರಿಗಳು ಇನ್ನು ತಿಳಿಸಿಲ್ಲ. ಜೊತೆಗೆ ಈ ಕುರಿತು ಹೆಚ್ಚಿನ ವಿವರಗಳು ಲಭ್ಯವಾದ ನಂತರ ತಿಳಿಸಲಾಗುವುದು ಎಂದು ಹೇಳಿದ್ದಾರೆ.
ಘಟನೆ ಕುರಿತು ವಾಟರ್ಲೂ ವಿಶ್ವವಿದ್ಯಾಲಯದ ವಿದ್ಯಾರ್ಥಿ ಯೂಸುಫ್ ಕೇಮಕ್ ಹೇಳಿಕೆ ನೀಡಿದ್ದು, ಲಿಂಗ ಅಧ್ಯಯನ ತರಗತಿ ಸಮಯದಲ್ಲಿ ಈ ದಾಳಿ ನಡೆದಿದೆ. ದಾಳಿ ನಡೆಸಿದ ವ್ಯಕ್ತಿ ತರಗತಿ ಒಳಗೆ ಬಂದನು, ತರಗತಿಯಲ್ಲಿ ಶಿಕ್ಷಕರು ನೀವು ಪ್ರಾಧ್ಯಾಪಕರೇ ಎಂದು ಕೇಳಿದಾಗ ಹೌದು ಎಂದ ಆತ ನಂತರ ಒಂದು ಚಾಕುವನ್ನು ಹೊರಗೆ ತೆಗೆದನು.
ಅಷ್ಟರಲ್ಲಿ ಎಲ್ಲರೂ ಓಡಿ ಹೋದರು. ನಾನು ಓಡಿ ಹೋದೆ. ನಾವೆಲ್ಲಾ ಹೊರಗೆ ಹೋದ ನಂತರ ಅಲ್ಲಿ ಬಾಕಿ ಆಗಿದ್ದ ಓರ್ವ ವಿದ್ಯಾರ್ಥಿ ಚಾಕು ದಾಳಿಗೆ ಒಳಗಾಗಿದ್ದಾನೆ. ಅವನ ತೋಳಿನಿಂದ ರಕ್ತಸ್ರಾವವಾಗುತ್ತಿತ್ತು. ಆದರೆ, ತರಗತಿಯಲ್ಲಿದ್ದ ಶಿಕ್ಷಕರಿಗೆ ಏನಾಯಿತೋ ಗೊತ್ತಿಲ್ಲ. ಆ ಸಮಯದಲ್ಲಿ ಘಟನಾ ಸ್ಥಳದಲ್ಲಿ 40 ವಿದ್ಯಾರ್ಥಿಗಳು ತರಗತಿಯಲ್ಲಿದ್ದರು ಎಂದು ವಿದ್ಯಾರ್ಥಿ ಕೇಮಕ್ ಹೇಳಿದ್ದಾನೆ.
ಇನ್ನು ವಿಶ್ವವಿದ್ಯಾನಿಲಯದಲ್ಲಿ ಘಟನೆ ನಡೆದ ಸ್ಥಳವನ್ನು ಪರಿಶೀಲಿಸಲು ಜೊತೆಗೆ ಸಾರ್ವಜನಿಕ ಸುರಕ್ಷತೆಗಾಗಿ ಹೆಚ್ಚಿನ ಪೊಲೀಸ್ ವ್ಯವಸ್ಥೆಯನ್ನು ನೀಡಲಾಗುವುದು ಎಂದು ಅಲ್ಲಿನ ಅಧಿಕಾರಿಗಳು ತಿಳಿಸಿದ್ದಾರೆ. ಹಾಗೆ ವಾಟರ್ಲೂ ವಿಶ್ವವಿದ್ಯಾಲಯವು ತಮ್ಮ ತನಿಖೆಯಲ್ಲಿ ಪೊಲೀಸರಿಗೆ ಸರಿಯಾಗಿ ಸ್ಪಂದಿಸುತ್ತಿದ್ದು, ಬೆಂಬಲ ನೀಡುತ್ತಿದೆ ಎಂದು ಟ್ವೀಟ್ ಮಾಡಿದ್ದಾರೆ.
ವಿಶ್ವವಿದ್ಯಾನಿಲಯದ ಕ್ಯಾಂಪಸ್ ಸಮುದಾಯಕ್ಕೆ ಹೆಚ್ಚಿನ ಅಪಾಯವಿಲ್ಲ ಎಂದು ಟ್ವೀಟ್ನಲ್ಲಿ ತಿಳಿಸಿದ್ದಾರೆ. ಘಟನೆಯಿಂದ ಹೇಗಿ ಹಾಲ್‌ನಲ್ಲಿ ಬುಧವಾರ ಸಂಜೆ ನಿಗದಿಯಾಗಿದ್ದ ತರಗತಿಗಳನ್ನು ರದ್ದುಗೊಳಿಸಲಾಗಿದೆ. ಆದರೆ, ಎಲ್ಲ ಇತರ ಕ್ಯಾಂಪಸ್ ಕಾರ್ಯಗಳು ಎಂದಿನಂತೆ ಮುಂದುವರಿಯುತ್ತವೆ ಎಂದು ವಿಶ್ವವಿದ್ಯಾಲಯವು ಟ್ವೀಟ್ನಲ್ಲಿ ತಿಳಿಸಿದೆ.
ಇದನ್ನೂ ಓದಿ: Titan blast case: ಮಾನವನ ಅವಶೇಷಗಳ ಜೊತೆ ಟೈಟಾನ್ನ ಭಾಗಗಳು ಪತ್ತೆ.. ಉನ್ನತ ಮಟ್ಟದ ತನಿಖೆಗೆ ಆದೆಶ
