ಆಕ್ಸ್ಫರ್ಡ್: ಯುನೈಟೆಡ್ ಕಿಂಗಡಂನ ಆಕ್ಸ್ಫರ್ಡ್ ವಿವಿಯಲ್ಲಿ ಕೊರೊನಾ ವೈರಸ್ ವ್ಯಾಕ್ಸಿನ್ ಟ್ರಯಲ್ಸ್ ಈ ವಾರವೂ ಮುಂದುವರಿದಿವೆ. ತನ್ನ ವೈದ್ಯಕೀಯ ಪ್ರಯೋಗಾಲಯದಲ್ಲಿ ಸ್ವಯಂ ಸೇವಕರ ರಕ್ತ ತಪಾಸಣೆ ಹಾಗೂ ಟ್ರಯಲ್ಸ್ ನಡೆಸುತ್ತಿರುವ ವಿಡಿಯೋಗಳನ್ನು ವಿವಿ ಬುಧವಾರ ಬಿಡುಗಡೆ ಮಾಡಿದೆ.
ಟ್ರಯಲ್ಸ್ ಸಂದರ್ಭದಲ್ಲಿ ಸಂಶೋಧಕರು ಸ್ವಯಂ ಸೇವಕರಿಗೆ ಇಂಜೆಕ್ಷನ್ ನೀಡಿ, ವ್ಯಾಕ್ಸಿನ್ ಸುರಕ್ಷತೆಯ ಬಗ್ಗೆ ಪರಿಶೀಲನೆ ಮಾಡುತ್ತಿರುವ ದೃಶ್ಯಾವಳಿಗಳು ವಿಡಿಯೋದಲ್ಲಿವೆ. ನೊವೆಲ್ ಕೊರೊನಾ ವೈರಸ್ನ ಹೊರಮೇಲ್ಮೈಗೆ ಹೊರಗಿನಿಂದ ಜೀನ್ ಸೇರಿಸಿ ಮತ್ತೊಂದು ಅಪಾಯಕರವಲ್ಲದ ವೈರಸ್ ಉತ್ಪಾದನೆಯಾಗುವಂತೆ ಮಾಡುವುದು ಸಂಶೋಧನೆಯ ತಿರುಳಾಗಿದೆ. ಯುಕೆಯಲ್ಲಿ ಸಂಭವನೀಯ ವ್ಯಾಕ್ಸಿನ್ ತಯಾರಿಸುತ್ತಿರುವ ಪ್ರಥಮ ಸಂಶೋಧನೆ ಇದಾಗಿದೆ. ಜಗತ್ತಿನಾದ್ಯಂತ ವ್ಯಾಕ್ಸಿನ್ ತಯಾರಿಕೆಗಾಗಿ ಸಂಶೋಧನೆಗಳು ಮುಂದುವರೆದಿದ್ದು, ವಿವಿಧ ಹಂತಗಳಲ್ಲಿ ತಪಾಸಣೆಗಳನ್ನು ಕೈಗೊಳ್ಳಲಾಗುತ್ತಿದೆ.
ಈಗಿನ ಸಂಶೋಧನೆಗಳು ಒಂದು ವೇಳೆ ಯಶಸ್ವಿಯಾದಲ್ಲಿ ಈ ವ್ಯಾಕ್ಸಿನ್ ಅಭಿವೃದ್ಧಿಪಡಿಸಿ ಎಲ್ಲರಿಗೂ ತಲುಪಿಸಲು ಕನಿಷ್ಠ ಒಂದು ವರ್ಷ ಬೇಕಾಗುತ್ತದೆ ಎಂದು ತಜ್ಞರು ಹೇಳಿದ್ದಾರೆ.
