ಪ್ಯಾರಿಸ್( ಫ್ರಾನ್ಸ್): ಮಹಾಮಾರಿ ಕೊರೊನಾ ವಿಶ್ವದಾದ್ಯಂತ ರುದ್ರತಾಂಡವ ಆಡ್ತಿದ್ದು, ಈಗಾಗಲೇ ಸಾವಿರಾರು ಜನರ ಪ್ರಾಣ ಬಲಿ ಪಡೆದುಕೊಂಡಿರುವ ರಕ್ಕಸ ಸೋಂಕು ದಿನದಿಂದ ದಿನಕ್ಕೆ ತನ್ನ ಕಬಂಧ ಬಾಹು ವಿಸ್ತಾರ ಮಾಡುತ್ತಿದೆ.
ಸರ್ಕಾರಿ ಅಂಕಿ ಅಂಶಗಳ ಪ್ರಕಾರ 183 ದೇಶಗಳಲ್ಲಿ ಈ ಮಹಾಮಾರಿಯಿಂದ ಬಳಲುತ್ತಿರುವವರ ಸಂಖ್ಯೆ 7 ಲಕ್ಷ ದಾಟಿದ್ದು, ಸಾವಿನ ಸಂಖ್ಯೆ 33,568 ಆಗಿದೆ. ಅಮೆರಿಕದಲ್ಲಿ 143,025 ಜನರು ಈ ಸೋಂಕಿನಿಂದ ಬಳಲುತ್ತಿದ್ದು, 2,514 ಜನರು ಸಾವನ್ನಪ್ಪಿದ್ದಾರೆ.
ಇನ್ನು ಇಟಲಿಯಲ್ಲಿ 97,689 ಕೇಸ್ಗಳಿಂದ ಸಾವಿನ ಸಂಖ್ಯೆ 10,779 ಆಗಿದೆ. ಇಟಲಿಯಲ್ಲೇ ಅತಿ ಹೆಚ್ಚು ಜನರು ಸಾವನ್ನಪ್ಪಿದ್ದು, ಸೋಂಕು ಹುಟ್ಟಿಕೊಂಡಿರುವ ಚೀನಾದಲ್ಲಿ 81,470 ಜನರು ಈ ವೈರಸ್ನಿಂದ ಬಳಲುತ್ತಿದ್ದು, ಸಾವಿನ ಸಂಖ್ಯೆ 3,304 ಆಗಿದೆ.
ಈ ಮಹಾಮಾರಿಯಿಂದ ಬಳಲುತ್ತಿರುವವರ ಸಂಖ್ಯೆ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದ್ದು, ಭಾರತದಲ್ಲೂ ವೈರಸ್ ಸೋಂಕಿತರ ಸಂಖ್ಯೆ ಈಗಾಗಲೇ ಸಾವಿರ ಗಡಿ ದಾಟಿದ್ದು, 28 ಜನರು ಸಾವನ್ನಪ್ಪಿದ್ದಾರೆ. ಮಹಾರಾಷ್ಟ್ರ, ಕೇರಳ ಹಾಗೂ ಕರ್ನಾಟಕದಲ್ಲಿ ಅತಿ ಹೆಚ್ಚು ಪ್ರಕರಣ ಕಂಡು ಬಂದಿವೆ.
