ಪ್ಯಾರಿಸ್: ಕೊರೊನಾ ವೈರಸ್ ಹಿಮ್ಮೆಟ್ಟಿಸಲು ಶತಪ್ರಯತ್ನ ಮಾಡುತ್ತಿರುವ ಫ್ರಾನ್ಸ್ ತನ್ನ ದೇಶದ ಆರೋಗ್ಯ ಸಿಬ್ಬಂದಿಗೆ ಮನಃಪೂರ್ವಕ ಧನ್ಯವಾದಗಳನ್ನು ತಿಳಿಸಿದೆ. ಐತಿಹಾಸಿಕ ಐಫೆಲ್ ಟವರ್ ಮೂಲಕ ಫ್ರಾನ್ಸ್ನ ಸಮಸ್ತ ಜನತೆಯ ಪರವಾಗಿ ವೈದ್ಯಕೀಯ ಸಿಬ್ಬಂದಿಯ ಕಾರ್ಯಕ್ಕೆ ಕೃತಜ್ಱತೆಗಳನ್ನು ಸಲ್ಲಿಸಲಾಯಿತು.
ಶುಕ್ರವಾರ ರಾತ್ರಿ ಐಫೆಲ್ ಟವರ್ ಮೇಲೆ ಜಗಮಗಿಸುವ ವಿದ್ಯುದ್ದೀಪಗಳ ಅಲಂಕಾರದಲ್ಲಿ 'ಥ್ಯಾಂಕ್ ಯೂ' 'ಮನೆಯಲ್ಲೇ ಇರಿ' ಎಂಬ ಸಂದೇಶಗಳು ಮೂಡಿ ಬಂದವು. ಸ್ಥಳೀಯ ಕಾಲಮಾನ ರಾತ್ರಿ 8 ಗಂಟೆಯಷ್ಟೊತ್ತಿಗೆ ಲಾಕ್ಡೌನ್ನಲ್ಲಿರುವ ಇಡೀ ಫ್ರಾನ್ಸ್ ಜನತೆ ತಮ್ಮ ಮನೆಗಳ ಮುಂದೆ, ಬಾಲ್ಕನಿಗಳಲ್ಲಿ ನಿಂತು ವೈದ್ಯಕೀಯ ಹಾಗೂ ಶುಶ್ರೂಷಕ ಸಿಬ್ಬಂದಿಯ ಸೇವೆಗೆ ಧನ್ಯವಾದಗಳನ್ನ ಅರ್ಪಿಸಿದರು. ಸರಿಯಾಗಿ ಇದೇ ಸಮಯದಲ್ಲಿ ಐಫೆಲ್ ಟವರ್ ಮೂಲಕ ಥ್ಯಾಂಕ್ ಯೂ ಸಂದೇಶ ಸಾರಲಾಯಿತು.
ಇನ್ನು ಮುಂದೆ 324 ಮೀಟರ್ ಎತ್ತರದ ಐಫೆಲ್ ಟವರ್ ಮೂಲಕ ಪ್ರತಿದಿನ ಸಂಜೆ ದೀಪ ಸಂದೇಶಗಳನ್ನು ಬಿತ್ತರಿಸಲಾಗುವುದು ಎಂದು ಪ್ಯಾರಿಸ್ ಮೇಯರ್ ಆ್ಯನೆ ಹಿಡಾಲ್ಗೊ ತಿಳಿಸಿದರು.
ಫ್ರಾನ್ಸ್ನಲ್ಲಿ ಶುಕ್ರವಾರ ಒಂದೇ ದಿನ 2,000 ಜನ ಕೋವಿಡ್ಗೆ ಬಲಿಯಾಗಿದ್ದಾರೆ. ಸುಮಾರು 3,800 ಐಸಿಯುಗಳಲ್ಲಿ ಭರ್ತಿಯಾಗಿರುವ ರೋಗಿಗಳ ಆರೈಕೆಗೆ ದೇಶದ ವೈದ್ಯಕೀಯ ಸಮುದಾಯ ಸತತವಾಗಿ ಶ್ರಮಿಸುತ್ತಿರುವುದನ್ನು ಇಲ್ಲಿ ಸ್ಮರಿಸಬಹುದು.
