ಜಪಾನ್/ಕೆನಡಾ: ಉಕ್ರೇನ್ ಪ್ರದೇಶಗಳನ್ನು ಆಕ್ರಮಿಸಿಕೊಂಡಿರುವ ರಷ್ಯಾದ ವಿರುದ್ಧ ಅಮೆರಿಕ ಆರ್ಥಿಕ ನಿರ್ಬಂಧ ಹೇರಿದ ಬೆನ್ನಲ್ಲೇ ಇದೀಗ ಕೆನಡಾ ಮತ್ತು ಜಪಾನ್ ದೇಶಗಳು ಕೂಡ ಕಠಿಣ ನಿರ್ಬಂಧಗಳನ್ನು ಪ್ರಕಟಿಸಿವೆ.
ಕೆನಡಾದ ಪ್ರಧಾನಮಂತ್ರಿ ಜಸ್ಟಿನ್ ಟ್ರುಡೊ ಮಂಗಳವಾರ ರಷ್ಯಾದ ಮೇಲೆ ಆರ್ಥಿಕ ನಿರ್ಬಂಧಗಳನ್ನು ಘೋಷಿಸಿದ್ದಾರೆ. ಇದೇ ವೇಳೆ ರಷ್ಯಾದ ನಡೆಯನ್ನು ಖಂಡಿಸಿರುವ ಅವರು, ಒಂದು ಸಾರ್ವಭೌಮ ದೇಶದ ಮೇಲೆ ಇಂತಹ ಆಕ್ರಮಣ ಸರಿಯಲ್ಲ. ರಷ್ಯಾದ ಈ ಕ್ರಮ ಸ್ವೀಕಾರಾರ್ಹವಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ರಷ್ಯಾದ ಬ್ಯಾಂಕ್ಗಳ ವಹಿವಾಟು, ಹಣಕಾಸು ಹೂಡಿಕೆ, ಹಣಕಾಸು ಒಪ್ಪಂದ, ರಷ್ಯಾ ನಿರ್ಮಿತ ವಸ್ತುಗಳ ಖರೀದಿ ತಡೆಯಂತಹ ನಿರ್ಬಂಧಗಳನ್ನು ವಿಧಿಸಿ ಜಸ್ಟಿನ್ ಟ್ರುಡೋ ಆದೇಶಿಸಿದ್ದಾರೆ.
ಜಪಾನ್ ನಿರ್ಬಂಧಗಳು: ಇನ್ನು ಜಪಾನ್ ಕೂಡ ರಷ್ಯಾದ ಮೇಲೆ ಕೆಲ ನಿರ್ಬಂಧಗಳನ್ನು ಹೇರಿದೆ. ಜಪಾನ್ನಲ್ಲಿ ರಷ್ಯಾ ಬೆಂಬಲಿತ ಬ್ಯಾಂಕ್ಗಳ ವಹಿವಾಟು ಸ್ಥಗಿತ, ರಷ್ಯಾ ಬಾಂಡ್ಗಳ ಮಾರಾಟಕ್ಕೆ ನಿಷೇಧ, ರಷ್ಯಾದ ಕೆಲ ವ್ಯಕ್ತಿಗಳ ಆಸ್ತಿಗಳನ್ನು ಸರ್ಕಾರ ತಟಸ್ಥಗೊಳಿಸಿದೆ. ಅಲ್ಲದೇ, ಜಪಾನ್ಗೆ ರಷ್ಯಾದಿಂದ ಯಾರೂ ಬರಕೂಡದು ಎಂದೂ ಆದೇಶಿಸಿದೆ.
ರಷ್ಯಾದ ಆಕ್ರಮಣ ಉಕ್ರೇನ್‌ನ ಸಾರ್ವಭೌಮತ್ವವನ್ನು ಹಾನಿಗೊಳಿಸುತ್ತದೆ. ಇದು ಅಂತಾರಾಷ್ಟ್ರೀಯ ಬದ್ಧತೆಗೆ ವಿರುದ್ಧವಾಗಿವೆ. ರಾಜತಾಂತ್ರಿಕ ಮಾತುಕತೆಗೆ ರಷ್ಯಾ ಮುಂದಾಗಬೇಕು ಎಂದು ಜಪಾನ್ ಪ್ರಧಾನಿ ಫುಮಿಯೋ ಕಿಶಿದಾ ಒತ್ತಾಯಿಸಿದ್ದಾರೆ.
ಈ ನಿರ್ಬಂಧಗಳ ಹೊರತಾಗಿಯೂ ರಷ್ಯಾ, ಉಕ್ರೇನ್ ಮೇಲೆ ಯುದ್ಧ ಸಾರಿದ್ದೇ ಆದಲ್ಲಿ ಇನ್ನೂ ಹೆಚ್ಚಿನ ನಿರ್ಬಂಧಗಳನ್ನು ವಿಧಿಸಲಾಗುವುದು ಎಂದು ಎಚ್ಚರಿಸಿದ್ದಾರೆ.
ಇದನ್ನೂ ಓದಿ: 'ರಷ್ಯಾದಿಂದ ಉಕ್ರೇನ್ ಮೇಲೆ ಅತಿಕ್ರಮಣ': ಹಲವು ರೀತಿಯ ಆರ್ಥಿಕ ನಿರ್ಬಂಧ ವಿಧಿಸಿದ ಅಮೆರಿಕ
