ಹಾಂಗ್ ಕಾಂಗ್: ಒಂದು ಬಾರಿ ಕೋವಿಡ್ ಸೋಂಕಿಗೆ ಒಳಗಾಗಿ ಅದರಿಂದ ಗುಣಮುಖನಾಗಿದ್ದ ಚೀನಾದ ಹಾಂಗ್ ಕಾಂಗ್ ಮೂಲದ ವ್ಯಕ್ತಿಯೋರ್ವನಿಗೆ ಇದೀಗ ಮತ್ತೊಮ್ಮೆ ವೈರಸ್ ಅಂಟಿರುವುದಾಗಿ ವಿಜ್ಞಾನಿಗಳು ತಿಳಿಸಿದ್ದಾರೆ.
ಒಂದು ಬಾರಿ ಕೊರೊನಾಗೆ ಒಳಗಾಗಿ ಗುಣಮುಖರಾದವರಿಗೆ ಮತ್ತೆ ಸೋಂಕು ತಗುಲುವ ಸಾಧ್ಯತೆ ತೀರಾ ಕಡಿಮೆ ಎಂದು ಹೇಳಲಾಗಿತ್ತು. ಆದರೆ ಈ ಕಲ್ಪನೆ ಸತ್ಯವಲ್ಲ ಹಾಗೂ ವೈರಸ್ ವಿರುದ್ಧದ ರೋಗ ನಿರೋಧಕ ಶಕ್ತಿ ಜೀವನ ಪರ್ಯಂತ ಇರುವುದಿಲ್ಲ ಎಂಬುದು ಸಾಬೀತಾಗಿದೆ.
ಕೆಲ ದಿನಗಳ ಹಿಂದೆ ಸ್ಪೇನ್‌ನಿಂದ ಹಾಂಗ್ ಕಾಂಗ್‌ಗೆ ಹಿಂದಿರುಗಿದ್ದ 33 ವರ್ಷದ ವ್ಯಕ್ತಿಯೊಬ್ಬನಿಗೆ ಮತ್ತೆ ಸೋಂಕು ದೃಢಪಟ್ಟಿದೆ. ಈತನಿಗೆ ಕಳೆದ ಮಾರ್ಚ್ನಲ್ಲಿ ಸೋಂಕು ತಗುಲಿ ಅದರಿಂದ ಚೇತರಿಸಿಕೊಂಡಿದ್ದ. ಇಲ್ಲಿ ಗಮನಿಸಬೇಕಾದ ಇನ್ನೊಂದು ಅಂಶವೆಂದರೆ ಮೊದಲ ಬಾರಿಗಿಂತಲೂ ಎರಡನೇ ಬಾರಿಯ ಕೊರೊನಾ ವೈರಸ್ ವಿಭಿನ್ನವಾಗಿದೆ ಎಂದು ಹಾಂಗ್ ಕಾಂಗ್ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ಮಾಹಿತಿ ನೀಡಿದ್ದಾರೆ.
ಅಂದರೆ ಲಕ್ಷಣಗಳನ್ನಾಧರಿಸಿ O, A2, A2a, A3, B, B1 ಎಂದು ಹೀಗೆ ಒಟ್ಟು 11 ರೀತಿಯಲ್ಲಿ ಕೋವಿಡ್ ವೈರಸ್ಅನ್ನು ವಿಂಗಡಣೆ ಮಾಡಲಾಗಿದೆ. ಆದರೆ ಈ ವ್ಯಕ್ತಿಯಲ್ಲಿ 2ನೇ ಬಾರಿ ಕಾಣಿಸಿಕೊಂಡಿರುವ ವೈರಸ್ ಇವೆಲ್ಲಾ ಲಕ್ಷಣಗಳಿಗಿಂತ ವಿಭಿನ್ನವಾಗಿದೆ.
ಹೀಗಾಗಿ ಒಮ್ಮೆ ಕೊರೊನಾ ಬಂದು ಹೋಗಿದೆಯೆಂದು ಯಾರೊಬ್ಬರೂ ಕೂಡ ನಿರ್ಲಕ್ಷ್ಯ ವಹಿಸಬಾರದು. ಮಾಸ್ಕ್ ಧರಿಸುವುದು, ಸಾಮಾಜಿಕ ಅಂತರ ಕಾಪಾಡಿಕೊಳ್ಳವುದು ಸೇರಿದಂತೆ ಮುಂಜಾಗ್ರತಾ ಕ್ರಮಗಳನ್ನು ಪಾಲಿಸಬೇಕೆಂದು ಆರೋಗ್ಯಾಧಿಕಾರಿಗಳು ಹೇಳುತ್ತಾರೆ.
