ಕಾಬೂಲ್ (ಅಫ್ಘಾನಿಸ್ತಾನ): ಆಫ್ಘನ್ ಸರ್ಕಾರದಲ್ಲಿದ್ದ ಅಧಿಕಾರಿಗಳ ಇಮೇಲ್(e-mail) ಗಳನ್ನು ಬಳಸಲು ತಾಲಿಬಾನಿಗಳು ಯತ್ನಿಸಿದ್ದು, ಸರ್ಕಾರಿ ಇಮೇಲ್ ಖಾತೆಗಳನ್ನು ಗೂಗಲ್(Google) ತಾತ್ಕಾಲಿಕವಾಗಿ ಲಾಕ್ ಮಾಡಿದೆ.
ನಾವು ನಿರಂತರವಾಗಿ ಅಫ್ಘಾನಿಸ್ತಾನದ ಪರಿಸ್ಥಿತಿಯ ಅವಲೋಕನ ಮಾಡುತ್ತಿದ್ದೇವೆ. ಸರ್ಕಾರದ ಕೆಲವು ಇಮೇಲ್‌ಗಳ ಸುರಕ್ಷತೆ ಹಾಗೂ ಭದ್ರತೆಗಾಗಿ ತಜ್ಞರೊಂದಿಗೆ ಸಮಾಲೋಚಿಸಿ ನಾವು ಈ ಕ್ರಮ ಕೈಗೊಂಡಿದ್ದೇವೆ. ಆದರೆ ಇದು ತಾತ್ಕಾಲಿಕ ಮಾತ್ರ. ಶಾಶ್ವತವಾಗಿ ಲಾಕ್ ಮಾಡಿಲ್ಲ ಎಂದು ಗೂಗಲ್ ವಕ್ತಾರರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಆಫ್ಘನ್ ಸರ್ಕಾರದ ಮಾಜಿ ಅಧಿಕಾರಿಗಳನ್ನು ಪತ್ತೆಹಚ್ಚಲು ತಾಲಿಬಾನ್ ಉಗ್ರರು ಇಮೇಲ್‌ಗಳನ್ನು ಬಳಸಬಹುದು. ಹಣಕಾಸು, ಕೈಗಾರಿಕೆ, ಉನ್ನತ ಶಿಕ್ಷಣ, ಗಣಿ ಸೇರಿದಂತೆ ಎಲ್ಲಾ ಸಚಿವಾಲಯಗಳ ಅಧಿಕಾರಿಗಳು ಅಧಿಕೃತ ಸಂವಹನಕ್ಕಾಗಿ ಗೂಗಲ್ ಅನ್ನು ಬಳಸಿದ್ದಾರೆ. ಇಡೀ ಅಫ್ಘಾನಿಸ್ತಾನವನ್ನು ವಶಪಡಿಸಿಕೊಂಡಿರುವ ತಾಲಿಬಾನ್ಗೆ ಅಲ್ಲಿ ನೂತನ ಸರ್ಕಾರ ಸ್ಥಾಪಿಸಬೇಕೆಂದರೆ ಅಥವಾ ಸ್ಥಾಪಿಸಿದ ಮೇಲೂ ಹಳೆಯ ಪ್ರಮುಖ ದಾಖಲೆಗಳು ಬೇಕೇ ಬೇಕು. ಹೀಗಾಗಿ ಗೂಗಲ್ನಲ್ಲಿ ದಾಖಲಾಗಿರುವ ಮಾಹಿತಿಗಳನ್ನು ಪಡೆಯಲು ಇನ್ನಿಲ್ಲದ ಪ್ರಯತ್ಮ ಮಾಡುತ್ತಿದ್ದಾರೆ.
ಇದನ್ನೂ ಓದಿ: ತಾಲಿಬಾನಿಗಳ ವಿರುದ್ಧ ಪ್ರತಿರೋಧ ಮುಂದುವರಿಯುತ್ತಲೇ ಇರುತ್ತದೆ: ಸ್ವಯಂಘೋಷಿತ ಅಧ್ಯಕ್ಷ ಸಲೇಹ
ಈ ಹಿಂದೆ ಕೂಡ ಅಂದರೆ ಜುಲೈ ತಿಂಗಳ ಕೊನೆಯಲ್ಲಿ ಸರ್ಕಾರದ ಉದ್ಯೋಗಿಯೊಬ್ಬರ ಬಳಿ ಅವರು ಸೇವೆಯಲ್ಲಿದ್ದ ಸಚಿವಾಲಯದ ಡೇಟಾವನ್ನು ಸೇವ್ ಮಾಡಿಡುವಂತೆ ಉಗ್ರರು ಬೆದರಿಕೆ ಹಾಕಿದ್ದರು. ಆದರೆ ಆ ಉದ್ಯೋಗಿ ಇದಕ್ಕೆ ನಿರಾಕರಿಸಿದ್ದು, ಈಗ ತಲೆಮರೆಸಿಕೊಂಡಿದ್ದಾರೆ.
ಗೂಗಲ್, ಇದು ನಿಜವಾದ ಮಾಹಿತಿಯ ಸಂಪತ್ತನ್ನು ನೀಡುತ್ತದೆ. ಆದರೆ ಗೂಗಲ್ ಶೀಟ್‌ನಲ್ಲಿ ಸರ್ಕಾರಿ ಉದ್ಯೋಗಿಗಳ ಪಟ್ಟಿ ಇರುವುದು ಕೂಡ ಬಹುದೊಡ್ಡ ಸಮಸ್ಯೆಯಾಗಿದೆ ಎಂದು ಇಂಟರ್ನೆಟ್ ಗುಪ್ತಚರ ಸಂಸ್ಥೆ ಡೊಮೈನ್ ಟೂಲ್ಸ್‌ನ ಭದ್ರತಾ ಸಂಶೋಧಕ ಚಾಡ್ ಆ್ಯಂಡರ್ಸನ್ ಹೇಳಿದ್ದಾರೆ.
