ಬೀಜಿಂಗ್: ಮೂವರು ಗಗನಯಾತ್ರಿಗಳನ್ನು ಹೊತ್ತ ಶೆನ್ಶಾವ್-12 ಆಕಾಶನೌಕೆಯನ್ನು ಚೀನಾ ಯಶಸ್ವಿಯಾಗಿ ಉಡಾಯಿಸಿದೆ. ಸ್ವದೇಶಿಯಾಗಿರುವ ನೂತನ ಬಾಹ್ಯಾಕಾಶ ನಿಲ್ದಾಣಕ್ಕೆ ಮೊದಲ ಬ್ಯಾಚ್ನ ಗಗನಯಾತ್ರಿಗಳನ್ನು ಆ ದೇಶ ಕಳುಹಿಸಿಕೊಟ್ಟಿದೆ. ಇವರು ಮೂರು ತಿಂಗಳುಗಳ ಕಾಲ ಬಾಹ್ಯಾಕಾಶ ನಿಲ್ದಾಣದಲ್ಲಿ ತಂಗಲಿದ್ದು ಸಂಶೋಧನೆಗಳನ್ನು ನಡೆಸಲಿದ್ದಾರೆ.
ಶೆನ್ಶಾವ್-12, ಇದು 'ಟಿಯಾಂಗಾಂಗ್ ಬಾಹ್ಯಾಕಾಶ ನಿಲ್ದಾಣ' ನಿರ್ಮಿಸಲು ಸ್ಥಾಪನೆಯಾದ 11 ಮಿಷನ್ಗಳ ಪೈಕಿ ಮೂರನೇಯದ್ದಾಗಿದೆ. ನಿಯೆ ಹೈಶೆಂಗ್, ಲಿಯು ಬೋಮಿಂಗ್ ಮತ್ತು ಟ್ಯಾಂಗ್ ಹಾಂಗ್ಬೊ ಎಂಬ ಮೂವರು ಗಗನಯಾತ್ರಿಗಳು ಶೆನ್ಶಾವ್-12 ಆಕಾಶನೌಕೆ ಮೂಲಕ ಬಾಹ್ಯಾಕಾಶ ನಿಲ್ದಾಣಕ್ಕೆ ತೆರಳಿದ್ದಾರೆ.
ಇವರು ತೆರಳುವ ಮುನ್ನ ಚೀನಾದ ಇನ್ನರ್ ಮಂಗೋಲಿಯಾದಲ್ಲಿರುವ ಜಿಯುಕ್ವಾನ್ ಉಪಗ್ರಹ ಉಡ್ಡಯನ ಕೇಂದ್ರದಲ್ಲಿ ಕೇಂದ್ರ ಮಿಲಿಟರಿ ಆಯೋಗದ ಉಪಾಧ್ಯಕ್ಷ ಕ್ಸು ಕಿಲಿಯಾಂಗ್ ಗಗನಯಾತ್ರಿಗಳನ್ನು ಭೇಟಿಯಾಗಿ, ಸಂಭ್ರಮದಿಂದ ಇವರನ್ನು ಕಳುಹಿಸಿಕೊಡಲಾಯಿತು.
ಬಾಹ್ಯಾಕಾಶ ನಿಲ್ದಾಣ ನಿರ್ಮಾಣ ಕಾಮಗಾರಿಯನ್ನು ಮುಂದಿನ ವರ್ಷದೊಳಗೆ ಪೂರ್ಣಗೊಳಿಸುವ ಗುರಿಯನ್ನು ಚೀನಾ ಹೊಂದಿದೆ.
