ವಾಷಿಂಗ್ಟನ್: ಈಗಾಗಲೇ ಹಲವಾರು ಆತಂಕಗಳನ್ನು ಎದುರಿಸುತ್ತಿರುವ ಟ್ರಂಪ್ ಆಡಳಿತ ಭಾರತ- ರಷ್ಯಾದ ಎಸ್- 400 ಕ್ಷಿಪಣಿ ಒಪ್ಪಂದದಿಂದ ಬೆದರಿದೆ. ಈ ಒಪ್ಪಂದದಿಂದ ಹಿಂದೆ ಸರಿಯುವಂತೆ ಭಾರತದ ಮೇಲೆ ಒತ್ತಡ ಹೇರುತ್ತಿದೆ. ಎಸ್-400 ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯನ್ನ ಖರೀದಿಸದಂತೆ ಒತ್ತಡ ಹೇರಲು ಆರಂಭಿಸಿದೆ.
ಭಾರತವು ರಷ್ಯಾದಿಂದ ಶಸ್ತ್ರಾಸ್ತ್ರಗಳನ್ನು ಖರೀದಿಸದಂತೆ ಅಮೆರಿಕ ನೀಡಿದ ಎಚ್ಚರಿಕೆ ನಡುವೆಯೇ ಮೋದಿ-ಪುಟಿನ್ ಎಸ್-400 ಕ್ಷಿಪಣಿ ವ್ಯವಸ್ಥೆ ಖರೀದಿ ಒಪ್ಪಂದಕ್ಕೆ ಸಹಿ ಹಾಕಿದ್ದರು. ಈ ಒಪ್ಪಂದವು ಭಾರತದ ವಾಯು ಪಡೆಯ ಸಾಮರ್ಥ್ಯದ ವೃದ್ಧಿಗೆ ನೆರವಾಗುತ್ತದೆ. ಆದರೆ, ಮತ್ತೆ ಭಾರತದ ಮನವೊಲಿಕೆಗೆ ಮುಂದಾಗಿರುವ ಅಮೆರಿಕ ಭಾರತ ಎಸ್ - 400 ಕ್ಷಿಪಣಿ ವ್ಯವಸ್ಥೆ ಖರೀದಿಸುವ ನಿರ್ಧಾರವನ್ನು ಕೈಬಿಟ್ಟರೆ ವಾಷಿಂಗ್ಟನ್, ತನ್ನ ಉನ್ನತ ಶ್ರೇಣಿಯ ಟರ್ಮಿನಲ್ ಹೈ ಆಲ್ಟಿಟ್ಯೂಡ್ ಏರಿಯಾ ಡಿಫೆನ್ಸ್ (ಥಾಡ್) ಮತ್ತು ಪೇಟ್ರಿಯಾಟ್-3 ಕ್ಷಿಪಣಿಗಳ ರಕ್ಷಣಾ ವ್ಯವಸ್ಥೆಗಳನ್ನು ಭಾರತಕ್ಕೆ ಮಾರಾಟ ಮಾಡಲು ಸಿದ್ಧವಾಗಿದೆ ಎಂದು ತಿಳಿಸಿದೆ. ಆದರೆ, ರಷ್ಯಾ ರಕ್ಷಣಾ ಕ್ಷೇತ್ರಕ್ಕೆ ಹಣದ ಹರಿವನ್ನು ತಡೆಗಟ್ಟುವುದೇ ಅಮೆರಿಕದ ಉದ್ದೇಶವಾಗಿದೆ.
ಏಷ್ಯಾ ಫೆಸಿಪಿಕ್ನಲ್ಲಿ ಚೀನಾ ಪ್ರಾಬಲ್ಯವನ್ನ ತಡೆಗಟ್ಟಲು ಅಮೆರಿಕಕ್ಕೆ ಭಾರತದ ನೆರವು ಬೇಕು. ಏಷ್ಯಾ ಫೆಸಿಫಿಕ್ ಮಹಾಸಾಗರದಲ್ಲಿ ಅಮೆರಿಕ - ಭಾರತ ಹಾಗೂ ಜಪಾನ್ ಪರಸ್ಪರ ಸಹಕಾರಕ್ಕೆ ಮುಂದಾಗಿವೆ. ಈ ಮೂಲಕ ಚೀನಾವನ್ನ ಕಟ್ಟಿ ಹಾಕಲು ಮೂರೂ ರಾಷ್ಟ್ರಗಳು ಮುಂದಾಗಿವೆ. ಒಂದ್ಕಡೆ ಇಂಡಿಯಾ ಸಹಕಾರ ಬೇಕು. ಆದರೆ ರಷ್ಯಾದೊಂದಿಗೆ ಎಸ್- 400 ಒಪ್ಪಂದ ಬೇಡ ಎಂಬುದು ಅಮೆರಿಕದ ನೀತಿ.
ಈ ನಡುವೆ, ಭಾರತದ ವಿರುದ್ಧವೂ ಸಣ್ಣದಾಗಿ ಟ್ರಂಪ್ ವ್ಯಾಪಾರ ಯುದ್ಧ ಆರಂಭಿಸಿದ್ದು, ಅಮೆರಿಕಕ್ಕೆ ಮಾರಕವಾಗಿರುವ ಭಾರತದ ವ್ಯಾಪಾರಕ್ಕೆ ಈಗಾಗಲೇ ಟ್ರಂಪ್ ಎಳ್ಳು ನೀರು ಬಿಟ್ಟಿದ್ದಾರೆ. ಇಷ್ಟೆಲ್ಲ ಗೊಂದಲಗಳ ಮಧ್ಯೆಯೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ಪ್ರಭಾವ ಹಾಗೂ ಪ್ರಾಬಲ್ಯ ಹೆಚ್ಚಾಗುತ್ತಿದ್ದು, ಚೀನಾ ನಾಗಾಲೋಟಕ್ಕೆ ತಡೆಯೊಡ್ಡಲು ಮೋದಿ ನೆರವು ಈಗ ಬೇಕೇ ಬೇಕು. ಈ ಸಂದಿಗ್ದಲ್ಲಿರುವ ಅಮೆರಿಕ ರಷ್ಯಾ ಜತೆಗಿನ ಒಪ್ಪಂದ ಮುರಿದುಕೊಳ್ಳಲು ಆಮಿಷವೊಡ್ಡಲು ಮುಂದಾಗಿದೆ.
ಈ ಹಿನ್ನೆಲೆಯಲ್ಲೇ ಅಮೆರಿಕಾ ಅಧ್ಯಕ್ಷ ಟ್ರಂಪ್ ಮತ್ತು ಪ್ರಧಾನಿ ನರೇಂದ್ರ ಮೋದಿಯವರ ಒಸಾಕಾದಲ್ಲಿ ನಡೆಯಲಿರುವ ಜಿ-20 ಶೃಂಗಸಭೆಯಲ್ಲಿ ಭೇಟಿ ಮಾಡುವ ಮೊದಲೇ ಯುಎಸ್ನ ಸಂಸದರು ಹಾಗೂ ವಿದೇಶಾಂಗ ಕಾರ್ಯದರ್ಶಿ ಮೈಕ್ ಪೊಂಪಿಯೊ ಭಾರತಕ್ಕೆ ಭೇಟಿ ನೀಡಿ ಒಪ್ಪಂದ ಹಿಂಪಡೆಯುವ ಕುರಿತು ಚರ್ಚಿಸಲಿದ್ದಾರೆ.
ಅಮೆರಿಕದ ಈ ತೀರ್ಮಾನ ಭಾರಿ ಕುತೂಹಲಕ್ಕೆ ಕಾರಣವಾಗಿದೆ. ಅಮೆರಿಕದ ಈ ಲಾಬಿಗೆ ಪ್ರಧಾನಿ ಮೋದಿ ಬಗ್ಗುವರೇ ಎನ್ನುವುದು ಸದ್ಯಕ್ಕಿರುವ ಪ್ರಶ್ನೆ.
