ಚುನಾವಣೆ ಗೆಲ್ಲಲು ಟ್ರಂಪ್​ ಕಸರತ್ತು: ಹೂಸ್ಟನ್​​​ನಲ್ಲಿ​ ಬೆಂಬಲಿಗರಿಂದ ಕಾರ್​ ಪರೇಡ್​

ಅಮೆರಿಕ ಅಧ್ಯಕ್ಷೀಯ ಚುನಾವಣೆಯ ಭಾಗವಾಗಿ ಅತ್ಯಂತ ಪ್ರಮುಖ ರಾಜ್ಯ ಟೆಕ್ಸಾಸ್​ನ ಹೂಸ್ಟನ್ ನಗರದಲ್ಲಿ ಟ್ರಂಪ್ ಬೆಂಬಲಿಗರು ಕಾರ್​ ಪರೇಡ್​ ನಡೆಸಿದರು.

ವಾಷಿಂಗ್ಟನ್ : ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬೆಂಬಲಿಗರು ದೇಶದ ನಾಲ್ಕನೇ ಅತಿದೊಡ್ಡ ನಗರವಾದ ಹೂಸ್ಟನ್‌ನಲ್ಲಿ ಕಾರ್ ಪರೇಡ್ ಆಯೋಜಿಸಿದ್ದರು.

ಭಾನುವಾರ ನಡೆದ ಕಾರು ಪರೇಡ್​ನಿಂದ ನಗರದ ಹೆದ್ದಾರಿಯುದ್ದಕ್ಕೂ ಸುಮಾರು 11.2 ಕಿ.ಮೀ ಭಾರಿ ಸಂಚಾರ ದಟ್ಟಣೆ ಉಂಟಾಗಿತ್ತು ಎಂದು ಹೂಸ್ಟನ್ ಪೊಲೀಸ್ ಮುಖ್ಯಸ್ಥ ಆರ್ಟ್ ಅಸೆವೆಡೊ ತಿಳಿಸಿದ್ದಾರೆ. ಸಂಚಾರ ದಟ್ಟಣೆಯ ಹಿನ್ನೆಲೆ ಸೌತ್​ ಲೂಪ್ 610 ಮಾರ್ಗದ ಸಂಚಾರ ಬದಲಿಸುವಂತೆ ಸಾರ್ವಜನಿಕರಿಗೆ ಪೊಲೀಸರು ಸೂಚಿಸಿದ್ದರು.

ಟೆಕ್ಸಾಸ್ ರಾಜ್ಯದಲ್ಲಿ ಟ್ರಂಪ್ ಪರ ಚುನಾವಣಾ ಪ್ರಚಾರ ನಡೆಸುವ ಸಲುವಾಗಿ ಭಾನುವಾರದ ಕಾರ್​ ಪರೇಡ್​ ಹಮ್ಮಿಕೊಳ್ಳಲಾಗಿತ್ತು. ಅಧ್ಯಕ್ಷೀಯ ಚುನಾವಣೆಯಲ್ಲಿ ಟೆಕ್ಸಾಸ್​ ಅತ್ಯಂತ ಪ್ರಮುಖ ರಾಜ್ಯವೆಂದು ಪರಿಗಣಿಸಲಾಗಿದೆ.

2016 ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಟ್ರಂಪ್ ಒಟ್ಟು 52.23 ರಷ್ಟು ಮತಗಳ ಮೂಲಕ ಜಯಗಳಿಸಿದ್ದರು. ಅವರು ಪ್ರತಿಸ್ಪರ್ಧಿ ಡೆಮಾಕ್ರಟಿಕ್ ಪಕ್ಷದ ಅಭ್ಯರ್ಥಿ ಹಿಲರಿ ಕ್ಲಿಂಟನ್​​​ 43.24 ರಷ್ಟು ಮತ ಗಳಿಸಿದ್ದರು. ಇತ್ತೀಚಿನ ಸಿಎನ್‌ಎನ್ ಸಮೀಕ್ಷೆಯ ಪ್ರಕಾರ, ಟ್ರಂಪ್​ ಪ್ರಸ್ತುತ ಶೇಕಡಾ 48 ರಿಂದ 46 ರಷ್ಟು ಮತಗಳ ಅಂತರದಲ್ಲಿ ಡೆಮಾಕ್ರಟಿಕ್ ಪಕ್ಷದ ಅಭ್ಯರ್ಥಿ ಜೋ ಬೈಡನ್​ಗಿಂತ ಇಲ್ಲಿ ಮುನ್ನಡೆ ಸಾಧಿಸಿದ್ದಾರೆ.