ನ್ಯೂಯಾರ್ಕ್: ಚೀನಾದಲ್ಲಿ ಹುಟ್ಟಿಕೊಂಡು ವಿಶ್ವದೆಲ್ಲೆಡೆ ಹಬ್ಬಿರುವ ಹೆಮ್ಮಾರಿ ಕೊರೊನಾ ಅನೇಕ ದೇಶಗಳಲ್ಲಿ ಮಾರಣಹೋಮವನ್ನೇ ನಡೆಸಿದೆ. ಅದ್ರಲ್ಲೂ ಪ್ರಮುಖವಾಗಿ ವೈರಾಣು ತಂದಿಟ್ಟ ಅವಾಂತರಕ್ಕೆ ದೊಡ್ಡಣ್ಣನ ಜಂಘಾಬಲವೇ ಉಡುಗಿದೆ.
ಇಲ್ಲಿಯವರೆಗೆ ಇಂಗ್ಲೆಂಡ್ನಲ್ಲಿ 83,135, ಚೀನಾದಲ್ಲಿ 71,185, ಹಾಗೂ ಇರಾನ್ನಲ್ಲಿ 71,686 ಸೋಂಕಿತ ಪ್ರಕರಣಗಳು ಕಂಡು ಬಂದಿವೆ. ಅಮೆರಿಕದಲ್ಲಿ 5,57,300 ಪ್ರಕರಣ ಕಾಣಿಸಿಕೊಂಡಿವೆ.
ಪ್ರಪಂಚದಾದ್ಯಂತ 1.8 ಮಿಲಿಯನ್ ಜನರಲ್ಲಿ ಅಂದ್ರೆ 18 ಲಕ್ಷ ಜನರಲ್ಲಿ ರೋಗದ ಲಕ್ಷಣಗಳು ಕಾಣಿಸಿಕೊಂಡಿವೆ. ಇಲ್ಲಿಯವರೆಗೆ 1,14,185 ಜನರು ಸೋಂಕಿನಿಂದ ಹೋರಾಡಿ ಉಸಿರು ನಿಲ್ಲಿಸಿದ್ದಾರೆ. ಆಘಾತಕಾರಿ ವಿಚಾರ ಏನಪ್ಪಾ ಅಂದ್ರೆ, ಅಮೆರಿಕದ ನ್ಯೂಯಾರ್ಕ್ ನಗರದಲ್ಲಿ 1,89,000 ಪ್ರಕರಣಗಳು ಪತ್ತೆಯಾಗಿದ್ದು 9,385 ಜನರು ಸಾವನ್ನಪ್ಪಿದ್ದಾರೆ.
ನ್ಯೂಯಾರ್ಕ್ ಸಿಟಿಯಲ್ಲಿ ದಿನದಿಂದ ದಿನಕ್ಕೆ ಹೆಚ್ಚು ಜನರು ಸಾವನ್ನಪ್ಪುತ್ತಿದ್ದು, ಕೊರೊನಾ ನಿಯಂತ್ರಣಕ್ಕೆ ಬರುತ್ತಿಲ್ಲ ಎಂಬುದು ಇದರಿಂದ ಅರಿವಾಗುತ್ತಿದೆ.
ಇನ್ನು ಇಟಲಿ ಮತ್ತು ಸ್ಪೇನ್‌ನಲ್ಲಿ ವೈರಸ್ ಸಾವಿನ ಸಂಖ್ಯೆ ಕಡಿಮೆಯಾಗುತ್ತಿದ್ದರೆ, ಬ್ರಿಟನ್‌ ಮತ್ತು ಯುರೋಪ್‌ನಲ್ಲಿ ಹೆಚ್ಚು ವೈರಸ್ ಸಾವುನೋವು ಸಂಭವಿಸುತ್ತಿರುವುದು ತಲ್ಲಣ ಸೃಷ್ಟಿಸಿದೆ.
ನ್ಯೂಯಾರ್ಕ್ ಭಾರಿ ಸಂಕಷ್ಟಕ್ಕೊಳಗಾಗಿರುವ ಕಾರಣ ಜನರು, ವೈದ್ಯರು ಹಾಗೂ ಸ್ವಯಂಸೇವಕರು ದಿನದ ಇಪ್ಪತ್ನಾಲ್ಕು ಗಂಟೆಗಳ ಕಾಲ ಕೆಲಸ ಮಾಡುತ್ತಿದ್ದಾರೆ. ಆಸ್ಪತ್ರೆಯಲ್ಲಿನ ವೈದ್ಯರು ದಿನಪೂರ್ತಿ ಚಿಕಿತ್ಸೆಯಲ್ಲಿಯೇ ತೊಡಗಿದ್ದಾರೆ. ಇದರ ಹೊರತಾಗಿಯೂ ಕೂಡ ಮಹಾಮಾರಿಯ ಆರ್ಭಟ ನಿಲ್ಲುತ್ತಿಲ್ಲ.
