Zomato New Name : ಪ್ರಮುಖ ಆಹಾರ ವಿತರಣಾ ವೇದಿಕೆಯಾಗಿರುವ ಜೊಮ್ಯಾಟೊಗೆ ಸಂಬಂಧಿಸಿದಂತೆ ಒಂದು ದೊಡ್ಡ ಸುದ್ದಿ ಹೊರ ಬಿದ್ದಿದೆ. ಬೋರ್ಡ್ ಮೀಟಿಂಗ್ನಲ್ಲಿ ಕಂಪನಿ ತನ್ನ ಹೆಸರನ್ನು ಬದಲಾಯಿಸಲು ಅನುಮೋದಿಸಿದೆ. ಈಗ ಜೊಮ್ಯಾಟೊ ಹೆಸರನ್ನು ಎಟರ್ನಲ್ ಎಂದು ಬದಲಾಯಿಸಲಾಗಿದೆ.
ಫೆಬ್ರವರಿ 6 ರಂದು ಕಂಪನಿಯಲ್ಲಿ ನಡೆದ ಬೋರ್ಡ್ ಮೀಟಿಂಗ್ನಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಕಂಪನಿಯು ಬಿಎಸ್‌ಇಗೆ ಸಲ್ಲಿಸಿದ ಫೈಲಿಂಗ್‌ನಲ್ಲಿ ಈ ಬಗ್ಗೆ ತಿಳಿಸಿದೆ. ಇದರಲ್ಲಿ ಜೊಮ್ಯಾಟೊ ಸಿಇಒ ದೀಪಿಂದರ್ ಗೋಯಲ್ ಅವರು ಕಂಪನಿಗೆ "ಎಟರ್ನಲ್" ಎಂಬ ಪದವನ್ನು ಬಹಳ ಸಮಯದಿಂದ ಬಳಸುತ್ತಿದ್ದೇವೆ ಎಂದು ಹೇಳಿದ್ದಾರೆ.
ನಾವು ಬ್ಲಿಂಕಿಂಟ್ ಅನ್ನು ಸ್ವಾಧೀನಪಡಿಸಿಕೊಂಡಾಗಿನಿಂದ ಕಂಪನಿ ಮತ್ತು ಬ್ರ್ಯಾಂಡ್/ಆ್ಯಪ್ ನಡುವೆ ವ್ಯತ್ಯಾಸವನ್ನು ಗುರುತಿಸಲು ಜೊಮ್ಯಾಟೊ ಬದಲಿಗೆ ಎಟರ್ನಲ್ ಎಂದು ಕರೆಯಲು ಪ್ರಾರಂಭಿಸಿದ್ದೇವೆ. ಜೊಮ್ಯಾಟೊ ಹೊರತುಪಡಿಸಿ ನಮ್ಮ ಬೇರೆ ಯಾವುದೇ ಉತ್ಪನ್ನಗಳು ನಮ್ಮ ಭವಿಷ್ಯಕ್ಕೆ ಮುಖ್ಯವಾದರೆ ನಾವು ಕಂಪನಿಯ ಹೆಸರನ್ನು ಸಾರ್ವಜನಿಕವಾಗಿ ಎಟರ್ನಲ್ ಎಂದು ಬದಲಾಯಿಸುತ್ತೇವೆ ಅಂತಾ ನಾವು ಆಗ ಯೋಚಿಸಿದ್ದೆವು. ಇಂದು ಬ್ಲಿಂಕಿಂಟ್‌ನೊಂದಿಗೆ ನಾವು ಈ ಕಾರ್ಯಕ್ಕೆ ತಲುಪಿದ್ದೇವೆ. ನಾವು ಜೊಮ್ಯಾಟೊ ಲಿಮಿಟೆಡ್ ಕಂಪನಿಯ ಹೆಸರನ್ನು (ಬ್ರಾಂಡ್ ಮತ್ತು ಅಪ್ಲಿಕೇಶನ್ ಅಲ್ಲ) ಎಟರ್ನಲ್ ಎಂದು ಬದಲಾಯಿಸುತ್ತಿದ್ದೇವೆ ಅಂತಾ ಗೋಯಲ್ ಸ್ಪಷ್ಟಪಡಿಸಿದರು.
ಎಟರ್ನಲ್ ಅರ್ಥವೇನು? ಎಟರ್ನಲ್ ಲ್ಯಾಟಿನ್ ಮತ್ತು ಇಟಾಲಿಯನ್ ಭಾಷೆಯಿಂದ ಬಂದಿದ್ದು, ಇದರರ್ಥ ಕನ್ನಡದಲ್ಲಿ ಅಮರ ಅಥವಾ ಶಾಶ್ವತ ಎಂದು ಕರೆಯಲಾಗುತ್ತಿದೆ. ಅಮರ ಎಂದ್ರೆ ಎಂದಿಗೂ ಸಾವಿಲ್ಲ ಎಂದರ್ಥ.
ಜೊಮಾಟೊ ಸ್ಟಾಕ್ : ಇಂದು ಜೊಮ್ಯಾಟೊ ಷೇರುಗಳು NSE ನಲ್ಲಿ ಶೇ.1.22 ರಷ್ಟು ಕುಸಿತ ಕಂಡು 229.90 ರೂ.ಗಳಲ್ಲಿ ಮುಕ್ತಾಯಗೊಂಡವು. ಆದರೂ ಕಳೆದ 5 ಅವಧಿಗಳಲ್ಲಿ ಈ ಷೇರು ಶೇ. 5 ರಷ್ಟು ಏರಿಕೆಯಾಗಿರುವುದು ಗಮನಾರ್ಹ.. ಈ ವರ್ಷ ಇಲ್ಲಿಯವರೆಗೆ ಜೊಮ್ಯಾಟೊ ಷೇರುಗಳು ಶೇಕಡಾ 16 ಕ್ಕಿಂತ ಹೆಚ್ಚು ಕುಸಿದಿವೆ. ಮುಂದಿನ ತಿಂಗಳು ಜೊಮ್ಯಾಟೊ NSE ಯ ಮುಖ್ಯ ಸೂಚ್ಯಂಕ ನಿಫ್ಟಿಯಲ್ಲಿ ಸ್ಥಾನ ಪಡೆಯಬಹುದಾಗಿದೆ.
ತ್ರೈಮಾಸಿಕ ಫಲಿತಾಂಶಗಳು : 2024-25ನೇ ಹಣಕಾಸು ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ಜೊಮ್ಯಾಟೊ ನಿರಾಶದಾಯಕ ಫಲಿತಾಂಶಗಳನ್ನು ಎದುರಿಸಿತು. ಕಂಪನಿಯ ಆದಾಯವು ಶೇ. 65 ರಷ್ಟು ಹೆಚ್ಚಾಗಿ 5,404 ಕೋಟಿ ರೂ.ಗಳಿಗೆ ತಲುಪಿದೆ. ಆದರೆ ಲಾಭವು ಶೇ. 57 ರಷ್ಟು ಕುಸಿದು 59 ಕೋಟಿ ರೂ.ಗಳಿಗೆ ತಲುಪಿರುವುದು ನೆನಪಿಡಬೇಕಾದ ಅಂಶವಾಗಿದೆ.
ಕಳೆದ ವರ್ಷ ಹೊಸ ಫೀಚರ್ ಪರಿಚಯಿಸಿದ್ದ ಕಂಪನಿ : ಕಳೆದ ವರ್ಷ ಜೊಮ್ಯಾಟೊ ತನ್ನ ಆಹಾರ ಪ್ರಿಯರಿಗೆ ತುಂಬಾ ಉಪಯುಕ್ತವಾಗುವ ಹೊಸ ವೈಶಿಷ್ಟ್ಯವೊಂದನ್ನು ಪರಿಚಯಿಸಿದೆ. 'ಆರ್ಡರ್ ಶೆಡ್ಯೂಲಿಂಗ್' ಎಂಬ ಈ ವೈಶಿಷ್ಟ್ಯದೊಂದಿಗೆ ಅಪ್ಲಿಕೇಶನ್ ಬಳಕೆದಾರರು ಎರಡು ದಿನ ಮುಂಚಿತವಾಗಿ ಆಹಾರವನ್ನು ಆರ್ಡರ್ ಮಾಡಬಹುದು. ನೀವು ಡೆಲಿವರಿ ಸಮಯವನ್ನು ಸಹ ಆಯ್ಕೆ ಮಾಡಬಹುದಾಗಿದೆ. ಹೆಚ್ಚಿನ ಮಾಹಿತಿಗಾಗಿ ಈ ಕೆಳಗಿರುವ ಲಿಂಕ್ ಅನ್ನು ಕ್ಲಿಕ್ ಮಾಡಿ..
ಓದಿ: ಹೊಸ ಫೀಚರ್ ಪರಿಚಯಿಸಿದ ಜೊಮ್ಯಾಟೊ: ಇನ್ಮುಂದೆ ನಿಮ್ಮ ಇಷ್ಟದ ಸಮಯಕ್ಕೆ ಹೀಗೆ ಆರ್ಡರ್ ಶೆಡ್ಯೂಲ್ ಮಾಡಿಕೊಳ್ಳಿ!
