ಸ್ಯಾನ್ ಫ್ರಾನ್ಸಿಸ್ಕೊ: ಮೈಕ್ರೋಸಾಫ್ಟ್ ಸರ್ಫೇಸ್ ಲ್ಯಾಪ್‌ಟಾಪ್ 4, ಸರ್ಫೇಸ್ ಪ್ರೊ 8 ಬಗ್ಗೆ ಆನ್ಲೈನ್ನಲ್ಲಿ ಮಾಹಿತಿ ಸೋರಿಕೆಯಾಗಿದ್ದು, ಈ ಸಾಧನಗಳು ಯಾವುದೇ ಹೊಸ ವಿನ್ಯಾಸಗಳನ್ನು ಒಳಗೊಂಡಿಲ್ಲ ಎಂದು ಚಿತ್ರಗಳು ದೃಢಪಡಿಸುತ್ತಿವೆ. ಬದಲಿಗೆ ಬಾಹ್ಯ ಸೌಂದರ್ಯವನ್ನು ಹಿಂದಿನ ಪೀಳಿಗೆಯಂತೆಯೇ ಇರಿಸಲಾಗಿದೆ.
ಈ ಲ್ಯಾಪ್ಟಾಪ್ಗಳು ಜನವರಿ ಮಧ್ಯದಲ್ಲಿ 11ನೇ ಜನರೇಷನ್ನ ಇಂಟೆಲ್ ಪ್ರೊಸೆಸರ್‌ಗಳು ಮತ್ತು ಇಂಟೆಲ್ ಎಕ್ಸ್‌ಇ ಗ್ರಾಫಿಕ್ಸ್ ಬೆಂಬಲದೊಂದಿಗೆ ಬಿಡುಗಡೆಯಾಗುತ್ತವೆ ಎಂದು ಸಂಸ್ಥೆ ತಿಳಿಸಿತ್ತು.
ಸರ್ಫೇಸ್ ಲ್ಯಾಪ್‌ಟಾಪ್ 4 ಎಎಮ್‌ಡಿ ಪ್ರೊಸೆಸರ್ ಆಯ್ಕೆಗಳನ್ನು ಒಳಗೊಂಡಿರುತ್ತದೆ ಎಂಬ ವದಂತಿಗಳಿವೆ. ಇದು ಎಎಮ್‌ಡಿಯ ರೈಜೆನ್ 4000 ಸರಣಿ ಆಧರಿಸಿದ ಕಸ್ಟಮ್ ಮೈಕ್ರೋಸಾಫ್ಟ್ ಚಿಪ್ ಆಗಿರಬಹುದು ಎಂದು ಹೇಳಲಾಗಿದೆ.
ಮುಂಬರುವ ಈ ಉತ್ಪನ್ನಗಳನ್ನು ಮುಂದಿನ ವರ್ಷದ ಆರಂಭದಲ್ಲಿ ಅಧಿಕೃತವಾಗಿ ಘೋಷಿಸುವ ನಿರೀಕ್ಷೆಯಿದೆ. ಆದಾಗ್ಯೂ, ಅವುಗಳ ಲಭ್ಯತೆ ಸ್ವಲ್ಪ ವಿಳಂಬವಾಗಬಹುದು ಎಂದು ಹೇಳಲಾಗುತ್ತಿದೆ.
ಮೈಕ್ರೋಸಾಫ್ಟ್ ಸಾಮಾನ್ಯವಾಗಿ ಅಕ್ಟೋಬರ್‌ನಲ್ಲಿ ಅದರ ಸರ್ಫೇಸ್ ಪ್ರೊ ಮತ್ತು ಸರ್ಫೇಸ್ ಲ್ಯಾಪ್‌ಟಾಪ್ ಶ್ರೇಣಿಯನ್ನು ರೀಫ್ರೆಶ್ ಮಾಡುತ್ತದೆ. ಈ ವರ್ಷ ನವೀಕರಿಸಿದ ಸರ್ಫೇಸ್ ಪ್ರೊ ಎಕ್ಸ್ ಜೊತೆಗೆ ಹೊಸ ಸರ್ಫೇಸ್ ಲ್ಯಾಪ್‌ಟಾಪ್ ಗೋ ಮಾದರಿ ಪರಿಚಯಿಸಿದೆ.
