ಗುಂಡಿನ ದಾಳಿ: 20ಕ್ಕೂ ಅಧಿಕ ಜನರ ಪ್ರಾಣ ತೆಗೆದ ಯುವಕ

ಯುವಕನೋರ್ವ ಸಾರ್ವಜನಿಕ ಸ್ಥಳದಲ್ಲಿ ಗುಂಡಿನ ಮಳೆಗರೆದು, 20ಕ್ಕೂ ಅಧಿಕ ಜನರನ್ನು ಹತ್ಯೆಗೈದಿದ್ದಾನೆ.

ವಾಷಿಂಗ್ಟನ್​: ಸಾರ್ವಜನಿಕ ಸ್ಥಳದಲ್ಲಿ ವ್ಯಕ್ತಿಯೋರ್ವ ಮನಬಂದಂತೆ ಗುಂಡಿನ ದಾಳಿ ನಡೆಸಿದ ಪರಿಣಾಮ 20ಕ್ಕೂ ಅಧಿಕ ಜನರು ಮೃತಪಟ್ಟ ಘಟನೆ ಅಮೆರಿಕದಲ್ಲಿ ನಡೆದಿದೆ.

ಅಮೆರಿಕ-ಮೆಕ್ಸಿಕೋ ಗಡಿಯಲ್ಲಿರುವ ಟೆಕ್ಸಾಸ್​ನ ಮಾಲ್​ವೊಂದರ ಬಳಿಯ ವಾಲ್ಮಾರ್ಟ್​ ಸ್ಟೋರ್​ ಹತ್ತಿರ ಘಟನೆ ನಡೆದಿದ್ದು, ಸುಮಾರು 21 ವರ್ಷದ ಯುವಕನೋರ್ವ ಈ ಕೃತ್ಯ ಎಸಗಿದ್ದಾನೆ. ಘಟನೆ ಬಳಿಕ ಯುವಕನನ್ನು ಬಂಧಿಸಲಾಗಿದ್ದು, ಪೊಲೀಸರ ಕ್ಷಿಪ್ರ ಕಾರ್ಯಾಚರಣೆಗೆ ಟೆಕ್ಸಾಸ್​ ಗವರ್ನರ್​ ಗ್ರೇಗ್​ ಆಬೊಟ್​ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಇನ್ನು ದುಷ್ಕರ್ಮಿ ಯುವಕ ಪಾಟ್ರಿಕ್​ ಕ್ರುಸಿಯಸ್​ ಎಂದು ವರದಿಯಾಗಿದ್ದು, ಈತ ಡಾಲ್ಲಾಸ್​ನ ನಿವಾಸಿ ಎನ್ನಲಾಗಿದೆ. ಘಟನೆ ನಡೆದ ವಾಲ್ಮಾರ್ಟ್​ ಸುತ್ತ ಭದ್ರತೆ ಒದಗಿಸಲಾಗಿದ್ದು, ಇನ್ನಷ್ಟು ಬಂದೂಕುಧಾರಿಗಳು ಇರುವ ಬಗ್ಗೆ ಯಾವುದೇ ಮಾಹಿತಿ ಇಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.