ವಾಷಿಂಗ್ಟನ್: ಟೆಲಿಗ್ರಾಂ ಸೇವೆ ಭಾರತದಲ್ಲಿ ಲಭ್ಯವಿದ್ದಾಗ ಅದು ತಲುಪುತ್ತಿದ್ದ ವೇಗದ ಕುರಿತು ಬಹಳಷ್ಟು ಜೋಕ್ಗಳಿವೆ. ಇಂತಹ ಹಾಸ್ಯಗಳಿಗೆ ಅಮೆರಿಕವೂ ಹೊರತಲ್ಲ.
ತಾವು ಡಿಗ್ರಿ ಪಾಸಾದಾಗ ಸಂಬಂಧಿಕರು, ಸ್ನೇಹಿತರು ಸೇರಿ ಕಳುಹಿಸಿದ್ದ ಶುಭಾಶಯವಿದ್ದ ಟೆಲಿಗ್ರಾಂ ಐವತ್ತು ವರ್ಷಗಳ ನಂತರ ಆ ವ್ಯಕ್ತಿಯನ್ನು ತಲುಪಿರುವ ಘಟನೆ ಅಮೆರಿಕದಲ್ಲಿ ನಡೆದಿದೆ.
ರಾಬರ್ಟ್ ಫಿಂಕ್ ಎಂಬುವವರು 1969ರಲ್ಲಿ ಪದವಿ ಪೂರೈಸಿದ್ದರು. ಅದೇ ದಿನ ಅವರ ಸಹಪಾಠಿಗಳು ಹಾಗೂ ಸಂಬಂಧಿಕರು ಸೇರಿ ಒಂದು ಟೆಲಿಗ್ರಾಂ ಬರೆದಿದ್ದರು. ಆದರೆ, ಕಾರಣಾಂತರದಿಂದಾಗಿ ಆ ಟೆಲಿಗ್ರಾಂ ಫಿಂಕ್ ಅವರನ್ನು ತಲುಪಿರಲಿಲ್ಲ.
ಈಚೆಗಷ್ಟೆ ವೆಸ್ಟ್ರನ್ ಯುನಿಯನ್ ಸಂಸ್ಥೆಯ ಟೆಲಿಗ್ರಾಂ ಅವರನ್ನು ತಲುಪಿದ್ದು, ತಮ್ಮ ಬ್ಯಾಚ್ನ ಸ್ನೇಹಿತರೊಂದಿಗೆ ಹಂಚಿಕೊಂಡಿದ್ದಾರೆ. ಅಂದಹಾಗೆ ಈ ಟೆಲಿಗ್ರಾಂ ತಲುಪುವಷ್ಟರಲ್ಲಿ ಫಿಂಕ್ ಅವರು ತಾವು ಓದಿದ ಕಾಲೇಜಿನಲ್ಲೇ ಪ್ರಾಧ್ಯಾಪಕರಾಗಿ ನಿವೃತ್ತರಾಗಿದ್ದಾರೆ.
