ಲಂಡನ್: ವಿಕಿಲೀಕ್ಸ್ ಸಂಸ್ಥಾಪಕ ಜೂಲಿಯೆನ್ ಅಸಾಂಜ್ ಎರಡು ಮಕ್ಕಳ ತಂದೆಯಾಗಿದ್ದು, ಆ ಮಕ್ಕಳ ತಾಯಿ ತಾನೇ ಆಗಿದ್ದೇನೆ ಎಂಬ ಅಚ್ಚರಿಯ ವಿಷಯ ಹೊರಗೆಡವಿದ್ದಾರೆ ಅಸಾಂಜ್ ವಕೀಲೆ ಸ್ಟೆಲ್ಲಾ ಮಾರಿಸ್. ಅಮೆರಿಕದ ರಹಸ್ಯ ಗುಪ್ತಚರ ದಾಖಲೆಗಳನ್ನು ಸೋರಿಕೆ ಮಾಡಿದ ಹಾಗೂ ಅತ್ಯಾಚಾರದ ಆರೋಪಗಳನ್ನು ಅಸಾಂಜ್ ಎದುರಿಸುತ್ತಿದ್ದು, ಬ್ರಿಟನ್ನಿಂದ ಅಮೆರಿಕೆಗೆ ಹಸ್ತಾಂತರವಾಗುವ ಭೀತಿಯಲ್ಲಿರುವ ಅವರು ಸದ್ಯ ಲಂಡನ್ ಜೈಲಿನಲ್ಲಿ ಬಂದಿಯಾಗಿದ್ದಾರೆ.
ವರ್ಷದ ಹಿಂದೆ ಇಕ್ವೆಡಾರ್ ರಾಯಭಾರ ಕಚೇರಿಯಲ್ಲಿ ಅಡಗಿದ್ದಾಗ ಭೇಟಿಯಾಗುತ್ತಿದ್ದ ವಕೀಲೆ ಸ್ಟೆಲ್ಲಾ ಮಾರಿಸ್ರೊಂದಿಗೆ ದೈಹಿಕ ಸಂಬಂಧ ಬೆಳೆಸಿದ್ದ ಅಸಾಂಜ್ ಎರಡು ಮಕ್ಕಳ ತಂದೆಯಾಗಿದ್ದಾರೆ ಎಂದು ವಿಕಿಲೀಕ್ಸ್ ವೆಬ್ಸೈಟ್ ಪ್ರಕಟಿಸಿದೆ. ಅಲ್ಲದೆ ವಕೀಲೆ ಸ್ಟೆಲ್ಲಾ ಸ್ವತಃ ಈ ಕುರಿತ ದಾಖಲೆಗಳನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದ್ದಾರೆ.
ಸದ್ಯ ಲಂಡನ್ ಜೈಲಿಗೂ ಕೊರೊನಾ ವೈರಸ್ ಸೋಂಕು ಹರಡಿದೆ. ಈ ಮಧ್ಯೆ ಅಸಾಂಜ್ ಆರೋಗ್ಯ ಸ್ಥಿತಿ ಹದಗೆಟ್ಟು ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಹೀಗಾಗಿ 48 ವರ್ಷದ ಅಸಾಂಜ್ ಅವರನ್ನು ಬಂಧನದಿಂದ ಬಿಡುಗೊಡೆಗೊಳಿಸಬೇಕೆಂಬ ಉದ್ದೇಶದಿಂದ ಇಬ್ಬರ ಮಧ್ಯದ ಸಂಬಂಧವನ್ನು ಬಹಿರಂಗಗೊಳಿಸುತ್ತಿರುವುದಾಗಿ ಸ್ಟೆಲ್ಲಾ ಮಾರಿಸ್ ಹೇಳಿಕೊಂಡಿದ್ದಾರೆ.
ಕಳೆದ 25 ರಂದು ಲಂಡನ್ ವೆಸ್ಟ್ಮಿನಿಸ್ಟರ್ ನ್ಯಾಯಾಲಯ ಅಸಾಂಜ್ ಅವರ ಜಾಮೀನು ಅರ್ಜಿಯನ್ನು ತಿರಸ್ಕರಿಸಿತ್ತು. ಇದಾಗಿ ಕೆಲವೇ ದಿನಗಳಲ್ಲಿ ಅಸಾಂಜ್ ಬಂಧಿತರಾಗಿರುವ ಬೆಲ್ಮಾರ್ಷ್ ಜೈಲಿನಲ್ಲಿ ಕೈದಿಯೊಬ್ಬ ಕೊರೊನಾ ಸೋಂಕಿನಿಂದ ಮೃತಪಟ್ಟಿದ್ದ. ಹೀಗಾಗಿ ಅಸಾಂಜ್ ವಕೀಲರು ಮತ್ತೊಮ್ಮೆ ಜಾಮೀನು ಅರ್ಜಿಯನ್ನು ಸಲ್ಲಿಸಲಿದ್ದಾರಾ ಎಂಬುದನ್ನು ಕಾದುನೋಡಬೇಕಿದೆ.
ಅಫ್ಘಾನಿಸ್ತಾನದಲ್ಲಿ ಅಮೆರಿಕೆಯ ಯುದ್ಧಕ್ಕೆ ಸಂಬಂಧಿಸಿದ ಲಕ್ಷಾಂತರ ಪುಟಗಳಷ್ಟು ರಹಸ್ಯ ಮಾಹಿತಿಯನ್ನು ವಿಕಿಲೀಕ್ಸ್ ಮೂಲಕ ಅಸಾಂಜ್ ಬಹಿರಂಗಗೊಳಿಸಿದ್ದರು. ಇದರಿಂದ ಕ್ರುದ್ಧವಾಗಿರುವ ಅಮೆರಿಕ ಶತಾಯಗತಾಯ ಅಸಾಂಜ್ ಅವರನ್ನು ದೇಶಕ್ಕೆ ಕರೆತಂದು ಶಿಕ್ಷೆಗೆ ಗುರಿಪಡಿಸುವ ಎಲ್ಲ ಪ್ರಯತ್ನಗಳನ್ನು ಮಾಡುತ್ತಿದೆ.
