ಅಕ್ಟೋಬರ್ 14, ಶನಿವಾರದಂದು ಅಹಮದಾಬಾದ್ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ ಹೈವೋಲ್ಟೇಜ್ ಭಾರತ ಮತ್ತು ಪಾಕಿಸ್ತಾನ ವಿಶ್ವಕಪ್ ಪಂದ್ಯದ ವೇಳೆ ಬಾಲಿವುಡ್ ನಟಿ ಊರ್ವಶಿ ರೌಟೇಲಾ ಅವರು ತಮ್ಮ ಚಿನ್ನದ ಐಫೋನ್ ಅನ್ನು ಕಳೆದುಕೊಂಡಿದ್ದರು. ಯಾರಿಗಾದರೂ ಈ ಬೆಲೆಬಾಳುವ ಮೊಬೈಲ್ ಸಿಕ್ಕಿದರೆ ಹಿಂತಿರುಗಿಸುವಂತೆ ಮನವಿ ಮಾಡಿಕೊಂಡಿದ್ದರು. ಕೊನೆಗೂ ಮೊಬೈಲ್ ಸಿಕ್ಕಿದೆ. ಆದರೆ ಕದ್ದಿರುವ ಕಳ್ಳ ಮಾತ್ರ ಬಹುದೊಡ್ಡ ಬೇಡಿಕೆಯನ್ನೇ ಊರ್ವಶಿ ಮುಂದಿಟ್ಟಿದ್ದಾನೆ.
ಹೌದು, ಸೌಂದರ್ಯವತಿ ಊರ್ವಶಿ ರೌಟೇಲಾ ಅವರು ತಾವು ಐಫೋನ್ ಕಳೆದುಕೊಂಡ ಕೂಡಲೇ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಹಂಚಿಕೊಂಡಿದ್ದರು. ಇಂಡಿಯಾ ವರ್ಸಸ್ ಪಾಕಿಸ್ತಾನ ಪಂದ್ಯದ ವೇಳೆ 24 ಕ್ಯಾರೆಟ್ ರಿಯಲ್ ಗೋಲ್ಡ್ ಐಫೋನ್ ಕಳೆದುಕೊಂಡಿದ್ದು, ಯಾರಿಗಾದರೂ ಸಿಕ್ಕಿದ್ದಲ್ಲಿ ಹಿಂತಿರುಗಿಸುವಂತೆ ವಿನಂತಿಸಿಕೊಂಡಿದ್ದರು. ಈ ಸಂಬಂಧ ನಟಿಗೊಂದು ಮೇಲ್ ಬಂದಿದೆ. ಅದರಲ್ಲಿ ಮೊಬೈಲ್ ನನ್ನ ಬಳಿ ಇರುವುದಾಗಿಯೂ, ವಾಪಸ್ ನೀಡಬೇಕಾದರೆ ಬೇಡಿಕೆಯೊಂದನ್ನು ಈಡೇರಿಬೇಕಾಗಿ ಐಫೋನ್ ಕದ್ದ ವ್ಯಕ್ತಿ ಹೇಳಿದ್ದಾನೆ.
ಬೇಡಿಕೆ ಏನು?: ಊರ್ವಶಿ ರೌಟೇಲಾ ಅವರಿಗೆ ಮೊಬೈಲ್ ನೀಡಬೇಕಂದ್ರೆ, ಆತ ತನ್ನ ಸಹೋದರನನ್ನು ಕ್ಯಾನ್ಸರ್ನಿಂದ ರಕ್ಷಿಸಲು ನಟಿಯ ಸಹಾಯ ಕೇಳಿದ್ದಾನೆ. "ನಿಮ್ಮ ಫೋನ್ ನನ್ನ ಬಳಿ ಇದೆ. ನಿಮಗೆ ಅದು ಬೇಕಾದರೆ, ನನ್ನ ಸಹೋದರನನ್ನು ಕ್ಯಾನ್ಸರ್ನಿಂದ ರಕ್ಷಿಸಲು ನೀವು ನನಗೆ ಸಹಾಯ ಮಾಡಬೇಕು" ಎಂದು ಇಮೇಲ್ನಲ್ಲಿ ಬರೆದಿದ್ದಾನೆ. ಥಂಬ್ಸ್ ಅಪ್ ನೀಡುವ ಮೂಲಕ ಊರ್ವಶಿ ಇಮೇಲ್ಗೆ ಸಕಾರಾತ್ಮಕವಾಗಿ ಪ್ರತಿಕ್ರಿಯಿಸಿದ್ದಾರೆ.
ಇದನ್ನೂ ಓದಿ: ಅಬ್ಬಬ್ಬಾ! 190 ಕೋಟಿ ರೂ. ಮೌಲ್ಯದ ಮನೆ ಖರೀದಿಸಿದ ಚೆಲುವೆ ಊರ್ವಶಿ ರೌಟೇಲಾ
ಊರ್ವಶಿ ರೌಟೇಲಾ ಶನಿವಾರ ಸ್ಟೇಡಿಯಂಗೆ ಹೋಗುವ ಮುನ್ನ ಪಂದ್ಯದ ಟಿಕೆಟ್ಗಳನ್ನು ತೋರಿಸುತ್ತಿರುವ ವಿಡಿಯೋ ಹಂಚಿಕೊಂಡಿದ್ದರು. ನಂತರ ಭಾರತ ಮತ್ತು ಪಾಕಿಸ್ತಾನ ಮ್ಯಾಚ್ ಅನ್ನು ಆನಂದಿಸುತ್ತಿರುವ ನೋಟದೊಂದಿಗೆ ಅಭಿಮಾನಿಗಳನ್ನು ರಂಜಿಸಿದರು. ಈ ಹೈವೋಲ್ಟೇಜ್ ಮ್ಯಾಚ್ ನೋಡಲು ಬರುವಾಗ ರೂಪವತಿ ಬ್ಲೂ ಕಲರ್ ಮಿನಿ ಬಾಡಿಕಾನ್ ಡ್ರೆಸ್ ಧರಿಸಿದ್ದರು.
2 ನಿಮಿಷದ ಹಾಡಿಗೆ 2 ಕೋಟಿ: ಮನಮೋಹಕ ಸುಂದರಿ ಊರ್ವಶಿ ರೌಟೇಲಾ ಸಿನಿಮಾಗಳಲ್ಲಿನ ವಿಶೇಷ ಹಾಡುಗಳಿಗೆ ಹೆಜ್ಜೆ ಹಾಕಿ, ಭಾರಿ ಮೊತ್ತದ ಹಣ ಪಡೆಯುತ್ತಾರೆ. ತಮ್ಮ ಚೆಲುವು ಮತ್ತು ನಟನೆಯಿಂದಲೇ ಉತ್ತರದಿಂದ ದಕ್ಷಿಣದವರೆಗೂ ಪ್ರೇಕ್ಷಕರನ್ನು ಸೆಳೆಯುತ್ತಿದ್ದಾರೆ. ಈ ವರ್ಷ ಚಿರಂಜೀವಿ ಅಭಿನಯದ 'ವಾಲ್ತೇರು ವೀರಯ್ಯ' ಚಿತ್ರದಲ್ಲಿ 'ಬಾಸು ವೇರ್ ಈಸ್ ದಿ ಪಾರ್ಟಿ' ಹಾಡಿನಲ್ಲಿ ಸದ್ದು ಮಾಡಿದ್ದ ಊರ್ವಶಿ ನಂತರ 'ಏಜೆಂಟ್' ಚಿತ್ರದಲ್ಲಿ 'ವೈಲ್ಡ್ ಸಾಲಾ'ದಲ್ಲಿ ಹೆಚ್ಚು ಕ್ರೇಜ್ ಹುಟ್ಟಿಸಿದರು. ಈ ಎಲ್ಲಾ ಸಿನಿಮಾಗಳಿಗೆ ಅವರು ತೆಗೆದುಕೊಳ್ಳುತ್ತಿರುವ ಸಂಭಾವನೆ ಸದ್ಯ ಹಾಟ್ ಟಾಪಿಕ್ ಆಗಿದೆ. 2 ನಿಮಿಷದ ಹಾಡಿಗೆ ಅವರು 2 ಕೋಟಿ ರೂಪಾಯಿ ಸಂಭಾವನೆ ಪಡೆಯುತ್ತಾರೆ.
ಇದನ್ನೂ ಓದಿ: 2 ಲಕ್ಷ ಮೌಲ್ಯದ ಬ್ಯಾಗ್ ಹಿಡಿದು ಬಂದ ಊರ್ವಶಿ ರೌಟೇಲಾ: ಚೆಲುವೆಯ ವಿಡಿಯೋ ವೈರಲ್
