ರಾಮ್​ಚರಣ್ 16ನೇ ಸಿನಿಮಾಗೆ ಸಹಜ ಸುಂದರಿ ಸಾಯಿ ಪಲ್ಲವಿ ನಾಯಕಿ?

'RC16' Heroine: ರಾಮ್​ಚರಣ್​ ನಟನೆಯ 16ನೇ ಸಿನಿಮಾಗೆ ಸಾಯಿ ಪಲ್ಲವಿ ನಾಯಕಿಯಾಗಲಿದ್ದಾರೆ ಎಂಬುದು ಸದ್ಯದ ಮಾಹಿತಿ.

ಗ್ಲೋಬಲ್​ ಸ್ಟಾರ್​ ರಾಮ್​ಚರಣ್​ ನಟನೆಯ 16ನೇ ಸಿನಿಮಾದ ಹೊಸ ಅಪ್ಡೇಟ್​​ ಹೊರಬಿದ್ದಿದೆ. ಹಳ್ಳಿ ಹಿನ್ನೆಲೆಯಲ್ಲಿ ಮೂಡಿಬರುತ್ತಿರುವ ಈ ಚಿತ್ರಕ್ಕೆ 'ಉಪ್ಪೇನ' ಖ್ಯಾತಿಯ ನಿರ್ದೇಶಕ ಬುಚ್ಚಿಬಾಬು ಸನಾ ಆ್ಯಕ್ಷನ್​ ಕಟ್​ ಹೇಳುತ್ತಿದ್ದಾರೆ. ಸದ್ಯ ಸಿನಿಮಾ ಪ್ರೀ ಪ್ರೊಡಕ್ಷನ್​ ಕೆಲಸಗಳು ನಡೆಯುತ್ತಿದೆ. ಆದರೆ 'RC 16'ಗೆ ನಾಯಕಿ ಯಾರೆಂಬ ಕುತೂಹಲ ಜನರಲ್ಲಿದೆ. ಇಲ್ಲಿಯವರೆಗೆ ಬಾಲಿವುಡ್​ ನಟಿ ರವೀನಾ ಟಂಡನ್ ಮಗಳು ರಾಶಾ ತಡಾನಿ ನಾಯಕಿ ಎನ್ನಲಾಗಿತ್ತು.​ ಆದರೆ, ಇದೀಗ ಮತ್ತೊಂದು ನಟಿಯ ಹೆಸರು ಕೇಳಿ ಬಂದಿದೆ.

'RC 16' ನಾಯಕಿಯರ ಸಾಲಿನಲ್ಲಿ ರಾಶಾ ತಡಾನಿ ಮತ್ತು ಕೀರ್ತಿ ಸುರೇಶ್​ ಹೆಸರುಗಳು ಹಲವು ಬಾರಿ ಮುನ್ನಲೆಗೆ ಬಂದಿತ್ತು. ಇದೀಗ ಸಹಜ ಸುಂದರಿ ಸಾಯಿ ಪಲ್ಲವಿ ಹೆಸರು ಚಾಲ್ತಿಗೆ ಬಂದಿದೆ. ಅವರು ರಾಮ್​ಚರಣ್​ಗೆ ಜೋಡಿಯಾಗಲಿದ್ದಾರೆ ಎಂಬುದು ಸದ್ಯದ ಸುದ್ದಿ. ಸಾಯಿ ಪಲ್ಲವಿ ಜೊತೆ ಚಿತ್ರತಂಡ ಈ ಬಗ್ಗೆ ಚರ್ಚಿಸಿದೆ ಎಂದು ವರದಿಯಾಗಿದೆ. ಸಿನಿಮಾದಲ್ಲಿ ನಟ ವಿಜಯ್​ ಸೇತುಪತಿ ವಿಲನ್​ ಆಗಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ. ಆದರೆ, ಈ ಬಗ್ಗೆ ಚಿತ್ರತಂಡದಿಂದ ಯಾವುದೇ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ.

ಆದರೆ, ಈಗಿರುವ ವದಂತಿ ಸುದ್ದಿ ನಿಜವಾಗಲಿ ಎಂದು ಅಭಿಮಾನಿಗಳು ಕಮೆಂಟ್​ ಮಾಡುತ್ತಿದ್ದಾರೆ. ರಾಮ್​ಚರಣ್​ ಜೊತೆ ಸಾಯಿ ಪಲ್ಲವಿ ತೆರೆ ಹಂಚಿಕೊಂಡರೆ ಉತ್ತಮ ಎಂದು ಕಮೆಂಟ್​ ಮಾಡುತ್ತಿದ್ದಾರೆ. ಪ್ರಸಿದ್ಧ ನಿರ್ಮಾಣ ಸಂಸ್ಥೆ ಮೈತ್ರಿ ಮೂವಿ ಮೇಕರ್ಸ್​, ವೃದ್ಧಿ ಸಿನಿಮಾಸ್​ ಮತ್ತು ಸುಕುಮಾರ್​ ರೈಟಿಂಗ್ಸ್​ ಜಂಟಿಯಾಗಿ ಈ ಚಿತ್ರವನ್ನು ನಿರ್ಮಿಸುತ್ತಿದೆ. ಆಸ್ಕರ್​ ಪ್ರಶಸ್ತಿ ವಿಜೇತ ಸಂಗೀತ ನಿರ್ದೇಶಕ ಎ.ಆರ್​ ರೆಹಮಾನ್​ ಈ ಚಿತ್ರಕ್ಕೆ ಸಂಗೀತ ನೀಡಲಿದ್ದಾರೆ.

ಇತ್ತೀಚೆಗಷ್ಟೇ ಬಿಗ್​ ಬಾಸ್​ ಮನೆಗೆ ಎಂಟ್ರಿ ಕೊಟ್ಟಿರುವ ನಿರ್ದೇಶಕ ಬುಚ್ಚಿಬಾಬು ಸನಾ ಈ ಚಿತ್ರದ ಬಗ್ಗೆ ಮಾಹಿತಿ ನೀಡಿದ್ದಾರೆ. ಬಿಗ್​ ಬಾಸ್​ 7ರ ಸ್ಪರ್ಧಿ ಅಂಬಟಿ ಅರ್ಜುನ್​ ಅವರು ಈ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. "ರಾಮ್​ಚರಣ್​ ಸರ್​ ಅವರ ಸಿನಿಮಾದಲ್ಲಿ ನೀವು ಸೂಪರ್​ ರೋಲ್​ ಮಾಡಲಿದ್ದೀರಿ. ಫಿಕ್ಸ್​ ಮಾಡಿಕೊಳ್ಳಿ" ಎಂದು ಬಿಗ್​ ಬಾಸ್​ ವೇದಿಕೆಯಿಂದಲೇ ಬುಚ್ಚಿಬಾಬು ಘೋಷಿಸಿದ್ದಾರೆ. ಇದರಿಂದ ಅರ್ಜುನ್​ ಖುಷಿ ಪಟ್ಟಿದ್ದಾರೆ.

ಇನ್ನೂ ರಾಮ್​ಚರಣ್​ ಅವರ ಮುಂಬರುವ ಮತ್ತೊಂದು ಸಿನಿಮಾ 'ಗೇಮ್ ಚೇಂಜರ್​'. ಭಾರೀ ನಿರೀಕ್ಷೆ ಮೂಡಿಸಿರುವ ಈ ಚಿತ್ರ ಸದ್ಯ ಶೂಟಿಂಗ್​ ಹಂತದಲ್ಲಿದೆ. ಈ ಪ್ಯಾನ್​ ಇಂಡಿಯಾ ಸಿನಿಮಾಗೆ ನಿರ್ದೇಶಕ ಶಂಕರ್​ ಅವರು ಆ್ಯಕ್ಷನ್​ ಕಟ್​ ಹೇಳುತ್ತಿದ್ದಾರೆ. ಖ್ಯಾತ ನಿರ್ಮಾಪಕ ದಿಲ್​ ರಾಜು ಅದ್ಧೂರಿ ಬಜೆಟ್​ನಲ್ಲಿ ನಿರ್ಮಿಸುತ್ತಿದ್ದಾರೆ. ಆಕ್ಷನ್​ ಎಂಟರ್​ಟೈನ್​ಮೆಂಟ್​ ಚಿತ್ರವಾಗಿ ಇದು ತಯಾರಾಗುತ್ತಿದೆ. ಸಿನಿಮಾದಲ್ಲಿ ರಾಮ್​ಚರಣ್​ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ರಾಮ್​ಚರಣ್​ಗೆ ನಾಯಕಿಯಾಗಿ ಬಾಲಿವುಡ್​ ಬೆಡಗಿ ಕಿಯಾರಾ ಅಡ್ವಾಣಿ ನಟಿಸುತ್ತಿದ್ದಾರೆ. ತಮನ್​ ಸಂಗೀತಾ ಸಂಯೋಜನೆ ಇರಲಿದೆ. ಹಿರಿಯ ನಟ ಎಸ್​.ಜೆ ಸೂರ್ಯ, ಅಂಜಲಿ, ಶ್ರೀಕಾಂತ್​, ಸುನೀಲ್​ ಮುಂತಾದವರು ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಮುಂದಿನ ವರ್ಷ ಆಗಸ್ಟ್​ ನಂತರ ಈ ಚಿತ್ರ ಬಿಡುಗಡೆಯಾಗುವ ಸಾಧ್ಯತೆಯಿದೆ.

ಇದನ್ನೂ ಓದಿ: 'ಆರ್​ಆರ್​ಆರ್'​ ತಾರೆ ರಾಮ್‌ಚರಣ್‌ ಅವರ​ ಹೊಸ ಫ್ರೆಂಡ್ ಇವರೇ ನೋಡಿ!