ಕಾಲಿವುಡ್​ ಖ್ಯಾತ ಹಾಸ್ಯನಟ ಯೋಗಿ ಬಾಬು ಸಿನಿಮಾಗೆ ಸಾಧು ಕೋಕಿಲ​ ಪುತ್ರನ ನಿರ್ದೇಶನ

ತಮಿಳು ಚಿತ್ರರಂಗದ ಬಹುಬೇಡಿಕೆಯ ಹಾಸ್ಯ ನಟರಾಗಿರುವ ಯೋಗಿ ಬಾಬು ಸಿನಿಮಾವನ್ನು ಸಾಧು ಕೋಕಿಲ ಪುತ್ರ ಸುರಾಗ್ ನಿರ್ದೇಶನ ಮಾಡುತ್ತಿದ್ದಾರೆ.

ಸಿನಿಮಾ ತಾರೆಯರ​ ಮಕ್ಕಳು ಈ ಸಿನಿಮಾ ಎಂಬ ಕಲರ್​ಫುಲ್​ ದುನಿಯಾಗೆ ಬರೋದು ಹೊಸತೇನಲ್ಲ. ಚಿಕ್ಕ ವಯಸ್ಸಿನಲ್ಲೇ ಅಪ್ಪ, ಅಮ್ಮನಂತೆ ಹೀರೋ/ ಹೀರೋಯಿನ್​ ಆಗುವ ಕನಸು ಕಂಡಿರುತ್ತಾರೆ. ಸುದೀಪ್​, ಪ್ರೇಮ್​, ಡಾ. ರಾಜ್​ಕುಮಾರ್​ ವಂಶದ ಕುಡಿಗಳು​ ಸೇರಿದಂತೆ ಅನೇಕ ನಟರ ಮಕ್ಕಳು ಬಣ್ಣದ ಲೋಕದಲ್ಲಿ ಮಿಂಚಲು ಸಜ್ಜಾಗುತ್ತಿದ್ದಾರೆ. ಈ ಸಾಲಿನಲ್ಲಿ ನಟ, ನಿರ್ದೇಶಕ, ನಿರ್ಮಾಪಕ ಹಾಗೂ ಸಂಗೀತ ನಿರ್ದೇಶಕ ಸಾಧು ಕೋಕಿಲ ಮಗ ಕೂಡ ಸೇರಿಕೊಂಡಿದ್ದಾರೆ.

ಹೌದು. ಪ್ರೇಕ್ಷಕರ ಮುಖದಲ್ಲಿ ನಗೆ ಕಡಲನ್ನೇ ಹರಿಸುವ ಸಾಧು ಕೋಕಿಲ ಅವರ ಮಗ ಸುರಾಗ್​ ಕೂಡ ಅಪ್ಪನ ಹಾದಿಯಲ್ಲೇ ನಡೆಯುತ್ತಿದ್ದಾರೆ. ಈಗಾಗಲೇ ಸಂಗೀತ ನಿರ್ದೇಶನಕ್ಕಿಳಿದಿರುವ ಸುರಾಗ್​, ಕನ್ನಡದಲ್ಲಿ ಅತಿರಥ, ಶಿವಾರ್ಜುನ ಸಿನಿಮಾಗಳಿಗೆ ಸಂಗೀತ ನಿರ್ದೇಶಕರಾಗಿ ಕೆಲಸ ಮಾಡಿದ್ದಾರೆ. ಸದ್ಯ ಮತ್ತೊಂದು ಸಾಹಸಕ್ಕೆ ಜೂನಿಯರ್​ ಸಾಧು ಕೋಕಿಲ ಮುಂದಾಗಿದ್ದಾರೆ.

ಕಾಲಿವುಡ್​ ಖ್ಯಾತ ಹಾಸ್ಯ ನಟ ಯೋಗಿ ಬಾಬು ಸಿನಿಮಾಗೆ ಸುರಾಗ್​ ಆಕ್ಷನ್​ ಕಟ್​

ಅಪ್ಪನ ಗರಡಿಯಲ್ಲಿ ಪಳಗಿರುವ ಸುರಾಗ್​, ಅಪ್ಪನಂತೆಯೇ ನಿರ್ದೇಶಕರಾಗಲು ತಯಾರಿ ಮಾಡಿಕೊಂಡಿದ್ದಾರೆ. ಅದು ಕೂಡ ನಮ್ಮ ಕನ್ನಡ ಸಿನಿಮಾಗಲ್ಲ. ತಮಿಳು ಚಿತ್ರರಂಗದ ಬಹುಬೇಡಿಕೆಯ ಹಾಸ್ಯ ನಟರಾಗಿರುವ ಯೋಗಿ ಬಾಬು ಅವ್ರಿಗೆ ಸುರಾಗ್​ ಆಕ್ಷನ್​ ಕಟ್​ ಹೇಳುತ್ತಿದ್ದಾರೆ. ಈ ಹೆಸರಿಡದ ಚಿತ್ರದ ಬಗ್ಗೆ ಹಾಗೂ ನಿರ್ದೇಶನಾಗಲು ಯಾರು ಸ್ಫೂರ್ತಿ? ಎಂಬ ವಿಚಾರವಾಗಿ ಸ್ವತಃ ಸುರಾಗ್​ ಅವರೇ ಈಟಿವಿ ಭಾರತ ಜೊತೆ ಮುಕ್ತವಾಗಿ ಮಾತನಾಡಿದ್ದಾರೆ.

ಇದನ್ನೂ ಓದಿ: Toby: ಯಪ್ಪಾ! ಮೂಗುತಿ ಧರಿಸಿ 'ಟೋಬಿ' ಅವತಾರ ತಾಳಿದ ರಾಜ್​​ ಬಿ ಶೆಟ್ಟಿ

ಸುರಾಗ್​ ಮಾತು..: "ಸಂಗೀತ ಅನ್ನೋದು ನಮ್ಮ ಕುಟುಂಬದಲ್ಲಿ ಬೆರೆತು ಹೋಗಿದೆ. ಆದರೆ ನಿರ್ದೇಶನ ಅನ್ನೋದು ನನ್ನ ಫ್ಯಾಷನ್​. ನಾನು ಕಾಲೇಜಿನಲ್ಲಿ ಇರಬೇಕಾದ್ರೆ ಕಥೆಗಳನ್ನು ಬರೆದು, ನಾಟಕಗಳನ್ನು ಮಾಡಿಸುತ್ತಿದ್ದೆ. ನನಗೆ ನಮ್ಮ ತಂದೆ ಹಾಗೂ ರಿಯಲ್​ ಸ್ಟಾರ್​ ಉಪೇಂದ್ರ ಸರ್​ ನಿರ್ದೇಶನದ ಶೈಲಿಯೇ ಸ್ಫೂರ್ತಿ. ನಾನು ಉಪೇಂದ್ರ ಸರ್​ ಅವರ ಉಪ್ಪಿ 2 ಹಾಗೂ ಯುಐ ಸಿನಿಮಾಗಳಲ್ಲಿ ಸಹಾಯಕ ನಿರ್ದೇಶಕನಾಗಿ ಕೆಲಸ ಮಾಡಿದ್ದೇನೆ" ಎನ್ನುತ್ತಾರೆ ಸುರಾಗ್​.

ಕಾಲಿವುಡ್​ ಖ್ಯಾತ ಹಾಸ್ಯ ನಟ ಯೋಗಿ ಬಾಬು ಸಿನಿಮಾಗೆ ಸುರಾಗ್​ ಆಕ್ಷನ್​ ಕಟ್​

ಇನ್ನೂ ಯೋಗಿ ಬಾಬುಗೆ ಆಕ್ಷನ್​ ಕಟ್​ ಹೇಳುವ ಮೂಲಕ ಸುರಾಗ್​ ಅವರು ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ಈ ಸಿನಿಮಾವು ಕಾಮಿಡಿ ಕಮ್​ ಥ್ರಿಲ್ಲರ್​ ಕಥಾಹಂದರ ಒಳಗೊಂಡಿದೆ. ಈಗಾಗಲೇ 10 ದಿನಗಳ ಶೂಟಿಂಗ್​ ಕೂಡ ಮುಕ್ತಾಯಗೊಂಡಿದ್ದು, ಉಮಾಶ್ರೀ, ಅವಿನಾಶ್​ರಂತಹ ಅನುಭವಿ ಕಲಾವಿದರು ಕೂಡ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಚಿತ್ರೀಕರಣದಲ್ಲಿಯೂ ಭಾಗಿಯಾಗಿದ್ದಾರೆ.

ಅಂದಹಾಗೆ, ಈ ಸಿನಿಮಾವನ್ನು ಸುರಾಗ್ ಅವರ ಹೋಮ್‌ ಬ್ಯಾನರ್‌ ಲೂಪ್ ಎಂಟರ್‌ಟೈನ್‌ಮೆಂಟ್‌ ಸ್ಟುಡಿಯೋ ಅಡಿಯಲ್ಲೇ ನಿರ್ಮಾಣ ಮಾಡಲಾಗುತ್ತಿದೆ. ಈ ಕಾಮಿಡಿ ಥ್ರಿಲ್ಲರ್‌ನಲ್ಲಿ ಮೂರು ನಾಲ್ಕು ಮುಖ್ಯ ಪಾತ್ರಗಳಿವೆಯಂತೆ. ಈ ಸಿನಿಮಾವನ್ನು ತಮಿಳು ಹಾಗೂ ಕನ್ನಡ ಭಾಷೆಯಲ್ಲಿ ಸಿದ್ಧಗೊಳಿಸಲಾಗುತ್ತಿದೆ. ಎಲ್ಲಾ ಅಂದುಕೊಂಡಂತೆ ಚಿತ್ರೀಕರಣ ಮುಗಿದರೆ ಈ ವರ್ಷವೇ ಸುರಾಗ್ ನಿರ್ದೇಶನದ ಈ ಹೆಸರಿಡದ ಚಿತ್ರವನ್ನು ತೆರೆ ಮೇಲೆ ನೋಡಬಹುದಾಗಿದೆ.

ಇದನ್ನೂ ಓದಿ: ಬ್ರಿಟಿಷರನ್ನು ಗುಂಡಿಟ್ಟು ಕೊಂದ 'ಶಾನುಭೋಗರ ಮಗಳು' ರಾಗಿಣಿ ಪ್ರಜ್ವಲ್