ದಸರಾಗೆ ಸಾಲು ಸಾಲು ಸಿನಿಮಾ: ತೆರೆ ಮೇಲೆ ಸ್ಟಾರ್ ನಟರ ಅಬ್ಬರ, ಯಾರಿಗೆ ಪ್ರೇಕ್ಷಕರ ಜೈಕಾರ?

ಈ ಬಾರಿಯ ದಸರಾಗೆ ಸಾಲು ಸಾಲು ಸಿನಿಮಾಗಳು ಥಿಯೇಟರ್​ಗೆ ಬರಲಿವೆ. ಯಾವುವು ಗೊತ್ತಾ?

ಭಾರತೀಯ ಚಿತ್ರರಂಗಕ್ಕೆ ಈ ಸಲದ ದಸರಾ ತುಂಬಾ ಸ್ಪೆಷಲ್​. ಪ್ರತಿ ವರ್ಷ ವಿಜಯ ದಶಮಿಯಂದು ಕನಿಷ್ಠ ಎರಡರಿಂದ ಮೂರು ಚಿತ್ರಗಳು ಬಿಡುಗಡೆಯಾಗುತ್ತಿದ್ದವು. ಅಲ್ಲದೇ ಹೋದಲ್ಲಿ ಸಣ್ಣಮಟ್ಟದ ಸಿನಿಮಾಗಳು ತೆರೆ ಕಾಣುತ್ತಿದ್ದವು. ಆದರೆ ಈ ಬಾರಿ ಥಿಯೇಟರ್​ನಲ್ಲಿ ಸಾಲು ಸಾಲು ಸಿನಿಮಾಗಳು ಪ್ರೇಕ್ಷಕರನ್ನು ರಂಜಿಸಲು ತಯಾರಾಗುತ್ತಿವೆ. ಎಲ್ಲಾ ಭಾಷೆಯ ಸ್ಟಾರ್​ ನಟರ ಚಿತ್ರಗಳೇ ಬಿಡುಗಡೆಯಾಗುತ್ತಿವೆ. ಹೀಗಾಗಿ ಥಿಯೇಟರ್​ನಲ್ಲಿ ಭಾರಿ ಪೈಪೋಟಿ ಎದುರಾಗಲಿದೆ ಎಂಬುದು ಸಿನಿಮಾ ವಿಶ್ಲೇಷಕರ ಅಭಿಪ್ರಾಯ.

ಈಗಾಗಲೇ ಕನ್ನಡ ಸೇರಿದಂತೆ ಇತರೆ ಭಾಷೆಯ ಸಿನಿಮಾಗಳು ದಸರಾ ಬಾಕ್ಸ್​ ಆಫೀಸ್​ನಲ್ಲಿ ತಮ್ಮ ಸ್ಥಾನವನ್ನು ಖಚಿತಪಡಿಸಿವೆ. ಹ್ಯಾಟ್ರಿಕ್​ ಹೀರೋ ಶಿವ ರಾಜ್​ಕುಮಾರ್​ 'ಘೋಸ್ಟ್​' (ಕನ್ನಡ), ನಂದಮೂರಿ ಬಾಲಕೃಷ್ಣ 'ಭಗವಂತ ಕೇಸರಿ' (ತೆಲುಗು), ಮಾಸ್​ ಮಹಾರಾಜ ರವಿತೇಜ 'ಟೈಗರ್​ ನಾಗೇಶ್ವರ ರಾವ್​' (ತೆಲುಗು), ದಳಪತಿ ವಿಜಯ್​ 'ಲಿಯೋ' (ತಮಿಳು), ಟೈಗರ್​ ಶ್ರಾಫ್​ 'ಗಣಪಥ್​​' (ಹಿಂದಿ), ಕಂಗನಾ ರಣಾವತ್​ 'ತೇಜಸ್​' (ಹಿಂದಿ), 'ಯಾರಿಯನ್​ 2', 'ಕಿಲ್ಲರ್ಸ್​ ಆಫ್​ ದಿ ಫ್ಲವರ್​ ಮೂನ್​' ಚಿತ್ರಗಳು ಒಮ್ಮೆಲೇ ತೆರೆ ಕಾಣಲಿವೆ.

ಇವೆಲ್ಲವೂ ಒಂದೇ ದಿನದ ಗ್ಯಾಪ್​ನಲ್ಲಿ ಅಂದರೆ ಅಕ್ಟೋಬರ್​ 18 ಅಥವಾ 19ರಂದು ಥಿಯೇಟರ್​ಗೆ ಎಂಟ್ರಿಯಾಗಲಿದೆ. ತೆಲುಗು ಮತ್ತು ತೆಲುಗು ಬಾಕ್ಸ್​ ಆಫೀಸ್​ ವಿಚಾರಕ್ಕೆ ಬಂದರೆ ಪ್ರೇಕ್ಷಕರು, 'ಭಗವಂತ ಕೇಸರಿ', 'ಟೈಗರ್​ ನಾಗೇಶ್ವರ ರಾವ್​' ಮತ್ತು 'ಲಿಯೋ' ಚಿತ್ರದ ಕಡೆಗೆ ಹೆಚ್ಚು ಆಸಕ್ತಿಯನ್ನು ತೋರಿಸುತ್ತಿದ್ದಾರೆ. ಈಗಾಗಲೇ ಬಿಡುಗಡೆಯಾಗಿರುವ ಪೋಸ್ಟರ್​ ಹಾಗೂ ಟ್ರೇಲರ್​ಗಳಿಂದ ಈ ಸಿನಿಮಾದ ಮೇಲಿನ ನಿರೀಕ್ಷೆ ಹೆಚ್ಚಿದೆ. ಟಾಲಿವುಡ್​ನಲ್ಲಿ ಬಾಲಯ್ಯ ಮತ್ತು ರವಿತೇಜ ನಡುವೆ ಸ್ಪರ್ಧೆ ಏರ್ಪಡಲಿದೆ.

ಇದನ್ನೂ ಓದಿ: ಅ.19ಕ್ಕೆ ಬಹುನಿರೀಕ್ಷಿತ 'ಘೋಸ್ಟ್'​ ತೆರೆಗೆ: ವಿದೇಶದಲ್ಲಿ 'BIG DADDY' ಹವಾ ಹೇಗಿದೆ ಗೊತ್ತಾ?

ಆದರೆ ಕಾಲಿವುಡ್​ನಲ್ಲಿ ವಿಜಯ್​ ನಟನೆಯ 'ಲಿಯೋ'ದ್ದೇ ಸದ್ದು. ಕನ್ನಡದಲ್ಲಿ 'ಘೋಸ್ಟ್'​ ಸಿನಿಮಾದ್ದೇ ಹವಾ. ಬಾಲಿವುಡ್​ನಲ್ಲಿ 'ಗಣಪಥ್​​'ಗೆ ಒಳ್ಳೆ ಕ್ರೇಜ್​ ಇದೆ. ಈ ಮೂರು ಸಿನಿಮಾಗಳಿಗೆ ಅವುಗಳದ್ದೇ ಭಾಷೆಯಲ್ಲಿ ಯಾವುದೇ ಪೈಪೋಟಿ ಇಲ್ಲ. ಕಂಗನಾ ರಣಾವತ್ ಅವರ​ 'ತೇಜಸ್​' ಮೇಲೂ ಒಂದಿಷ್ಟು ಕುತೂಹಲ ಇದೆ. ಇನ್ನುಳಿದಂತೆ ಚಿತ್ರಗಳಿಗೆ ಹೆಚ್ಚಿನ ಪ್ರಚಾರ ಇಲ್ಲದಿದ್ದರೂ ಕೆಲವು ಚಿತ್ರಮಂದಿರಗಳಲ್ಲಿ ಉತ್ತಮ ಪ್ರದರ್ಶನ ಕಾಣುವ ನಿರೀಕ್ಷೆಯಿದೆ.

ಇಷ್ಟೆಲ್ಲಾ ಸ್ಟಾರ್​ ನಟರ ಸಿನಿಮಾಗಳು ಹಾಗೂ ಇತರೆ ಕೆಲವು ಚಿತ್ರಗಳು ಏಕಕಾಲಕ್ಕೆ ಬಿಡುಗಡೆಯಾಗುತ್ತಿರುವುದರಿಂದ ಥಿಯೇಟರ್​ಗಳಲ್ಲಿ ಪೈಪೋಟಿ ಏರ್ಪಡುವ ಸಾಧ್ಯತೆ ಇದೆ. ಈ ಸಮಸ್ಯೆಯನ್ನು ತಪ್ಪಿಸಲು ಅಕ್ಟೋಬರ್​ 13 ಅಥವಾ 15 ಕ್ಕೆ ಯಾವುದಾದರೂ ಎರಡು ಚಿತ್ರಗಳನ್ನು ಪ್ರಿಪೋನ್​ ಮಾಡಿದರೆ ಉತ್ತಮ ಎನ್ನುವುದು ವಿಶ್ಲೇಷಕ ಅಭಿಪ್ರಾಯ. ಆದರೆ ಎಲ್ಲಾ ಸ್ಟಾರ್​ಗಳು ದಸರಾಗೆ ಎಂಟ್ರಿ ಕೊಡಲು ಬಯಸುತ್ತಿದ್ದಾರೆ. ಹೀಗಾಗಿ ಇನ್ನೂ ಯಾವುದಾದರೂ ಸಿನಿಮಾಗಳು ಇದೇ ಸಾಲಿಗೆ ಸೇರಲಿದೆಯಾ? ಎಂಬುದು ಇನ್ನಷ್ಟೇ ಕಾದುನೋಡಬೇಕಿದೆ. ಅಂತೂ ಈ ದಸರಾ ಸಿನಿ ಪ್ರೇಮಿಗಳಿಗೆ ಹಬ್ಬವೇ ಸರಿ.

ಇದನ್ನೂ ಓದಿ: ಶೈನ್ ಶೆಟ್ಟಿಯ 'ಜಸ್ಟ್ ಮ್ಯಾರಿಡ್​'ಗೆ ನಿರ್ಮಾಪಕರಾದ ಅಜನೀಶ್ ಲೋಕನಾಥ್: ಸಿ.ಆರ್ ಬಾಬಿ ನಿರ್ದೇಶನದಲ್ಲಿ ಸಿನಿಮಾ