ಕಾಲಿವುಡ್ ನಟ ಕಾರ್ತಿ ಸದ್ಯ ತಮ್ಮ ಮುಂಬರುವ ಸಿನಿಮಾಗಳತ್ತ ಗಮನ ಹರಿಸುತ್ತಿದ್ದಾರೆ. ಭಾರಿ ನಿರೀಕ್ಷೆಗಳ ನಡುವೆ ನವೆಂಬರ್ 10ರಂದು ಥಿಯೇಟರ್ಗೆ ಅಪ್ಪಳಿಸಿದ 'ಜಪಾನ್' ನಿರೀಕ್ಷಿತ ಮಟ್ಟದಲ್ಲಿ ಯಶಸ್ಸು ಕಂಡಿಲ್ಲ. ಅವರ ನಟನೆಗೆ ಪ್ರೇಕ್ಷಕರಿಂದ ಉತ್ತಮ ಅಂಕ ಸಿಕ್ಕಿದರೂ ಕೂಡ ಬಾಕ್ಸ್ ಆಫೀಸ್ನಲ್ಲಿ ಗೆಲ್ಲಲಿಲ್ಲ. ಇದರಿಂದಾಗಿ ಕಾರ್ತಿ ಅಭಿಮಾನಿಗಳು ನಿರಾಸೆಗೊಂಡಿದ್ದಾರೆ. ಈ ಫಲಿತಾಂಶಗಳನ್ನು ಗಮನಿಸಿರುವ ನಟ ತಮ್ಮ ಮುಂದಿನ ಸಿನಿಮಾಗಳ ಬಗ್ಗೆ ಹೆಚ್ಚು ಮುತುವರ್ಜಿ ವಹಿಸಿ ಹ್ಯಾಟ್ರಿಕ್ ಹಿಟ್ತಯಾರಿಯಲ್ಲಿದ್ದಾರೆ.
ಸದ್ಯ ಅವರ ಕೈಯಲ್ಲಿ ಸಾಲು ಸಾಲು ಸಿನಿಮಾಗಳಿವೆ. ಈಗಾಗಲೇ ಬಿಡುಗಡೆಯಾಗಿ ಥಿಯೇಟರ್ಗಳಲ್ಲಿ ಧೂಳೆಬ್ಬಿಸಿರುವ ಮೂರು ಬ್ಲಾಕ್ಬಸ್ಟರ್ ಸಿನಿಮಾಗಳ ಸೀಕ್ವೆಲ್ನಲ್ಲಿ ಕಾರ್ತಿ ತೊಡಗಿಕೊಂಡಿದ್ದಾರೆ. ಇತ್ತೀಚೆಗಷ್ಟೇ 'ಖಾಕಿ' ಸಿನಿಮಾದ ಮುಂದುವರಿದ ಭಾಗವನ್ನು ಅಧಿಕೃತವಾಗಿ ಪ್ರಕಟಿಸಲಾಗಿದೆ. ಲೋಕೇಶ್ ಕನಕರಾಜ್ ನಿರ್ದೇಶನದಲ್ಲಿ ಮೂಡಿಬರಲಿರುವ 'ಖೈದಿ 2' ಚಿತ್ರಕ್ಕೂ ತಯಾರಿ ನಡೆಯುತ್ತಿದೆ. ಇದಲ್ಲದೇ, 'ಸರ್ದಾರ್' ಸಿನಿಮಾದ ಸೀಕ್ವೆಲ್ ಕೂಡ ಪ್ಲಾನ್ ಮಾಡಲಾಗುತ್ತಿದೆ.
ಒಂದೇ ವರ್ಷದಲ್ಲಿ ಮೂರು ಹಿಟ್ ಚಿತ್ರಗಳ ಸೀಕ್ವೆಲ್ ಮಾಡಲು ಕಾರ್ತಿ ಚಿಂತನೆ ನಡೆಸಿದ್ದಾರೆ ಎಂದು ವರದಿಯಾಗಿದೆ. ಆದರೆ, ಈ ಹಿಂದೆ 'ಖೈದಿ 2' ಮತ್ತು 'ಖಾಕಿ 2' ಸಿನಿಮಾಗಳನ್ನು ಏಕಕಾಲಕ್ಕೆ ಬಿಡುಗಡೆಗೊಳಿಸಲು ಪ್ಲಾನ್ ಮಾಡಲಾಗಿದೆ ಎಂಬ ಮಾತು ಕೇಳಿಬಂದಿತ್ತು. ಸದ್ಯ, ಈ ಎರಡು ಚಿತ್ರಗಳ ಜೊತೆ 'ಸರ್ದಾರ್ 2' ಕೂಡ ಸೆಟ್ಟೇರಲಿದೆಯಂತೆ. ಈ ಮೂಲಕ ಕಾರ್ತಿ ಅಭಿನಯದ ಮೂರು ಬ್ಲಾಕ್ಬಸ್ಟರ್ ಸಿನಿಮಾಗಳ ಸೀಕ್ವೆಲ್ಗಳನ್ನು ಏಕಕಾಲಕ್ಕೆ ತೆರೆಗೆ ತರಲು ಯೋಜನೆ ನಡೆಯುತ್ತಿದ್ದು, ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ.
ಒಂದೇ ವರ್ಷ ಮೂರು ಸೀಕ್ವೆಲ್ಗೆ ತಯಾರಿ: ಆದರೆ, ಈ ಸಿನಿಮಾಗಳನ್ನು ಯಾವಾಗ ಬಿಡುಗಡೆ ಮಾಡಲಾಗುವುದು ಎಂಬುದರ ಕುರಿತು ಚಿತ್ರ ತಯಾರಕರು ಯಾವುದೇ ಸ್ಪಷ್ಟತೆಯನ್ನು ನೀಡಿಲ್ಲ. ಇವೆಲ್ಲವೂ ಒಂದೇ ವರ್ಷ ರಿಲೀಸ್ ಆದಲ್ಲಿ ಕಾರ್ತಿ ವಿಶೇಷ ದಾಖಲೆಯನ್ನು ಸೃಷ್ಟಿಸಲಿದ್ದಾರೆ. ಯಾಕೆಂದರೆ, ಇಲ್ಲಿಯವರೆಗೂ ಯಾವ ಹೀರೋ ಕೂಡ ಸೀಕ್ವೆಲ್ಗಳನ್ನು ಈ ರೀತಿ ಪ್ಲಾನ್ ಮಾಡಿಲ್ಲ. ಕಾರ್ತಿ ಮಾತ್ರ ಒಂದೇ ಬಾರಿಗೆ ಎರಡ್ಮೂರು ಸಿನಿಮಾಗಳ ಚಿತ್ರೀಕರಣ ಮುಗಿಸಿದ ದಾಖಲೆ ಹೊಂದಿದ್ದಾರೆ. ಹೀಗಾಗಿ ಅವರ ಮೇಲೆ ನಂಬಿಕೆ ಇಟ್ಟಿರುವ ನಿರ್ಮಾಪಕರು ಈ ಸೀಕ್ವೆಲ್ಗಳ ಬಗ್ಗೆ ವಿಶ್ವಾಸ ಹೊಂದಿದ್ದಾರೆ ಎಂದು ವರದಿಯಾಗಿದೆ. ಸದ್ಯ ಕಾರ್ತಿ ಸೀಕ್ವೆಲ್ ಕೆಲಸಗಳಲ್ಲಿ ಬ್ಯುಸಿಯಾಗಿದ್ದಾರೆ. ಈ ಸಿನಿಮಾಗಳು 2024ರಲ್ಲೇ ಬಿಡುಗಡೆಯಾಗುತ್ತೋ ಅಥವಾ ಮತ್ತೂ ಒಂದು ವರ್ಷ ಬೇಕಾಗುತ್ತೋ ಎಂಬುದನ್ನು ಇನ್ನಷ್ಟೇ ಕಾದು ನೋಡಬೇಕಿದೆ.
ಇದನ್ನೂ ಓದಿ: ಹಿಂದಿ ಸಿನಿಮಾ ಗೆಲ್ಲಿಸಿದ ದಕ್ಷಿಣದ ಪ್ರೇಕ್ಷಕರು: ದಾಖಲೆ ಬರೆದ ಮೊದಲ ಬಾಲಿವುಡ್ ಚಿತ್ರ
