ಬಾಲಿವುಡ್ ಬಹುಬೇಡಿಕೆಯ ನಟರಾದ ಹೃತಿಕ್ ರೋಷನ್ ಮತ್ತು ದೀಪಿಕಾ ಪಡುಕೋಣೆ ಮೊದಲ ಬಾರಿಗೆ ಸ್ಕ್ರೀನ್ ಶೇರ್ ಮಾಡಿರುವ 'ಫೈಟರ್' ಸಿನಿಮಾ ಮುಂದಿನ ಗಣರಾಜ್ಯೋತ್ಸವ ಸಂದರ್ಭ ತೆರೆಕಾಣಲು ಸಜ್ಜಾಗಿದೆ. ಕೆಲ ದಿನಗಳ ಹಿಂದಷ್ಟೇ ಚಿತ್ರ ನಿರ್ಮಾಪಕರು 'ಶೇರ್ ಖುಲ್ ಗಯೇ' ಎಂಬ ಸಿನಿಮಾದ ಮೊದಲ ಹಾಡನ್ನು ಬಿಡುಗಡೆ ಮಾಡಿದ್ದರು. ಈ ಪಾರ್ಟಿ ಸಾಂಗ್ಗೆ ಫ್ಯಾನ್ಸ್ ಹುಚ್ಚೆದ್ದು ಕುಣಿದಿದ್ದರು. ಇದೀಗ ಚಿತ್ರದ ಮತ್ತೊಂದು ಹಾಡು ಬಿಡುಗಡೆಯಾಗಿದೆ.
- " class="align-text-top noRightClick twitterSection" data="">
'ಇಷ್ಕ್ ಜೈಸಾ ಕುಚ್' ಎಂಬ ಶೀರ್ಷಿಕೆಯ ರೊಮ್ಯಾಂಟಿಕ್ ಹಾಡನ್ನು ಚಿತ್ರತಂಡ ಅನಾವರಣಗೊಳಿಸಿದೆ. ಬಾಸ್ಕೊ ಮಾರ್ಟಿಸ್ ಮತ್ತು ಸೀಸರ್ ಗೊನ್ಸಾಲ್ವೆಸ್ ನೃತ್ಯ ಸಂಯೋಜನೆ ಚೆನ್ನಾಗಿ ಮೂಡಿಬಂದಿದೆ. ಇದೇ ಮೊದಲ ಬಾರಿಗೆ ತೆರೆ ಹಂಚಿಕೊಳ್ಳುತ್ತಿರುವ ನಟಿ ದೀಪಿಕಾ ಮತ್ತು ಹೃತಿಕ್ ನಡುವಿನ ಕೆಮಿಸ್ಟ್ರಿ ತೋರಿಸುವಲ್ಲಿ ಹಾಡು ಸಫಲವಾಗಿದ್ದು, ಇಬ್ಬರು ಅದ್ಭುತ ಪ್ರದರ್ಶನ ಅಭಿಮಾನಿಗಳಲ್ಲಿ ಹೊಸ ಉತ್ಸಾಹ ಮೂಡಿಸಿದೆ.
ಹಾಡು ಬಿಡುಗಡೆಯಾದ 45 ನಿಮಿಷಗಳಲ್ಲಿ 2 ಲಕ್ಷಕ್ಕೂ ಅಧಿಕ ವೀಕ್ಷಣೆ ಪಡೆದುಕೊಂಡಿದೆ. ಕುಮಾರ್, ರ್ಯಾಪರ್ ಮೆಲೋಡಿ ಮತ್ತು ವಿಶಾಲ್ ದದ್ಲಾನಿ ಬರೆದಿರುವ 'ಇಷ್ಕ್ ಜೈಸಾ ಕುಚ್' ಸಾಹಿತ್ಯಕ್ಕೆ ವಿಶಾಲ್ ದಾದ್ಲಾನಿ ಮತ್ತು ಶೇಖರ್ ರಾವ್ಜಿಯಾನಿ ಸಂಗೀತ ಸಂಯೋಜಿಸಿದ್ದಾರೆ. ಶಿಲ್ಪಾ ರಾವ್ ಮತ್ತು ರ್ಯಾಪರ್ ಮೆಲೋಡಿ ಈ ರೊಮ್ಯಾಂಟಿಕ್ ಹಾಡಿಗೆ ಧ್ವನಿಯಾಗಿದ್ದಾರೆ.
ಚಿತ್ರ ತಯಾರಕರು ಡಿಸೆಂಬರ್ 15ರಂದು ಫೈಟರ್‌ನ 'ಶೇರ್ ಖುಲ್ ಗಯೇ' ಶೀರ್ಷಿಕೆಯ ಪಾರ್ಟಿ ಸಾಂಗ್ ಅನ್ನು ಬಿಡುಗಡೆ ಮಾಡಿದ್ದರು. ಹಾಡಿನಲ್ಲಿ, ಹೃತಿಕ್ ಮತ್ತು ದೀಪಿಕಾ ಡ್ಯಾನ್ಸ್ ಮಾಡಿದ್ದಾರೆ. ಚಿತ್ರದಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿರುವವರೂ ಕೂಡ ಈ ಸಾಂಗ್ನಲ್ಲಿ ಕಾಣಿಸಿಕೊಂಡಿದ್ದಾರೆ. 'ಶೇರ್ ಖುಲ್ ಗಯೇ' ಕೇಳುತ್ತಿದ್ದರೆ ಎದ್ದು ಕುಣಿಯಬೇಕು ಎಂದು ಅನಿಸುತ್ತದೆ ಎಂಬ ಅಭಿಪ್ರಾಯಗಳನ್ನು ಅಭಿಮಾನಿಗಳು ವ್ಯಕ್ತಪಡಿಸಿದ್ದಾರೆ. ಈ ಹಾಡನ್ನು ಕುಮಾರ್ ಬರೆದಿದ್ದು, ವಿಶಾಲ್ ದದ್ಲಾನಿ, ಬೆನ್ನಿ ದಯಾಳ್, ಶೇಖರ್ ಮತ್ತು ಶಿಲ್ಪಾ ರಾವ್ ಸಂಯೋಜಿಸಿದ್ದಾರೆ.
ಫೈಟರ್ ಸಿನಿಮಾಗೆ ಸಿದ್ಧಾರ್ಥ್ ಆನಂದ್ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ನಿರ್ದೇಶಕ ಸಿದ್ಧಾರ್ಥ್ ಮತ್ತು ಹೃತಿಕ್ ರೋಷನ್ ಒಟ್ಟಿಗೆ ಕೆಲಸ ಮಾಡುತ್ತಿರುವ ಮೂರನೇ ಸಿನಿಮಾ ಇದಾಗಿದೆ. ಈ ಹಿಂದೆ ಈ ಜೋಡಿ ಬ್ಯಾಂಗ್ ಬ್ಯಾಂಗ್ ಮತ್ತು ವಾರ್ ಚಿತ್ರದಲ್ಲಿ ಕೆಲಸ ಮಾಡಿದ್ದಾರೆ. ಸಿದ್ದಾರ್ಥ್ ಅವರ ಮಾರ್ಫ್ಲಿಕ್ಸ್ ಪಿಕ್ಚರ್ ಮತ್ತು ವಯೋಕಾಮ್ 18 ಸ್ಟುಡಿಯೋ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದು, ಚಿತ್ರ ಗಣರಾಜ್ಯೋತ್ಸವಕ್ಕೆ ಮುನ್ನಾದಿನ ಅಂದರೆ, 2024ರ ಜನವರಿ 25ಕ್ಕೆ ಬಿಡುಗಡೆಯಾಗಲಿದೆ.
ಇದನ್ನೂ ಓದಿ: ಫೈಟರ್ ಬಿಡುಗಡೆಗೆ ದಿನಗಣನೆ: 'ಶೇರ್ ಖುಲ್ ಗಯೇ' ಮೇಕಿಂಗ್ ವಿಡಿಯೋ ನೋಡಿ
