2023ರಲ್ಲಿ ಎರಡು ಬ್ಲಾಕ್ ಬಸ್ಟರ್ ಸಿನಿಮಾ ನೀಡಿರುವ ಸೂಪರ್ ಸ್ಟಾರ್ ಶಾರುಖ್ ಖಾನ್ ಅವರ ಮುಂಬರುವ ಬಹುನಿರೀಕ್ಷಿತ ಸಿನಿಮಾ 'ಡಂಕಿ'. ಪಠಾಣ್ ಮತ್ತು ಜವಾನ್‌ನಂತಹ ಬ್ಯಾಕ್-ಟು-ಬ್ಯಾಕ್ ಹಿಟ್ ಸಿನಿಮಾ ನಂತರ ಇದೇ ಸಾಲಿನಲ್ಲಿ ತೆರೆಕಾಣಲು ಸಜ್ಜಾಗಿರುವ ಸಿನಿಮಾ ಡಂಕಿ.
ರಾಜ್ಕುಮಾರ್ ಹಿರಾನಿ ನಿರ್ದೇಶನದ ಈ ಸಿನಿಮಾ ಕ್ರಿಸ್ಮಸ್ ಸಂದರ್ಭ ತೆರೆಗಪ್ಪಳಿಸಲಿದ್ದು, ಹ್ಯಾಟ್ರಿಕ್ ಹಿಟ್ ಕೊಡಲಿದ್ದಾರೆ ಅನ್ನೋದು ಅಭಿಮಾನಿಗಳ ವಿಶ್ವಾಸ. ಭಾರತೀಯ ಚಿತ್ರರಂಗದ ಇಬ್ಬರು ದಿಗ್ಗಜರಾದ ಎಸ್‌ಆರ್‌ಕೆ ಹಾಗೂ ರಾಜ್ಕುಮಾರ್ ಹಿರಾನಿ ಕಾಂಬಿನೇಶನ್ನ ಡಂಕಿ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಧೂಳೆಬ್ಬಿಸುವ ನಿರೀಕ್ಷೆ ಇದೆ.
ಡಂಕಿ ಟೀಸರ್: ಇತ್ತೀಚಿನ ವರದಿಗಳ ಪ್ರಕಾರ, ಡಂಕಿ ಸಿನಿಮಾದ ಮೊದಲ ಟೀಸರ್ 2023ರ ನವೆಂಬರ್ 2ರಂದು ಅನಾವರಣಗೊಳ್ಳಲಿದೆ. ಅಂದು ಶಾರುಖ್ ಖಾನ್ ಜನ್ಮದಿನವಾದ ಹಿನ್ನೆಲೆ, ಟೀಸರ್ ಬಿಡುಗಡೆಗೊಳಿಸಲು ಸಿದ್ಧತೆಗಳು ನಡೆಯುತ್ತಿವೆ. ಪ್ರಪಂಚದಾದ್ಯಂತದ ಇರುವ ಲಕ್ಷಾಂತರ ಅಭಿಮಾನಿಗಳಿಗೆ ಇದು ಶಾರುಖ್ ಖಾನ್ ಅವರ ಅವರ ಉಡುಗೊರೆಯಾಗಿದೆ. ಅಲ್ಲದೇ, ಶಾರುಖ್ ಖಾನ್ ಮುಂಬೈನಲ್ಲಿ ತಮ್ಮ ಅಭಿಮಾನಿಗಳಿಗಾಗಿ ವಿಶೇಷವಾಗಿ ಬರ್ತ್ಡೇ ಪಾರ್ಟಿ ಆಯೋಜಿಸಲು ಯೋಜಿಸಿದ್ದಾರಂತೆ. ಈವೆಂಟ್ನಲ್ಲಿ ಮೆಚ್ಚಿನ ನಟನ ಜೊತೆ ಅಭಿಮಾನಿಗಳು ಟೀಸರ್ ವೀಕ್ಷಿಸಬಹುದಾಗಿದೆ.
ಡಂಕಿ ಚಿತ್ರದ ಟೀಸರ್ ಸೆಂಟ್ರಲ್ ಬೋರ್ಡ್ ಆಫ್ ಫಿಲ್ಮ್ ಸರ್ಟಿಫಿಕೇಶನ್ನಿಂದ ಯು ಸರ್ಟಿಫಿಕೇಟ್ ಪಡೆದುಕೊಂಡಿದೆ. ರೆಡ್ ಚಿಲ್ಲೀಸ್ ಎಂಟರ್ಟೈನ್ಮೆಂಟ್, ರಾಜ್ಕುಮಾರ್ ಹಿರಾನಿ ಫಿಲ್ಮ್ಸ್ ಮತ್ತು ಜಿಯೋ ಸ್ಟುಡಿಯೋಸ್ ಜಂಟಿಯಾಗಿ ಈ ಚಿತ್ರವನ್ನು ನಿರ್ಮಿಸುತ್ತಿದೆ. ಎರಡು ಟೀಸರ್ ಆವೃತ್ತಿಗಳು ಸಿದ್ಧಗೊಂಡಿದೆ. ಒಂದು ನಿಮಿಷಕ್ಕೂ ಕಡಿಮೆ ಇರುವ ಒಂದು ಟೀಸರ್, ಮತ್ತೊಂದು ಎರಡು ನಿಮಿಷಗಳ ಅವಧಿಯ ಟೀಸರ್. ನವೆಂಬರ್ 2 ರಂದು ಯಾವ ಆವೃತ್ತಿ ಬಿಡುಗಡೆ ಮಾಡುತ್ತಾರೆ ಎಂಬುದನ್ನು ಇನ್ನೂ ಘೋಷಿಸಿಲ್ಲ.
ಇದನ್ನೂ ಓದಿ: ನವೆಂಬರ್ 1ರಂದು ರಾಣೆಬೆನ್ನೂರು ತಾಲೂಕು ಕ್ರೀಡಾಂಗಣದಲ್ಲಿ 'ಗರಡಿ' ಟ್ರೇಲರ್ ಬಿಡುಗಡೆ
ಡಂಕಿ ಸಿನಿಮಾ ಸಿನಿಪ್ರಿಯರಿಗೆ ಮತ್ತು ಕಿಂಗ್ ಖಾನ್ ಅಭಿಮಾನಿಗಳಿಗೆ ಕ್ರಿಸ್ಮಸ್ ಟ್ರೀಟ್ ಆಗುವ ನಿರೀಕ್ಷೆಯಿದೆ. ಪ್ರಮೋಶನ್ ಭಾಗವಾಗಿ, ಟೀಸರ್ ಸಲ್ಮಾನ್ ಖಾನ್ ಮತ್ತು ಕತ್ರಿನಾ ಕೈಫ್ ಅಭಿನಯದ ಟೈಗರ್ 3 ಸಿನಿಮಾ ಜೊತೆಗೆ ಪ್ರಪಂಚದಾದ್ಯಂತ ಚಿತ್ರಮಂದಿರಗಳಲ್ಲಿ ಪ್ರದರ್ಶಿಸಲಾಗುತ್ತದೆ ಎಂಬ ಮಾಹಿತಿಯೂ ಇದೆ. ತಾಪ್ಸಿ ಪನ್ನು ಕೂಡ ಈ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಡಿಸೆಂಬರ್ 22 ರಂದು ವಿಶ್ವಾದ್ಯಂತ ಥಿಯೇಟರ್‌ಗಳಲ್ಲಿ ಬಿಡುಗಡೆಯಾಗಲಿದೆ. ಅಂದೇ ದಕ್ಷಿಣ ಚಿತ್ರರಂಗದ ಬಹುನಿರೀಕ್ಷಿತ ಚಿತ್ರ ಸಲಾರ್ ಕೂಡ ತೆರೆಕಾಣಲಿದೆ.
ಇದನ್ನೂ ಓದಿ: ಸ್ಟೈಲಿಶ್ ಡ್ರೆಸ್ನಲ್ಲಿ ರಶ್ಮಿಕಾ ಮಂದಣ್ಣ ಬೊಂಬಾಟ್ ಲುಕ್.. ಕಿರಿಕ್ ಬೆಡಗಿಯ ಹೊಸ ಫೋಟೋ
