ತುಮಕೂರು : ಮೊದಲು ಪಾಕಿಸ್ತಾನದ ಬಗ್ಗೆ ಇಮ್ರಾನ್ ಖಾನ್ ನೋಡಿಕೊಳ್ಳಲಿ. ಅಲ್ಲಿ ಕ್ಲಿಷ್ಟಕರ ವಾತಾವರಣ ಇದೆ, ಅದನ್ನು ನೋಡಿಕೊಳ್ಳಲಿ. ನಮ್ಮ ದೇಶದ ವಿಷಯವನ್ನು ನಾವು ನೋಡಿಕೊಳ್ಳುತ್ತೇವೆ. ನಮ್ಮ ದೇಶದ ಬಗ್ಗೆ ಯಾವುದೇ ದೇಶ ಪ್ರಶ್ನೆ ಮಾಡಿದರೆ ನಾವು ಅದನ್ನು ಖಂಡಿಸುತ್ತೇವೆ ಎಂದು ರಾಜ್ಯ ವಕ್ಫ್ ಬೋರ್ಡ್ ಅಧ್ಯಕ್ಷ ಮೌಲಾನ ಮಹಮದ್ ಷಪಿ ಹೇಳಿದ್ದಾರೆ.
ಸಿದ್ದಗಂಗಾಮಠಕ್ಕೆ ಭೇಟಿ ನೀಡಿದ ವೇಳೆ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಕೇಸರಿ ಶಾಲನ್ನು ಯಾರೂ ವಿರೋಧಿಸಲ್ಲ. ಹಿಜಾಬ್ ಹಾಕುವುದು ಶೇರಿಯತ್ನಲ್ಲಿ ಇದೆ. ಹೀಗಾಗಿ, ಅವಕಾಶ ಬೇಕು.
ನಮ್ಮ ಸಮುದಾಯದಲ್ಲೂ ಕೆಲ ಕಿಡಿಗೇಡಿಗಳು ಇದ್ದಾರೆ. ಅವರು ಮಾಡಿದರು ಅಂತಾ ಇಡೀ ಸಮುದಾಯದ ಹೆಸರು ಕೆಡಿಸಬಾರದು. ಉಡುಪಿಯಲ್ಲಿ ಮುಗಿಸಬೇಕಾದ ವಿಚಾರ ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟಕ್ಕೆ ಮುಟ್ಟಿದೆ ಎಂದರು.
ಮುಸ್ಲಿಂ ಧಾರ್ಮಿಕ ನಾಯಕರೆಲ್ಲಾ ಸೇರಿ ಈ ವಿಚಾರವಾಗಿ ಚರ್ಚೆ ಮಾಡುತ್ತಿದ್ದೇವೆ. ಸಹೋದರ ಧರ್ಮಿಯ ಸ್ವಾಮೀಜಿಯವರೊಂದಿಗೂ ವಿಷಯ ಹಂಚಿಕೊಳ್ಳುತ್ತಿದ್ದೇವೆ. ಮೊದಲು ಯಾವ ರೀತಿಯಲ್ಲಿ ನಮ್ಮ ಕರ್ನಾಟಕ ಸೌಹಾರ್ದಯುತವಾಗಿ ಇತ್ತೋ, ಅದಕ್ಕೆ ಧಕ್ಕೆ ಬರಬಾರದು. ಸೌಹಾರ್ದ ಹಾಗೂ ಸಾಮರಸ್ಯವನ್ನು ಕೆದಕುವ ವ್ಯಕ್ತಿಗಳನ್ನು ನಾವೆಲ್ಲರೂ ಸೇರಿ ಮಟ್ಟ ಹಾಕಬೇಕು ಎಂದರು.
ಕರ್ನಾಟಕ ಕರ್ನಾಟಕವಾಗಿಯೇ ಉಳಿಯಬೇಕು. ಆದ್ರೆ, ಈಗ ಕೋಮುಗಲಭೆ ವಾತಾವರಣ ನಿರ್ಮಾಣವಾಗುತ್ತಿದೆ. ಹೀಗಾಗಿ, ಸ್ವಾಮೀಜಿಯವರೊಂದಿಗೆ ಸುದೀರ್ಘವಾಗಿ ಚರ್ಚೆ ಮಾಡಿದ್ದೇವೆ. ಸ್ವಾಮೀಜಿಯವರು ಯಾವ ಹಂತದಲ್ಲೂ ಹಿಂದೂ-ಮುಸ್ಲಿಂ ಸೌಹಾರ್ದತೆಗೆ ಸಮಸ್ಯೆಯಾಗದಂತೆ ಮುನ್ನಡೆಯಬೇಕಿದೆ ಎಂದರು.
ಸದ್ಯ ಪ್ರಕರಣ ನ್ಯಾಯಾಲಯದಲ್ಲಿದೆ. ನ್ಯಾಯಾಲಯದ ತೀರ್ಪು ಬರಲಿ ಅಂತಾ ಹೇಳಿದ್ದಾರೆ. ಹಿಜಾಬ್ ವಿಚಾರವನ್ನು ಏಕೆ ಇಷ್ಟು ದೊಡ್ಡದು ಮಾಡಿದರೋ ಗೊತ್ತಿಲ್ಲ. ಭಾರತದಲ್ಲಿ ಸಂವಿಧಾನ ಬದ್ಧವಾಗಿ ಅವರ ಧರ್ಮ ಪಾಲಿಸುವ ಹಕ್ಕು ಇದೆ ಎಂದರು.
ಇದನ್ನೂ ಓದಿ: ಯಾವ್ನೋ ಈಶ್ವರಪ್ಪ ಅಂತೆ, ಅವನೊಬ್ಬ ತಲೆಕೆಟ್ಟ ಈಶ್ವರಪ್ಪ.. ಏಕವಚನದಲ್ಲೇ ಡಿಕೆಶಿ ವಾಗ್ದಾಳಿ
ಕರ್ನಾಟಕದ ಮುಸ್ಲಿಂ ಜನರು ಆತಂಕದಲ್ಲಿ ಇದ್ದಾರೆ. ಕರ್ನಾಟಕದಲ್ಲಿ ಜೀವನ ಮಾಡಲು ಆಗಲ್ವಾ ಅಂತಾ ಹೇಳ್ತಾ ಇದ್ದಾರೆ. ಹೀಗಾಗಿ, ಇದನ್ನು ಸೌಹಾರ್ದಯುತವಾಗಿ ಮುಗಿಸಬೇಕು ಎಂದರು. ಕೋರ್ಟ್ ತೀರ್ಪಿಗೆ ನಾವು ಗೌರವ ಕೊಡಬೇಕು. ತೀರ್ಪು ಏನು ಬರುತ್ತೋ ನೋಡಬೇಕು.
ಶಿರೋವಸ್ತ್ರ ಎಂಬುವುದು ಸಮವಸ್ತ್ರ ಅಲ್ಲ. ಶೇರಿಯತ್ಗೆ ಒಳಪಟ್ಟ ಹುಡುಗಿ ಹೊರಗಡೆ ಹೋಗುವಾಗ ಶಿರೋವಸ್ತ್ರ ಧರಿಸಿ ಹೋಗಬೇಕು ಅನ್ನೋ ಕಟ್ಟಾಜ್ಞೆ ಇದೆ. ಹೀಗಾಗಿ, ಏನು ಮಾಡಬೇಕು ಅಂತಾ ಕಾನೂನು ತಜ್ಞರ ಜೊತೆಗೆ ಚರ್ಚೆ ಮಾಡ್ತೇವೆ.
ಕೋರ್ಟ್ ತೀರ್ಪು ಸೌಹಾರ್ದಯುತವಾಗಿ ಬರುವ ನಿರೀಕ್ಷೆ ಇದೆ. ಯಾರೇ ಸೌಹಾರ್ದಕ್ಕೆ ಧಕ್ಕೆ ಮಾಡಿದರೆ ನಾವು ಒಪ್ಪಲ್ಲ. ಕೇಸರಿ ಶಾಲು ಹಿಂದೂ ಧರ್ಮದಲ್ಲಿ ಇದ್ದರೆ ಯಾರು ವಿರೋಧ ಮಾಡಕ್ಕೆ ಆಗಲ್ಲ ಎಂದರು.
