ಶತಮಾನ ಕಂಡ ಹೊಸಬಾಳೆ ಸರ್ಕಾರಿ ಶಾಲೆ: ಹೊಸ ರೂಪ ನೀಡಿದ ನಿರ್ಮಾಪಕ ಕೃಷ್ಣಪ್ಪ

ಶತಮಾನ ಕಂಡ ಹೊಸಬಾಳೆ ಸರ್ಕಾರಿ ಶಾಲೆಗೆ ಚಿತ್ರ ನಿರ್ಮಾಪಕ ಎಂ.ವಿ. ಕೃಷ್ಣಪ್ಪ ಅವರು ಸುಮಾರು 2 ಲಕ್ಷ ರೂ. ಖರ್ಚು ಮಾಡಿ ಪೇಂಟಿಂಗ್​​ ಮಾಡಿಸಿದ್ದಾರೆ.

ಶಿವಮೊಗ್ಗ: ಸೊರಬ ತಾಲೂಕಿನ ಹೊಸಬಾಳೆಯ ಸರ್ಕಾರಿ ಪ್ರಾಥಮಿಕ ಶಾಲೆಗೆ ಈಗ 110 ವರ್ಷ. ಶತಮಾನ ಕಂಡಿದ್ದ ಈ ಸರ್ಕಾರಿ ಶಾಲೆಗೆ ಪೇಂಟಿಂಗ್​​ ಮಾಡಿಸುವ ಮೂಲಕ ಚಿತ್ರ ನಿರ್ಮಾಪಕ ಎಂ.ವಿ. ಕೃಷ್ಣಪ್ಪ ಹೊಸ ರೂಪ ನೀಡಿದ್ದಾರೆ.

ಹೊಸಬಾಳೆಯ ಸರ್ಕಾರಿ ಪ್ರಾಥಮಿಕ ಶಾಲೆ ಶಿವಮೊಗ್ಗ ಜಿಲ್ಲೆಯ ಗಡಿ ಭಾಗದಲ್ಲಿದೆ. ಈ ಶಾಲೆಯ ಬಗ್ಗೆ ಗ್ರಾಮಸ್ಥರಿಗೆ ಒಂದು ರೀತಿಯ ಅಸಡ್ಡೆ. ಶಾಲೆಗೆ ಪೇಂಟಿಂಗ್​​ ಮಾಡಿಸಿ ದಶಕಗಳೇ ಕಳೆದು ಹೋಗಿದ್ದವು. ಇದರಿಂದ ಶಾಲೆಯ ಶಿಕ್ಷಕ ಹೊಳಿಯಪ್ಪ ಅವರು ತಮ್ಮ ಶಾಲೆಗೆ ಪೇಂಟಿಂಗ್​​ ಮಾಡಿಸಬೇಕೆಂದು ಚಿತ್ರ‌ ನಿರ್ಮಾಪಕ ಎಂ.ವಿ. ಕೃಷ್ಣಪ್ಪ ಅವರ ಸ್ನೇಹಿತರೊಬ್ಬರ ಬಳಿ ಮಾತನಾಡಿದ್ದರು. ಅವರು ಈ ವಿಚಾರವನ್ನು ಕೃಷ್ಣಪ್ಪ ಅವರಿಗೆ ಹೇಳಿದಾಗ ಅವರು ಶಾಲೆಯ ಅಡುಗೆ ಮನೆ, ಅಂಗನವಾಡಿ ಸೇರಿದಂತೆ ಶಾಲಾ ಆವರಣದ ಎಲ್ಲಾ ಕಟ್ಟಡಗಳಿಗೆ ಪೇಂಟ್ ಮಾಡಿಸಿದ್ದಾರೆ.

ಶಾಲಾ ಆವರಣದ ಎಲ್ಲ ಕಟ್ಟಡದ ಒಳ ಹಾಗೂ ಹೊರ ಭಾಗಕ್ಕೆ ಶಾಲೆಯವರು ಹೇಳಿದಂತೆಯೇ ಬಣ್ಣ ಮಾಡಿಸಿದ್ದಾರೆ. ಇದಕ್ಕಾಗಿ ಸುಮಾರು 2 ಲಕ್ಷ ರೂ ನೀಡಿದ್ದಾರೆ. ಬಣ್ಣ ಬಳಿದ ನಂತರ ಶಾಲೆ ಸುಂದರವಾಗಿದೆ. ಇದರಿಂದ ಮಕ್ಕಳು ಸೇರಿದಂತೆ‌ ಶಾಲೆಯ ಎಲ್ಲ ಶಿಕ್ಷಕರಿಗೆ ಸಂತೋಷವನ್ನುಂಟು ಮಾಡಿದೆ ಎನ್ನುತ್ತಾರೆ ಶಿಕ್ಷಕರು.

ಎಂ.ವಿ.ಕೃಷ್ಣಪ್ಪ ಅವರು ಡಿಡಿ ಪಿಕ್ಚರ್ಸ್ ಪ್ರೈವೇಟ್ ಲಿಮಿಟೆಡ್​​ನ ಅಧ್ಯಕ್ಷರಾಗಿದ್ದು, ಸಾಮಾಜಿಕ‌ ಸೇವೆಯಲ್ಲಿ ತಮ್ಮನ್ನು ತಾವು ತೂಡಗಿಸಿಕೊಂಡಿದ್ದಾರೆ.‌ ತಮ್ಮ ಶಾಲೆಗೆ ಬಣ್ಣ ಮಾಡಿಸಿ, ಶಾಲೆಗೆ ಹೊಸ ರೂಪ ನೀಡಿದ ಅವರಿಗೆ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರು ಅಭಿನಂದನೆ ಸಲ್ಲಿಸಿದ್ದಾರೆ.‌

ಇದನ್ನೂ ಓದಿ: ಹಿಂದೂ ಕಾರ್ಯಕರ್ತರು ಕೈಗಳಿಗೆ ಬಳೆ ತೊಟ್ಟಿಲ್ಲ: ಸಂಸದ ಬಿ ವೈ ರಾಘವೇಂದ್ರ